Փոխվարչապետ, տարածքային կառավարման նախարար Արմեն Գեւորգյանն այսօր ընդունեց Հայաստանում Բելգիայի Թագավորության նորանշանակ դեսպան Գի Տրուվըրուային:

Փոխվարչապետը շնորհավորեց դիվանագետին`առաքելության ստանձման կապակցությամբ` վստահություն հայտնելով, որ նա իր հետագա գործունեությամբ կնպաստի երկկողմ հարաբերությունների զարգացմանը:

Անդրադարձ եղավ հայ-բելգիական փոխգործակցության ներկա մակարդակին եւ հեռանկարներին: Փոխվարչապետը գոհունակություն հայտնեց, որ վերջին տարիներին ընդլայնվում է գործակցության շրջանակը, եւ բացի ավանդական ադամանդագործության ոլորտից, ընդգրկում է այլ բնագավառներ. ակտիվ են նաեւ հայ-բելգիական գործարար շփումները: Նա նաեւ շնորհակալություն հայտնեց Երեւանում հիմնվող ուռուցքաբանական հիվանդությունների բուժման գերժամանակակից կենտրոնին բելգիական կողմից ցուցաբերվող աջակցության համար:

Երկուստեք հեռանկարային համարվեց գործակցությունը բժշկական սարքավորումների, դեղագործության, տեղեկատվական տեխնոլոգիաների ոլորտներում: Դեսպանը տեղեկացրեց, որ բարձր տեխնոլոգիաների բնագավառում գործող բելգիական ընկերությունները հետաքրքրված են հայաստանյան շուկայով եւ խոստացավ ջանքեր գործադրել համագործակցության զարգացման ուղղությամբ:

ՏԿՆ հասարակայնության հետ կապերի բաժին