HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Երեխաներ, որոնք շփման կարիք ունեն եւ երգում են անհոգ մանկության մասին (վիդեո)

Հենց մուտքի մոտ Աշոտը փաթաթվեց ոտքերիս, բաց չէր թողնում: Գլուխը շոյելուն պես ձեռքերս բռնեց, շատ ջերմ էր: Գրկեցի, փաթաթվեց ամուր: Երկար գրկիցս չէր ուզում իջնել:

Արդեն մի քանի սենյակներով էինք անցել, տարբեր երեխաներ տեսել` կույր, դաունիզմով հիվանդ, մտածեցի` երեւի Աշոտն էլ է կույր, շփման միջոցով է հաղորդակցվում: Դայակն ասաց, որ Աշոտը կույր չէ, նորմալ վարք ունի, բոլորին փաթաթվում է, հատկապես իգական սեռի ներկայացուցիչներին շատ է սիրում: Երեխաները պարզապես շփման կարիք ունեն եւ դժվարությամբ են բաժանվում հյուրերից:

Գյումրու «Երեխաների տուն» կոչվող մանկատունը նախատեսված է նորածիններից մինչեւ 6 տարեկան երեխաների համար: Երեխաների հիմնական մասը տառապում է կենտրոնական նյարդային համակարգի օրգանական եւ ֆունկցիոնալ ախտահարումներով: Երեւանից ուղեգիր ստացած երեխաների մոտ 80 տոկոսն արդեն ունի «բուժման ենթակա չէ» ախտորոշումը:

«Եթե մենք այս երեխաներին չխնամենք, նրանք չեն ապրի, յուրաքանչյուր կերակրման գործընթաց տեւում է 30 րոպե: Նրանք միայն հասկանում են սիրելը, քնքուշ խոսքը, բայց մտավոր կոնտակտի մեջ մտնել չեն կարող»,- մկանային կաթվածով տառապող երեխաների մասին ասում է բժշկուհի Դոնարա Հակոբյանը:

Մանկատան երեխաների գերակշիռ մասը երկու ծնող ունեցող երեխաներ են: Մանկատանը նրանք հայտնվել են ոչ թե ընտանիքի սոցիալական ծանր վիճակի, այլ հիվանդության պատճառով: «Այս երեխաների մտավորը ոչ Երեւանում, ոչ Մոսկվայում հնարավոր չէ փոխել»,- ասում է բժշկուհի Դոնարան:

Նրա խոսքերով` ծնողների մոտ 5 տոկոսն է այցելում երեխաներին, մի փոքր ավելին զանգահարում է` տեղեկանալու երեխայի վիճակի մասին: Ծնողները մեծամասամբ հրաժարվել են իրենց երեխաներից հենց հիվանդանոցում, եւ երեխաների ճակատագիրը պետությունն ամբողջությամբ մանկատան անձնակազմի հոգատարությանն է հանձնել:

«Երեխաները կերազեին նման պայմաններում ապրել Հայաստանում. լողացնում են օրը երեք անգամ, կերակրում են 4 անգամ, միսը միշտ կա, հյութերը, սնունդը նորմալ է, խաղալիքների պակաս եւս չունեն, օրվա մեջ նրանց հետ 3-4 մասնագետ կարող է աշխատել: Երեխաները միայն տան կարիք ունեն, ինչքան էլ որ տանք, մենք տան կարիքը չենք կարող բավարարել»,- ասում է վերականգնող ֆիզեոթերապիստ Էդուարդ Ալագյոզյանը, ում մանկատան երեխաները «պապա» են անվանում:

Է. Ալագյոզյանը պատմում է, որ ծնողները սկզբում այցելում են շաբաթը մեկ անգամ, այնուհետեւ` երեք ամիսը մեկ, հետո` տարին մեկ եւ վերջապես դադարեցնում են այցելությունները: «Հիմնական պատճառը երեխայի հիվանդությունն է, որ ծնողը լքել է նրան: Այսինքն` չեն ուզում տանը նման երեխաներ պահել, տվել են պետության խնամքին: Եթե ծնողները կարողանան պահել այս երեխաներին տանը եւ միաժամանակ տանեն հատուկ խնամքի կենտրոն, ավելի ճիշտ կլինի, քան տալ մանկատուն»,- կարծում է վերականգնող ֆիզեոթերապիստը:

Չնայած երաժշտության դաստիարակն էլ է ասում, որ ուշադրության պակաս չկա` դժգոհելու տեղ չունեն, տարբեր կազմակերպություններ, ուսանողներ, դասախոսներ, արտասահմանյան հյուրեր են գալիս երեխաներին տեսության, բայց բոլոր սենյակներ այցելելիս երեխաները դժվարությամբ են բաժանվում մեզնից:

