Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը հիմնավորված է համարել մարդկանց շահագործելու, այն է՝ օրգաններ՝ երիկամ, վերցնելու համար Ս. Հովսեփյանին առաջադրված մեղադրանքները և դատապարտել երկարատև ազատազրկման:

Դատարանում հետազոտված և հիմնավոր համարված ապացույցների համաձայն՝ քաղաքացի Ս. Հովսեփյանը նախնական համաձայնություն է ձեռք բերել՝ արտերկրում բնակվող, քննությամբ դեռևս ինքնությունը չպարզված ոմն Ալեքսի, Ալբերտի և Բագդանի հետ՝ մարդկանց շահագործելու, այն է՝ օրգաններ՝ երիկամ, վերցնելու նպատակով մարդկանց հավաքագրելու, նրանց տեղափոխումը կազմակերպելու և յուրաքանչյուր անձի դիմաց 2 հազարական ԱՄՆ դոլար գումար վարձատրություն ստանալու վերաբերյալ:

Այդ նպատակով Ս. Հովսեփյանը այցելել է հայաստանյան բուժհաստատություններ և համացանցում տեղադրել հայտարարություններ: Մարդկանց վիճակի խոցելիությունն օգտագործելու միջոցով Ս. Հովսեփյանը հավաքագրել է 6 անձի, հոգացել նրանց բժշկական հետազոտության, տեղափոխման ծախսերը և երիկամի դիմաց խոստացել 10 հազարական ԱՄՆ դոլար գումար վարձատրություն: Արդյունքում նրան հաջողվել է Շրի Լանկա տեղափոխել հիշյալ 6 անձից 4-ին, որից 3-ն այնտեղ վիրահատվել է, և վերցվել է նրանց երիկամը:

Կենտրոն և Նորք-Մարաշ վարչական շրջանների ընդհանուր իրավասության դատարանի հուլիսի 31-ի դատավճռով Ս. Հովսեփյանը մեղավոր է ճանաչվել ՀՀ քրեական օրենսգրքի 132-րդ հոդվածի 2-րդ մասի 1-ին, 2-րդ և 6-րդ կետերով և դատապարտվել 8 տարվա ազատազրկման՝ գույքի բռնագրավմամբ: Այս մասին հայտնում է գլխավոր դատախազությունը: