Փարաքար գյուղում գիպսի փոշու մրրիկ է: Խնդիրն այն է, որ գյուղի հարևանությամբ գործում են երկու հանքեր՝ գիպսի և քարի: Քամոտ եղանակին Փարաքարում փոշու փոթորիկ է բարձրանում, իրենց իսկ նկարահանած կադրերում պարզ երևում է, թե փոշին ինչ բարձրության է հասնում:
Բայց սա փարաքարցիների միակ ողբերգությունը չէ... Այցելեցի մոտ 10 բնակարան և աչքովս համոզվեցի, որ պատերը մի քանի ամսվա ընթացքում ձեռք են բերել մեծ ճաքեր և խոռոչներ:

Բնակիչները համոզված են, որ դա հանքի պայթեցումներից է... Ինչպես նշում է փարաքարցի տիկիններից մեկը, երբ որ հանքում պայթեցնում են, իրենց տները դղրդում են: Չնայած որ սովորել են ամենշաբաթյա պայթեցումներին, բայց չեն կարողանում հարմարվել փոշու անտանելի քանակության հետ, ամեն օր տուն են մաքրում, ծառերն ու բույսերը լվանում:

Այստեղ բողոքների տարափ է համարյա ամեն տանը: Փարաքարցիների մի մասը հիշատակում է իր նոր արած թանկարժեք բնակարանի վերանորոգում, մյուսը՝ երեխայի ալերգիան թողած, որն, ի դեպ, հավաստում են՝ փոշուց է, շտապում է իր գոմի կրկնակի հաստության պատի ճաքերը ցույց տալու:

Խնդրի առնչությամբ հղվել է նամակ 400 ստորագրությամբ մարզպետին, վարչապետին, ինչպես նաև նախագահին, բայց ոչ պայթեցումներն են դադարել, ոչ՝ փոշին, և ոչ էլ ալերգիան: Այստեղ նոր ծնված երեխաներին չգիտեն որտեղ թաքցնեն: Մայրը պատմում է, որ երեխայի օրօրոցի վրայից ամեն օր փոշու մեծ շերտ է հեռացնում. «Եթե փոշին օրօրոցի վրա է, ապա նաև կարող է հայտնվել երեխայի թոքերում, մենք այս շոգին պատուհան չենք կարողանում բացել, փոշին մեզ խեղդում ա..»:

Ստեղծված իրավիճակի կապակցությամբ փարաքարցիները ցանկանում են բնապահպանության նախարարության, առողջապահության նախարարության, ինչպես նաև արտակարգ իրավիճակների նախարարության ուշադրությունը սևեռել սույն կարևոր խնդրի վրա: Ինչպես նաև ծանոթանալ այն փաստաթղթերին, որոնց վրա կա թույլտվություն այս երկու հանքերի շահագործման մասին:

Վերջերս փարաքարցիներին հավաստիացրել են, որ բնապահպանության նախարարությունն է պատասխանատու սույն արտադրության թույլտվության համար, և իրենք էլ հենց հաստատել են, որ ամեն ինչ նորմայի սահմաններում է, և ոչ մի վտանգ չի ներկայացնում նրանց առողջության և անվտանգության համար:

Հ.Գ.Նկարահանման ժամանակ համոզվեցի որ մի պապիկի տուն ուղակի փլուզման եզրին է, մեծ գերաներ էր տեղադրել տան հիմքում, որպեսզի պայթեցումների ժամանակ գոնե տատանումներց որոշ չափով զերծ պահի....

Թեհմինե Ենոքյան