Սայլակի վրա նստած Կարինեն նորմալ վարք ուներ, հասկանում ու խոսում էր, միակ խնդիրը ոտքերն էին: Նրան դուր եկավ նոթատետրս, սկսեց նկարել մեջը, չէր ուզում վերադարձնել, երբ ուզում էի մյուս սենյակ անցնել, լաց եղավ: Դայակները հանգստացրին. «էլի կգա, մի լացի: Մենք էլ քեզ մատիտներ կտանք»: Կարինեն արտասվելով «հաջող» էր ասում, բայց ուղեկցող հայացքը հարցնում էր` կգա՞:

Մանկատան բոլոր երեխաները չէ, որ մտավոր խնդիրներ ունեն: Կան նաեւ կույր, խուլ կամ միայն ֆիզիկական խնդիրներ ունեցող երեխաներ: Հենց այդպիսի եւ համեմատաբար առողջ, մտավոր ընդունակություններ ունեցող երեխաներից բաղկացած խումբը պատրաստվում էր հունիսի 1-ի` երեխաների միջազգային օրվան նվիրված հանդեսին:

Ժտպերես Լիլիթի ձայնն ամենաբարձրն էր հնչում երգչախմբում, շատ աշխույժ ու կայտառ էր երգում: Նա միայն ողնաշարի խնդիր ունի: Բժշկուհի Դոնարան ասում է, որ փոքրիկը նույնիսկ կարող է օգտակար լինել տանը: Եթե Լիլիթին ասեն` այս իրը բեր կամ տար, շատ արագ կանի: Կարող է նույնիսկ անկողինը հավաքել, բայց ծնողները չեն ուզում տուն տանել նրան:

Երգչախմբում էին նաեւ 7-ամյա Սամվելն ու Սվետան: Երկուսն էլ կույր են: Շատ վարժ արտասանում ու կատարում էին «Ինչ լավն ես դու, իմ մանկություն» երգը: Նրանց տարիքը գերազանցում է մանկատանը մնալու` սահմանված տարիքը: Վեց տարին լրացած երեխան այստեղից տեղափոխվում է Խարբերդի հատուկ մանկատուն: Սակայն դաստիարակները կարծում են, որ նրանք կարող են նաեւ կույրերի դպրոցում սովորել:

Մանկատանը նաեւ դիմածնոտային եւ ֆիզիկական այլ արատ ունեցող երեխաների համար բաժին կա: Էլենին դայակն անընդհատ գրկում է պահում, նրան նոր են վիրահատել, եւ փոքրիկն անընդհատ լաց է լինում ու անհանգիստ է, վիրահատած ծնոտը դեռ ցավում է: Իսկ 8 ամսական Սիլվան սպասում է իր վիրահատությանը: Նրա տարիքը դեռ չի համապատասխանում վիրահատության համար թույլատրելի տարիքին: Նա գայլի երախ եւ նապաստակի շրթունք ունի: Բայց մտավոր հետամնաց չէ եւ վիրահատությունից հետո կարող է առողջ ապրելակերպ վարել: Սիլվայից էլ, սակայն, ծնողները հրաժարվել են:

Երկու նորածին կա բաժանմունքում` հոդերի խնդիրներով, ծնվել են ծռաթաթությամբ, ծնկները խնդիրներ ունեն, հնարավոր է` չքայլեն:

Մանկատունը նորակառույց մասնաշենք ունի: Ինչպես հավաստիացրեց փոխտնօրեն Արթուր Մովսիսյանը, ոչնչի կարիք չունեն: Սակայն մեր այցելության ժամանակ մի քանի երեխայի տակաշորերը թաց էին: Դայակներն ասացին, որ տակդիրներ («փամփերսներ») չունեն: Քիչ անց փոխտնօրենն էլ խոստովանեց, որ երբեմն տակդիրները չեն բավարարում: Դրանք հիմնականում բարերարների նվիրաբերած գումարներով են ձեռք բերում, կամ հենց բարերարներն են տրամադրում:

Գյումրու «Երեխաների տունը» Հայաստանի «թանկարժեք» մանկատներից է համարվում` յուրաքանչյուր երեխայի համար պետական բյուջեից տրամադրվում է 2.7 մլն դրամ: Մանկատունն ունի նաեւ հովանավորներ` ինչպես անհատ բարերարներ, այնպես էլ միջազգային կազմակերպություններ: Օրինակ` այս տարի ամերիկյան մի կազմակերպության ծրագրով դիմածնոտային վիրահատության է ենթարկվել մանկատան 4 երեխա:

Գյումրու այս մանկատանը 128 երեխա է ապրում, երեխաներ, որոնք շփման կարիք ունեն եւ երգում են «անհոգ» մանկության մասին...

Մեկնաբանություններ (3)

Sevak
ha iroq halala es mardkanc et erexeqic iranc cnoxnern en hrajarvle bayc es mardik hogatarutyamb pahum en
Tigran
halala cez vor karaq senc erexeqi het ashxateq . ed amen mard chi kara inc million el tayin es chi kara ashxatel
tigranuhi
mi amgam inc baxt e vichakvel linel ajd mankatany ev es ughaki hiacac em ashkhatoghneri ereghaneri nkatmamb unecac hogatar verabermunqov

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter