Արցախի Վանք գյուղում գտնվող Գանձասարի վանական համալիրի պարսպի երեսպատման վերաբերյալ Արցախի թեմի պաշտոնական դիրքորոշումը հայտնի կլինի մի քանի օրից, երբ Արցախ վերադառնա թեմի առաջնորդ Պարգև արքեպիսկոպոս Մարտիրոսյանը: Այս մասին «Հետքի» հետ հեռախոսազրույցում հայտնեց Արցախի թեմի երիտասարդական ուղղության պատասխանատու, Արցախի երիտասարդական կազմակերպությունների Արցախի թեմին կից հոգևոր խորհրդի համակարգող Սամվել սարկավագ Մկրտչյանը:

2011թ. ամռանը, երբ արցախցի ռուսաստանաբնակ գործարար Լևոն Հայրապետյանը առաջին անգամ սկսեց երեսպատել միջնադարյան վանական համալիրի պարիսպը, Սամվել սարկավագն անձնամբ էր Պարգև Սրբազանին հայտնել այդ մասին: Իսկ 10-15 օր առաջ վերսկսված երեսպատման մասին Սամվել սարկավագը Պարգև Սրբազանին հայտնելու հնարավորություն չի ունեցել, քանի որ վերջինն ԱՄՆ-ում է եղել Հայաստան համահայկական հիմնադրամի հեռուստամարաթոնին մասնակցելու նպատակով, և նրա հեռախոսահամարները չեն աշխատել: Հիմա էլ Արցախի թեմի առաջնորդը Երևանում է:

Հարցին, թե Պարգև Սրբազանը այսքան օր անց դեռ տեղյակ չէ՞ վերսկսված երեսպատման մասին՝ Սամվել սարկավագը պատասխանեց. «Ես չեմ խոսել, չգիտեմ՝ ինքը տեղյակ է, թե՞ չէ: Երբ գա, իհարկե, բոլորս էլ ասելու ենք: Դա այնպիսի մի բան է, որ եթե դրանով հետաքրքրված եք, բնականաբար մենք էլ անտարբեր չենք կարող լինել: Եթե ուզում եք ավելի պաշտոնական դիրքորոշում, Սրբազանը երբ գա, մեր տեղեկատվական համակարգի պատասխանատուն դրա մասին ավելի լիազորված ու ավելի ինֆորմացված տարբերակը կտրամադրի բոլորին»:

«Հետքի» այն դիտարկմանը, որ մինչ թեմը դիրքորոշում հայտնի, Գանձասարի պարիսպը կարող է ամբողջությամբ երեսպատված-վերջացած լինել, Սամվել սարկավագն արձագանքեց. «Չեմ կարծում, որ էդպես»:

Սամվել սարկավագը շեշտեց, որ լիազորված չէ խնդրի վերաբերյալ որևէ բան ասել:

Գանձասարի վանքը ոչ միայն Արցախի, այլև ընդհանրապես հայկական ճարտարապետության գլուխգործոցներից է: 2011թ. ամռանը վանքի պարսպի երեսպատումը դադարեցվել էր Արցախի կառավարությանն առընթեր Զբոսաշրջության վարչության և ՀՀ մշակույթի նախարարության ջանքերով: