Հողերը չեն մշակում, հացն էլ թանկանում է
Լոռու մարզում գյուղատնտեսական նշանակության հողերում հացահատիկի մշակությունը գրեթե չի կայանում:
Մարզպետարանի գյուղատնտեսության և բնապահպանության վարչության պետ Գրիգոր Հակոբյանը «Հետքին» հայտնեց, որ մարզի 42 հազար հա վարելահողերից այս տարի 6000 հա ցորենի աշնանացան է կատարվել: «Աշնանացանի համար մենք կառավարությունից 294 տոննա ցորենի սերմացու ենք ստացել, որն էլ բաշխել ենք մարզի գյուղերին»,- ասաց Գ.Հակոբյանը: Աշնանցանը շարունակվելու է մինչև նոյեմբերի 10-ը, եւ պրն Հակոբյանը ակնկալում է, որ աշնանացանի քանակը դեռ կավելանա:
2011 թ.-ին մարզում ցորենի աշնանացան է կատարվել 8700 հա-ի վրա: Գյուղատնտեսության վարչությանը պետը, այնուամենայնիվ, քիչ էր համարում մարզում կատարաված ցորենի աշնանացանի քանակը:
2012 թ.-ին, նախորդ տարվա համեմատությամբ, Լոռու մարզում ցորենի արտադրությունը նույնպես նվազել է: Անցյալ տարի ամբողջ մարզում 22,6 հազար տոննա ցորեն է արտադրվել, այս տարի այն կազմել է 20,5 հազար տոննա: Գրիգոր Հակոբյանը դա բացատրեց այս տարվա անբարենպաստ եղանակով: Ինչպիսի պատճառաբանություններ էլ բերվեն, իրողությունն այն է, որ մարզի 42 հազար հա վերելահողերից 36 հազար հա վարելահողեր հավուր պատշաճի չեն օգտագործվում ոչ միայն ցորենի, այլ մյուս գյուղատնտեսական մշակաբույսերի արտադրության նպատակով:
Ալավերդիում «Հացի գործարան» ՓԲԸ-ի արտադրած 600 գրամ մատնաքաշի և քարի հացի գները վերջին 3 ամսվա ընթացքում 190 դրամից հասել են 230 դրամի, նույն համամասնությամբ աճել են նաև մյուս հացատեսակների գները: Վերջին ամիսներին Ալավերդիում միայն հացը չէ, որ թանկացել է: Թանկացել են նաև մյուս հացամթերքները: «Իհարկե, դա իմ ընտանեկան բյուջեի վրա ազդում է: Հինգ անձից է կազմված ընտանիքս, օրը 2-3 հաց ենք առնում: Տղաս չի աշխատում, ես և հարսս ենք աշխատում, մի 100 հազար դրամ է մեր ընտանեկան բյուջեն»,- ասում է ալավերդցի Լյուդմիլա Ստեփանյանը: «Հացի գործարան» ՓԲԸ-ի տնօրեն Կամո Վարոսյանը բացատրում է, որ հացի թանկացումը իրենց գործարանում պայմանավորված է ալյուրի թանկացումով:
Վերջին մի քանի ամիսներին հացը թանկացել է նաև Վանաձորում: «400 գրամ հացը 200 դրամով եմ գնում: Իհարկե, թանկացումները մեզ համար տհաճ են, բայց, դրա դեմը ոչ ոք չի կարող առնել, բնական է, մենք հարմարվող ժողովուրդ ենք»,- ասում է վանաձորցի, մասնագիտությամբ հաշվապահ Մարգարիտա Գևորգյանը: Հացի գների թանկացման մասին վրդովմունք հայտնեց վանաձորցի գեղանկարիչ Գևորգ Առաքելյանը. «Կատաղում ենք, ջղայնանում ենք, բայց ինչ արած: Ասում են ` Ռուսաստանից են բերում, ալյուրը թանկացել ա, Կանադայից են բերում ` թանկացել ա, Հեռավոր Արևելքից են բերում` թանկացել ա: Դրա համար էլ խեղճ ժողովուրդը ինչ անի»: Ըստ Գևորգ Առաքելյանին՝ հացի թանկացման հետ ամեն ինչ է թանկանում:
Մարզում հացի գների բարձրացմանը կապված «Հետքը» փորձեց տեղեկանալ նաև Լոռու մարզպետի տեղակալ Արսեն Դարբինյանի տեսակետին. «Դա միջազգային գին է»,- ասաց մարզպետի տեղակալը: Վերջինս գտնում էր, որ մարզում արտադրված ցորենի պաշարները, ըստ վիճակագրական տվյալների, կարող են բավարարել մարզի բնակչության 20 տոկոսին: «Մենք էնքան ցանքատարածություն չունենք, որ կարողանանք էդքան ցորեն աճեցնել և կարողանանք ժողովրդին ապահովել»,- ասաց Ա.Դարբինյանը: Մարզպետի տեղակալին հիշեցրինք Օձունի մոտ 1200 հա անմշակ վարելահողերի մասին: «Դե, որովհետև գյուղացիները չեն ուզում աշխատել»,- պատճառաբանեց նա:
Քննարկե՞լ է արդյոք Լոռու մարզպետարանը մարզում ցորենի արտադրության և հացի ու հացամթերքների ակնհայտ թանկացման խնդիրը: Հարցին ի պատասխան՝ Արսեն Դարբինյանը նախ գտավ, որ դա կարող է քննարկել Շաբոյանի մրցակցային հանձնաժողովը, ապա հավելեց. «Մարզխորհրդի նիստ նախ պետք է դեկտեմբերին լինի, եթե դա լինի միայն մեր մարզում, մարզպետը ոչ միայն կզբաղվի, այլ կհետաքրքրվի, բայց դա ամբողջ հանրապետությունով է»:
Մեկնաբանել