HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սոնա Ավագյան

Վահե Ավետյանի ընտանիքի փաստաբանները գնահատական կտան նախաքննության ընթացքին

«Վահե Ավետյան» հասարակական շարժման նախաձեռնող խումբը «Հարսնաքար» ռեստորանում ծեծված, ապա հիվանդանոցում մահացած ռազմական բժիշկ Վահե Ավետյանի մահվան քառասունքի օրը հայտարարել է համահայկական մոմավառության օր:

«Մենք առայժմ տեղի և օրվա վերաբերյալ հայտարարություն չենք անում: Մենք դրա մասին նախապես կհայտարարենք առաջիկա օրերին, և իհարկե քննարկում է լինելու՝ դրա հետ կապված»,- այսօրվա մամուլի ասուլիսում ասաց «Վահե Ավետյան» հասարակական շարժման նախաձեռնող խմբի անդամ Գարեգին Չուգասզյանը: Այս ընթացքում հայտարարություններ կլինեն նաև այլ ակցիաների մասին:

Առաջիկա օրերին Վահե Ավետյանի ընտանիքի փաստաբանները գնահատական կտան նաև նախաքննության ընթացքին, որը հուլիսի 10-ին ներկայացրեց ոստիկանության քննչական գլխավոր վարչության հատկապես կարևոր գործերով քննության վարչության բաժնի պետ, ոստիկանության մայոր Արսեն Այվազյանը: «Վահե Ավետյանի ընտանիքը նոր է վարձել փաստաբաններին»,- ասաց Գարեգին Չուգասզյանը:

«Այս օրերի ընթացքում, մինչև անգամ պրն Այվազյանի կողմից հնչեցված մեկ խոսքի ընթացքում արդեն իսկ անզեն աչքով երևում է, որ կային բազմաթիվ հակասություններ»,- ասաց ասուլիսի մյուս բանախոսը՝ «Վահե Ավետյան» հասարակական շարժման նախաձեռնող խմբի անդամ Լարիսա Ալավերդյանը: Նրա խոսքերով՝ դա խոսում է «նախօրոք և նախապես ուղղորդվող մի գործընթացի մասին»:

Լարիսա Ալավերդյանը մտավախություն ունի, որ նախաքննությունը կարող է փորձել այս գործը վերածել Պողոս Պողոսյանի գործի: Հիշեցնենք, որ Հայաստանի երկրորդ նախագահ Ռոբերտ Քոչարյանի թիկնազորի անդամ Աղամալ Հարությունյանը (մականունը՝ Կուկու) «Առագաստ» սրճարանում սպանեց Պողոս Պողոսյանին, քանի որ վերջինը, ով Ռոբերտ Քոչարյանի ուսանողական տարիների ընկերն էր, ասել էր. «Բարև, Ռոբ»: Աղամալ Հարությունյանը դատապարտվեց պայմանական ազատազրկման:

«Մենք պետք է ունենանք այդ անկեղծությունը և համարձակությունը, խոստովանենք, որ հասարակության ուժը չի հերիքել այն ժամանակ: Աշխատելու ենք այս անգամ հասնել հստակ արդյունքների՝ համաչափ պատժելիության սկզբունքի իրականացմանը»,- ասաց Լարիսա Ալավերդյանը:

Նա, սակայն, մտավախության ունի, որ «Հարսնաքարի» դեպքում ևս տուժածի մահը կարող են բնութագրել ոչ թե անմիջապես ծեծի հետևանքով առաջացած, այլ ուրիշ հանգամանքների պատճառով առաջացած:

«Պրն Այվազյանի խոսքի նախադասությունների, անգամ ստորակետերի մեջ հստակ երևում էր, որ ամեն ինչը ուզում են բերել մաքսիմում 5-10 տարի ինչ-որ պատժամիջոցի»,- ասաց Լարիսա Ալավերդյանը:

Գարեգին Չուգասզյանն էլ նշեց, որ այս սպանությունը առաջին դեպքը չէ, սակայն այս դեպքն իր հասարակական վտանգավորության աստիճանով այլ է, քանի որ «քրեաօլիգարխիկ համակարգը ձեռք է բարձրացրել» բանակի սպայի վրա:

«Երբ կյանքի անվտանգության երաշխավորը ինքը վտանգված է Հայաստանում, հասարակությունը պիտի գիտակցի, թե ինչ վտանգի առջև է ինքը կանգնած: Սա հստակորեն հասարակական վտանգավորության այլ մակարդակ է: Անցած օրերին ընթացքում մենք չտեսանք մեր ռազմական ուժերի համապատասխան ներկայացուցիչների դատապարտող լուրջ հայտարարությունները»,- ասաց Գարեգին Չուգասզյանը՝ հավելելով, որ մարդկային ողբերգության առումով որևէ տարբերություն չկա՝ սպա է սպանվել, թե որևէ այլ մարդ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter