Երկուշաբթի, 20 օգոստոսի

Գեներալը, տենդերն ու գոմեշները



ՀՀ զինված ուժերի գլխավոր շտաբի պետի տեղակալ, գեներալ-լեյտենանտ Արշալույս Փայտյանի պաշտոնանկությունը մամուլը կապեց ԶՈւ-ում տեղ գտած մի շարք չարաշահումներին:

Փայտյանը բանակի սպառազինության եւ գնումների համակարգի պատասխանատուն էր: «168 ժամ»-ը գրեց, որ բանակին տավարի միս մատակարարելու մրցույթում հաղթող է ճանաչվել գեներալի հետ համագործակցող մի ընկերություն, որն իրականում ոչ թե տավարի, այլ Բրազիլիայից ներկրված գոմեշի մսի ժամկետանց բրիկետներ է տրամադրել զինված ուժերին: Իրականությունը, ըստ թերթի, պարզվել է միայն լաբորատոր հետազոտության արդյունքում:

Փայտյանը նախագահի հրամանագրով պաշտոնանկ արվեց սեպտեմբերի 6-ին: Պաշտոնապես ոչ մի պատճառ չնշվեց: Սակայն ամսի 15-ին կառավարությունում հրավիրած խորհրդակցության ժամանակ Սերժ Սարգսյանն անդրադարձավ պետական գնումների գործընթացին՝ շեշտելով թե պատվիրատուների, թե շահած կազմակերպությունների մեծածավալ թերացումներն ու անբարեխիղճ գործելակերպը: Նախագահը զարմանք հայտնեց, թե ինչ է նշանակում, որ գլխավոր շտաբի պետի տեղակալը մեծ գումար է պարտք վերցնում մատակարարից: Բնականաբար, ասվածը գեներալ Փայտյանի մասին էր, սակայն թե ինչ պարտքի մասին է խոսքը, չնշվեց:

Գոմեշի մսի վերաբերյալ աղմուկը բարձրացավ այս տարվա մայիս-հունիս ամիսներին, երբ «Բանակում անարդարություններին՝ ոչ» նախաձեռնությունը հայտարարեց ԼՂՀ պաշտպանության բանակում դեռ 2011-ին հայտնաբերված հնդկական գոմեշի մսի մասին: Հունիսին հարուցվեց քրգործ՝ առանձնապես խոշոր չափերով խարդախության հիմքով (պատժվում է ազատազրկմամբ՝ չորսից ութ տարի ժամկետով՝ գույքի բռնագրավմամբ կամ առանց դրա): Նախաքննությունը վարում է ՊՆ քննչական ծառայության հատկապես կարեւոր գործերով քննչական բաժինը: Ծառայության հասարակայնության հետ կապերի ավագ սպա Մերի Սարգսյանը վերջերս «Հետքին» հայտնեց. «Քրեական գործով կատարվում է բազմակողմանի, լրիվ քննություն: Եվ ոչ միայն այն ուղղությամբ, ինչի կապակցությամբ (ստուգումների ժամանակ հայտնաբերված խախտումների) քրեական գործը հարուցվել էր, այլ նաեւ, օրինակ, հարկերից ու պարտադիր այլ վճարումներից խուսափելու: Համապատասխան փորձաքննություններ են նշանակված: Այս պահի դրությամբ ուրիշ տվյալներ նախաքննության մարմինը նպատակահարմար չի գտնում տրամադրել»: Մ. Սարգսյանը հրաժարվեց նշել՝ արդյոք կան գործով մեղադրյալներ կամ կասկածյալներ:

Հարկերից ու այլ պարտադիր վճարումներից խուսափելն, ըստ էության, կապ ունի Սերժ Սարգսյանի վերոնշյալ հայտարարության հետ:

