Այսօր առավոտյան դժբախտ դեպք է գրանցվել Էջմիածին-Արմավիր ճանապարհահատվածի Արշալույս գյուղի հատվածում: Տարոնիկ գյուղի ավտոբուսից վայր ընկել ու մահացել է 45-ամյա Մարինե Միրաբյանը:

Այս լուրը «Հետքի» հետ զրույցում հաստատեցին Վաղարշապատի ոստիկանության բաժնի հերթապահ մասից:

Ըստ շրջանառվող լուրերի` այսօր վաղ առավոտյան Տարոնիկ գյուղը սպասարկող ավտոբուսի վարորդ Գրիշա Մարտիրոսյանը ճանապարհին կանգնել եւ նստացրել է Մարինե Միրաբյանին: Վերջինս Արշալույս գյուղի ճանապարհահատվածում վարորդին ասել է «շնորհակալություն» ու իջել է ավտոբուսից: Արդեն Տարոնիկ գյուղից վերադառնալու ճանապարհին Գրիշա Մարտիրոսյանի ճանապարհը կտրել են ոստիկանները եւ հայտնել, որ իր վարած ավտոբուսից մարդ է ընկել ու մահացել: Հենց տեղում վարորդին ձերբակալել են, կատարվում է նախաքննություն:

Տեղեկացնենք, որ նշված երթուղին շահագործում է «Էջմիածնի ԲՈՒԱՏ» ԲԲԸ-ն, որը պատկանում է ԱԺ ՀՀԿ-ական պատգամավոր Հրանտ Գրիգորյանին:

«Էջմիածնի ԲՈՒԱՏ»-ը գյուղերը սպասարկում է հիմնականում «Պազ» մակնիշի ավտոբուսներով, որոնք հնամաշ են եւ անսարք: Հաճախ են այդ ավտոբուսները անսարքությունների պատճառով ուղեւորներին թողնում կես ճանապարհներին: Ավտոբուսներն այնքան հնամաշ են, որ նույնիսկ դռները չեն փակվում: