Ախթալայի լեռնահարստացման կոմբինատի արտադրական պոչանքները ամբարող Ճոճկանի պոչամբարի ջրի շրջանառու համակարգի թունավոր պոչանքները  շարունակվում են լցվել Ախթալա գետակ, որտեղից էլ թափվում են Դեբեդ  գետը:  Այս մասին «Հետքը» ահազանգել է դեռ սեպտեմբերի 25-ի իր հրապարակմամբ:  Հոկտեմբերի  24-ին «Հետքի» և Ալավերդու Օրհուս կենտրոնի համակարգող Անուշ Էվոյանի` հոսքերի վայր կատարած շրջայցից պարզվեց, որ թեև թերթի ահազանգից  անցել է ուղիղ մեկ ամիս, սակայն  ԼՀԿ-ի տնօրինության կողմից Ճոճկանի պոչամբարի շրջանառու ջրի համակարգը վերականգնելու և արտադրական վտանգավոր պոչանքների հոսքերը Դեբեդ կանխելու ուղղությամբ ոչինչ չի ձեռնարկվել: Պոչանքները նույն առատությամբ լցվում են Ախթալա գետակ, այնտեղից էլ` Դեբեդ:

Պոչանքները Դեբեդ գետը  լցնելու փաստի նկատմամբ շարունակում են աչք փակել ՀՀ բնապահպանության և ՀՀ  արտակարգ իրավիճակների նախարարությունները: Անտերության պայմաններում  էլ ԼՀԿ-ի տնօրինությունը մեծ հաջողությամբ խուսափում է Ճոճկանի պոչամբարի ջրի շրջանառու համակարգը վերականգնելու համար ներդրումներ կատարելուց:  Հիշեցնենք, որ դեռ  սեպտեմբերի 23-ին Ախթալայի լեռնահարստացման կոմբինատի գլխավոր տնօրենի տեղակալ Օրբելի Թարմինյանը «Հետքին» հայտնել էր, որ ընկերությունում մշակվել է  բնապահպանական լուրջ ծրագիր. «Այդ խողովակից  պոչանքային հոսքերի կանխումը մտած է այդ ծրագրի մեջ, մենք թերթին լրացուցիչ կհաղորդենք, թե ինչ ժամկետում ենք  պարտավորվում ավարտել պոչանքային հոսքերի վերացումը»:  Իհարկե, կոմբինատի տնօրինությունը և պարոն Թարմինյանը  անցած մեկ ամսվա ընթացքում «Հետքին» վտանգավոր հոսքերը կանխելու մասին  ոչինչ չեն տեղեկացրել:  Հոկտեմբերի 24-ին «Հետքը» Օ.Թարմինյանից  խնդրեց նոր մեկնաբանություն. «Ջրի շրջանառու համակարգի խողովակների նախագծողները երեկ` հոկտեմբերի 23-ին  են  եղել կոմբինատում, դրանք մի քանի օրից իրենց լուծումները կստանան»: 

«Հետքը» փորձեց պարզաբանումներ ստանալ Լոռու  մարզի բնապահպանական տեսչությունից: Հոկտեմբերի 25-ին տեսչության պետ  Արմեն Լապլաջյանը հեռախոսով մեր հարցմանը պատասխանեց. «Ձեր հոդվածները կարդալուց հետո  գնում ենք լեռնահարստացման կոմբինատ, իրենք պատասխանում են, որ պոչամբարի ջրի շրջանառու համակարգը գործում է: Էս վերջերում էլ  մեր տղան է գնացել, իրենք  ասել են, որ գործում է համակարգը»:  Պատրաստակամություն հայտնեցինք Լոռու մարզի բնապահպանական տեսչության փորձագետներին և վտանգավոր պոչանքային  հոսքերի վայր ուղեկցելու համար, որին նա չարձագանքեց. մոտ 3 հազար ազգաբնակչություն ունեցող Ախթալա քաղաքի  շրջակա միջավայրը և Դեբեդ գետը թունավոր պոչանքներով աղտոտող հոսքերի վայրը սեփական աչքերով տեսնելու պատրաստակամություն չցուցաբերեց նաև պրն Լապլաջյանը: 

Ակնհայտ էր, որ բնապահպանական Լոռու մարզային տեսչության պետը անտեղյակ էր ձևանում ակնհայտ պոչանքային հոսքերից: Հարց է առաջանում` այս դեպքում  ինչ նպատակով է  առանց այն էլ սուղ  պետբյուջեից  կառավարությունը ֆինանսավորվում և պահում ՀՀ բնապահպանության նախարարությանը, երբ վերջինիս  պատասխանատուները աչք են փակում բնության ու մարդկանց առողջության նկատմամբ հանքարդյունաբերողների հանցագործ ոտնձգությունների նկատմամբ, ավելին, համագործայցում են նրանց հետ:  

Հ.Գ. Հոկտեմբերի 24-ին «Հետքը» Ախթալայի  Ս.  Մարիամ Աստվածածին  եկեղեցու հարևանությամբ  գտվող  ռեկուլտիվացված պոչամբարում  լուսանկարեց ԼՀԿ-ի կողմից  կատարված ծառատունկը, որի չորացած տնկիները ընդամենը  բողոք էին առ  Աստված`  բնության դեմ կատարվող դաժան  ոտնձգությունների համար:  Հիշեցնենք, որ ռեկուլտիվացված` թեք դիքով այս պոչամբարը տեղավորված է ուղիղ Ախթալա գետակի  ափին և  հորդառատ անձրևներից գետի վարարումների դեպքում լուրջ սպառնալիքներ կան պոչամբարի հոսելու և Դեբեդ գետը լցվելու համար: