«Մեր բանակի վիճակը անկախության 21 տարիների ընթացքում բավականին լավացել է, այն շատ դրական կողմեր ունի, որոնք, սակայն, չեն երևում հասարակության շրջանում մեծ արձագանք գտնող բացասական երևույթների ֆոնի վրա»,- անկախության 21-ամյակի նախօրեին հայտարարեց արցախյան ազատամարտի հերոս Արկադի Տեր-Թադևոսյանը` հայտնի Կոմանդոսը:

Բացասական կողմերի գոյության պատճառն, ըստ Կոմանդոսի, մարդկային գործոնի առկայություն է, և այժմ աշխատանքներ են տարվում զինվոր-զինվոր, զինվոր-սպա փոխհարաբերությունները բարելավվելու ուղղությամբ, օգտագործվում է արտասահմանյան մասնագետների փորձը:

Դրական փոփոխությունների մասին խոսելիս նա նշեց զինվորների և նրանց հարազատների միջև կապն ապահովելու համար զորամասներին տրամադրված բջջային հեռախոսները, պատժախցերի վերացումը, որոնց պետք է փոխարինեն կարգապահական գումարտակները: