Լոռու մարզի 105 գյուղական համայնքերում այս տարի անբարենպաստ վիճակ է ստեղծվել  խոտի արտադրության գործում: Շուկայում 1 հակ  խոտի գինը ներկայումս  այստեղ 1400 դրամ  է` այն էլ դաշտից: Մարզում  գյուղացիները  մտահոգված են  ձմռանը անասունների  կերի ապահովման համար: Շատերը  Լոռիում ձմռանը անկնկալում եմ խոշոր եղջերավոր անասունների անկում և այդ պատճառով  անասնապահական մթերքների թանկացում:  

Լոռու մարզպետ Արթուր Նալբանդյանը հուլիսի 15-ին մարզում  խոտի արտադրության հետ կապված «Հետքին» հայտնեց. «Ոչ միայն խոտի, պետք է ասեմ, որ  նախորդ տարվա հետ համենատած՝ հացահատիկային բույսերի   արտադրությունը մեզ համար այնքան էլ ցանկալի վիճակում չէ: Գյուղացիների կողմից ուղղակի  լրացուցիչ աշխատանքներ պետք է կատարվեն: Նախորդ տարի, եթե նրանք մոտ տարածքներից ապահովեցին իրենց անասուններին անհրաժեշտ խոտի պահանջարկը, այս  տարի ստիպված պետք է չարչարվեն համայնքերի հեռավոր խոտհարքների տարածքները  հնձելու համար, որպեսզի կարողանան ապահովել  պահանջված անասնակերը»: 

Արթուր Նալբանդյանը նաև հայտնեց, որ մարզում այս տարի մշակվել է գյուղատնտեսական նշանակության հողերի  ընդամենը 35 տոկոսը. «Գյուղատնտեսական նշանակության հողերի մշակման ամենացածր տոկոսը արձանագրվել է Տաշիրի տարածաշրջանում:  Մենք գիտենք դրա օբյեկտիվ և սուբյեկտիվ պատճառները, 12000 հա վարելահողից    Տաշիրի տարածաշրջանում  օգտագործվում  է ընդամենը 2300 հա-ն»:

Խոտի  հավաքման անբարենպաստ վիճակի մասին «Հետքն» ահազանգեր է ստացել  Լոռու մարզի Օձուն, Աքորի, Շնող, Արևածագ  և մյուս համայնքների գյուղացիներից: Օձունի այն գյուղցիները, ովքեր խոտի հայթայթման  ակնկալիքներ արդեն չունեն, սկսել են մորթել իրենց խոշոր եղջրավոր անասունները: «Մսավաճառները  Օձունում գյուղացիներից  տավարի միսը գնում են կգ-ը 2 հազար դրամով: Մեկ ամիս առաջ նրանք  գնում էին 2600 դրամով»,- ասաց  օձունեցի Եզեկ Աղվանյանը:  

«Անցած տարվա նման  այս տարի խոտը շատ չէ, հազիվ անցած տարվա հնձած խոտի կեսը կազմի: Սարերում էլ խոտ ունենք, հիմա գյուղացիները իրենց չմշակած դաշտերի  խոտն են հնձում, հետո կանցնեն սարերի խոտին: Օձունում 1500 գլուխ  խոշոր եղջրավոր անասուն կա»,- ասաց Օձունի գյուղապետ Արսեն Տիտանյանը, ով նաև փաստեց,  որ Օձունում  ձմռանը անպայման կգրանցվի  խոշոր եղջերավորների  անկում:  

«Հետքը» առաջիկա օրերին կանդրադառնա Լոռու մարզի առանձին համայնքների խոտհարքներում տիրող վիճակի և գյուղացիների կողմից ձեռնարկվող քայլերի մասին: