Այսօրվա մամուլի ասուլիսում գյուղատնտեսության փոխնախարար Ռոբերտ Մակարյան ասաց, որ անցյալ տարի գյուղացիական տնտեսություններին թյուրիմացության մեջ գցեցին, ինչի հետևանքով գյուղացիներն իրենց խաղողը պահեցին սառնարաններում՝ հետագայում թանկ վաճառելու ակնկալիքով:

«Բայց կա առաջարկի և պահանջարկի խնդիր: Հետո Արարատի մարզում կարծեմ 1000 տոննա հանձնեցին վերամշակող կազմակերպություններին 100 կամ 120 դրամով: Այսինքն՝ գյուղացին ևս պետք է կարողանա հաշվել իր ակնկալվող եկամուտը, որպեսզի սառնարաններում շատ խաղող չդնի»,- ասաց Ռոբերտ Մակարյանը:

Նրա խոսքով՝ այժմ գյուղատնտեսության նախարարության ներկայացուցիչները մարզերում բացատրական աշխատանքներ են կատարում գյուղացիների հետ, որպեսզի վերջինները հասկանան, թե ինչ քանակի գյուղմթերք կարող են դնել սառնարաններում և իրացնել ձմռանը, և ինչ քանակի՝ վաճառել հիմա:

«Անցած տարի կարտոֆիլի հետ կապված էլի թյուրիմացության մեջ գցեցին, ասեցին՝ «կարտոֆիլը դառնալու է 400 դրամ, պահեք»: Հետո տեսաք՝ ինչ եղավ»,- ասաց գյուղատնտեսության փոխնախարարը:

«Ո՞վ գցեց թյուրիմացության մեջ» հարցին Ռոբերտ Մակարյանը պատասխանեց. «Ասել եմ՝ էդ հարցին չեմ ուզում անդրադառնալ»: