Հանրապետական կուսակցության Լոռու մարզային կառույցը սեպտեմբերի 9-ին կայանալիք ՏԻՄ ընտրություններում Վանաձորի քաղաքապետի թեկնածուներից սատարելու է գործող քաղաքապետ, հանրապետական Սամվել Դարբինյանի թեկնածությունը: Այս մասին ասաց Լոռու մարզպետ Արթուր Նալբանդյանը այսօր՝ մարզպետի պաշտոնում աշխատելու մեկ տարվա հաշվետվությունը մարզի լրագրողներին ներկայացնելու ժամանակ:

Վանաձորի քաղաքապետի թեկնածությունը սատարելու մասին ՀՀԿ Լոռու մարզային կառույցի որոշումն արդեն ուղարկվել է կուսակցության գործադիր մարմնին:

Արթուր Նալբանդյանը տեղեկացրեց, որ սեպտեմբերի 9-ին ՏԻՄ ընտրություններ են անցկացվելու մարզի ընդհանուր առմամբ 96 համայնքում, որից 10 համայնքում կընտրվեն միայն ավագանիներ, իսկ 86 համայնքում կանցկացվեն նաև համայնքապետների ընտրություններ:

Համայնքապետների թեկնածուներից որևէ մեկին սատարելու վերաբերյալ Հանրապետական կուսակցության մարզային կառույցը, մարզպետի տեղեկացմամբ, առայժմ քաղաքական հայտարարությունը չի արել, որովհետև կառույցի ղեկավարները դրա իմաստը չեն տեսել:

«Եթե կլինեն համայնքներ, որտեղ մրցակցություն կլինի, և այլ քաղաքական ուժեր համայնքապետի թեկնածուներ կունենան, բնականաբար մենք մեր կուսակցության կարծիքը կհայտարարենք, թե որ թեկնածուին ենք պաշտպանում»,- ասաց Արթուր Նալբանդյանը: