Այսօր Արմավիրի մարզի ընդհանուր իրավասության դատարանը, դատավոր Արամ Հովսեփյանի նախագահությամբ,  դռնփակ դատական նիստով որոշեց ԱԺ ՀՀԿ-ական պատգամավոր Նահապետ Գեւորգյանի որդու` Արտակ Գեւորգյանի նկատմամբ որպես խափանման միջոց կիրառել երկամսյա կալանք, ինչից հետո նրան տեղափոխեցին «Վարդաշեն» քրեակատարողական հիմնարկ:

Նման միջնորդությամբ դատարան էր դիմել Արմավիրի մարզի քննչական բաժնի ավագ քննիչ Արմեն Դալլաքյանը:

Հիշեցնենք, որ հուլիսի 18-ին կեսգիշերն անց նա զենքի սպառնալիքով առեւանգել էր երկու ավտոմեքենա, նախ` «Գազ-24», ապա Արմավիրի մարզի Սարդարապատ գյուղի դպրոցի տարածքում նաեւ «Վազ-2106» մակնիշի ավտոմեքենաները:

Ինչպես «Հետքին» տեղեկացրին Արմավիրի ոստիկանությունից, իրենց բաժնի հատուկ պահպանման տարածք է տեղափոխվել Արտակ Գեւորգյանի «Մերսեդես Ջի» մակնիշի ավտոմեքենան եւ վերջինիս կողմից առևանգված «Վազ 2106» եւ «ԳԱԶ 24» մակնիշի ավտոմեքենաները:

Արմավիրի մարզային քննչական բաժնում հարուցվել է քրեական գործ` ՀՀ քրեական օրենսգրքի 183 հոդվածի 1-ին մասի (ավտոմեքենային կամ տրանսպորտային այլ միջոցին ապօրինաբար տիրանալը (փախցնելը) առանց հափշտակելու նպատակի), 183 հոդվածի 3-րդ մասի 3-րդ կետի (կատարվել է կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով) եւ 235 հոդվածի 1-ին մասի հատկանիշներով (ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):