Ժամանակին նամակ էինք գրել նաեւ նախարար Սեյրան Օհանյանին: Հարցրել էինք, թե վերջին 2,5 տարում ՊՆ-ին ո՞ր ընկերություններից է տավարի միս գնել, ի՞նչ քանակով եւ արժեքով, ինչպիսի՞ միս է եղել դա: Այս հարցերին նախարարությունը պատասխանել էր մեկ պարբերությամբ. «2010-2011 թթ. ՊԲ զորամասերին մատակարարվել է եւ սառեցված, եւ թարմ մսամթերք: Մատակարարված մսամթերքի քանակի եւ այլ մանրամասների մասին տեղեկություններ չենք կարող տրամադրել, քանի որ դրանք պարունակում են որոշակի գաղտնիություն»: Դեռ այն ժամանակ էինք զարմանք հայտնել, որ եթե մսի քանակն ու արժեքը ռազմական գաղտնիքի որոշակի տարրեր պարունակում են, տենդերում հաղթած կազմակերպության անունը չի կարող գաղտնիք համարվել: ՊՆ-ն բազմաթիվ մրցույթների պատվիրատու է հանդիսանում, եւ «Գնումների աջակցման կենտրոն» ՊՈԱԿ-ը համացանցում տեղադրում է ինֆորմացիա թե գների, թե քանակի, թե ընկերությունների անունների մասին: ՊՆ-ին նամակ ուղարկելու միակ պատճառն այն էր, որ տավարի մսի մրցույթի վերաբերյալ տեղեկություն համացանցում չէինք գտել:   

Հատկանշական է, որ եթե նախկինում խոսվում էր հնդկական գոմեշի մասին, ապա հիմա շրջանառվում է բրազիլական արտադրանքի անունը: Համաշխարհային շուկայում բրազիլական գոմեշի մսի մեկ տոննան 800-1000 դոլարով ավելի թանկ է, քան հնդկական գոմեշինը: Եվ եթե հայաստանյան ներկրողները հնդկական արտոնագրված ընկերություններից տոննան ձեռք են բերում 2150-2300 դոլարով, ապա պետք է ենթադրել, որ բրազիլականի տոննան կարժենա միջինը 3125 դոլար:

Ըստ ՀՀ ազգային վիճակագրական ծառայության՝ 2011-ին Հայաստանը միս եւ մսից ենթամթերք ամենաշատը ներկրել է ԱՄՆ-ից՝ 26.204 տոննա (ավելի քան 27 մլն դոլար արժողությամբ), երկրորդ տեղում Բրազիլիան է՝ 10.404 տոննա (շուրջ 19 մլն դոլարի), երրորդը՝ Հնդկաստանը՝ 9.867 տոննա (մոտ 23 մլն դոլարի):  

Ինչպես հայտնի է, գոմեշի միսն ավելի էժան է, քան տավարինը: Առաջինի մեջ ավելի քիչ են կալորիաները, ճարպերն ու խոլեստերինը, փոխարենը շատ են սպիտակուցները, հանքանյութերն ու վիտամինները (տես աղյուսակը): Միաժամանակ գոմեշի միսն ավելի պինդ է ու դժվարամարս, կարծիք կա, որ շոգ եղանակին դրա օգտագործումը մարդու մոտ կարող է ջերմության բարձրացում ու դիսկոմֆորտ առաջացնել: 


Գլխավոր էջ


Տես նաև՝

ավելին



Մեկնաբանություններ (3)
1. Հրաչյա 19:19 - 18 սեպտեմբերի, 2012
Եթե Հայաստան գոմեշի միսը ներկրվում է 3125 դոլարով, ապա ստացվում է որ մեկ կիլոգրամի գինը առանց տեղափոխման ծախսի մոտավորապես այնքան է, որքան մեր աղքատ գյուղերում ապրող մարդիկ կիլոգրամ տավարի թարմ մսի համար ստանում են վարավաճառողներից: Ահա քեզ գյուղատնտեսություն զարգացնելու հսկայական միջոց, գյողերում մարդիկ տրտնջում են, որ չկան տեղեր տանեն հստակ գնով վաճառեն, սա լեռնային ու նախալեռնային գյուղերը զարգացնելու բավականին մեծ ռեսուրս է:
2. artkhach@hotmail.com20:09 - 18 սեպտեմբերի, 2012
this is for the ignorant people in Armenia, the above proves one more time that the buffalo meat is healthier than the beef(cow) meat. Less fat, less cholesterol, less calories, more minerals, more vitamins. the hwole world knows, except in Armenia.
3. "qaj Andranik"18:46 - 24 սեպտեմբերի, 2012
Կախել գեներալինԷ
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Արխիվ