«Երբ ընկերներիս ցույց էի տալիս Գառնու «Քարերի սիմֆոնիայի» նկարները, նրանք զարմանում էին. այնքան էին հիացած այդ գեղեցկությամբ, որ չէին հավատում, թե այդ քարերը բնական են: Բոլորը ցանկանում էին գալ ու իրենց աչքով տեսնել այդ հրաշքը: Ցավոք, բնության այդ հուշարձանն այսօր վերածվում է Ջուղայի գերեզմանոցի: Պարբերաբար այնդտեղից թալանվում են վեցանկյուն ժայռաքարերը»,- նշում է իրանահայ բնապահպան-ակտիվիստ Սարմեն Շահիջանյանը:

Նա իր ընկերոջ հետ նկարահանել է, թե ինչպես են օրը ցերեկով ժայռից պոկում քարերը՝ դրանք հետագայում բեռնատարներով տեղափոխելու համար: Հիշեցնենք, որ Գառնու «Քարերի սիմֆոնիան» 2008 թվականից կառավարության որոշմամբ համարվում է բնության հուշարձան և հատուկ պահպանվող տարածք:

Բնապահպան ակտիվիստ Սամվել Հովհաննիսյանը նշում է, որ իրենք դեռ հոկտեմբերի 22-ին այս հարցով դիմել էին Գառնու գյուղապետին, ով իր հերթին խոստացել էր տեղյակ պահել ոստիկանությանը:

Մեկ ամսից ավելի ժամանակ է անցել և նոյեմբերի 26-ին բնապահպանները նորից ականատես են եղել նույն պատկերին և այս անգամ արդեն նկարահանել են ժայռի ավիրման պրոցեսը:

Երբ կրկին հանդիպել են Գառնու գյուղապետին, նա չի հերքել, որ «Քարերի սիմֆոնիան» գտնվում է Գառնու վարչական շրջանում, սակայն գյուղապետարանը չի կարող հսկողություն սահմանել 7 կմ շառավղով, դա բնապահպանության նախարարության պարտականությունն է:

Բնապահպանները համոզված են, որ ցանկության դեպքում հնարավոր է այդ տարածքում հսկողություն իրականացնել, քանի որ «Քարերի սիմֆոնիայից» դուրս եկող երկու ավտոճանապարհից միայն մեկն են հսկում ոստիկանները, իսկ մյուսը դուրս է մնացել որևէ հսկողությունից:

Սարմեն Շահիջանյանի կարծիքով՝ «Քարերի սիմֆոնիան» ավելի շատ օգուտ կարող է բերել թե գառնեցիներին, թե ամբողջ Հայաստանին, եթե այն շահագործվի ոչ թե որպես քարի հանք, այլ որպես տուրիստական գոտի:

Լուս.՝ ձախից Սարմեն Շահիջանյան և Սամվել Հովհաննիսյան