Գործարար Վլադիսլավ Մանգասարյանին սփյուռքահայ գործարար Էդմոն Խուդյանը մեղադրում է իրեն  թալանելու համար:  Էդմոն Խուդյանն իր հայտարարություններում բազմից նշել է, որ պետական այրերի  (մասնավորապես նշվում է Սերժ Սարգսյանի եղբոր՝ Լևոն Սարգսյանի անունը) մասնակցությամբ  կատարվել է  8.500.000 մլն դոլարի թալան:

Այսօրվա մամլո ասուլիսում mardik.am-ը ասուլիսի բանախոս, գործարար Վլադիսլավ Մանգասարյանից հետաքրքրվեց՝ ինչ հարաբերություններ ունի նա Սերժ Սարգսյանի եղբոր՝ Լևոն Սարգսյանի հետ: «Եթե հանդիպենք, կհամբուրվենք»,- մանրամասնեց  գործարարը՝ հավելելով, որ ինքը Լևոն Սարգսյանին ճանաչում է մինչև Սերժ Սարգսյանի նախագահ դառնալը: «Շատ լավ հարաբերությունների մեջ ենք, ընկերներ ենք, ամբողջ պատմությունների մեջ (նկատի ունի Խուդյանի հետ կապված պատմությունները - խմբ.), ցավում եմ, խայտառակ արեցի այդ մարդուն, բայց ինքն էլ իր մեղքն ունի»,- հայտարարեց  գործարարը:

Թե կոնկրետ որն է Լևոն Սարգսյանի մեղքը, գործարարի պարզաբանմամբ. «Հրանուշ Հակոբյանի մոտ տիեզերագնաց է գալիս, հետո խայտառակ ենք լինում, իսկ երբ Լևոն Սարգսյանի մոտ բերեցին Էդմոն Խուդյանին և ներկայացրին սփյուռքահայ, ոչ մեկը չասաց, որ սա տիեզերագնաց չէ, սա ուղղակի այլանդակ է»:

Սփյուռքահայ գործարար Էդմոն Խուդյանին ոչ ոք չի քցել, դա սուտ է. Վլադիսլավ Մանգասարյան

Գործարար Վլադիսլավ Մանգասարյանը և նրա փաստաբան Հակոբ Ճառոյանն այսօր խոսեցին սփյուռքահայ գործարար  Էդմոն Խուդյանի մեղադրանքների մասին:

Հիշեցնենք, որ սփյուռքահայ գործածարը  մեղադրում է մի քանի գործարարների իրեն թալանելու համար և պարբերաբար լրատվամիջոցներով ուշադրության կենտրոնում պահում խնդիրը:

Mardik.am-ի հարցին՝ ինչու հիմա գործարար Վլադիսլավ Մանգասարյանը որոշեց մամլո ասուլիսով հանդես գալ, գործարարը նախ նշեց, որ ակնկալում էր ավելի շատ լրատվամիջոցների ներկայություն, քանի որ «ժամանակ առ ժամանակ որոշ ԶԼՄ-ներ պատիվ են ունենում սենսացիոն մի լուր հրապարակելու (նկատի ունի Խուդյանի տարածած հաղորդագրությունները –խմբ.), ապա պատասխանելով  մեր հարցադրմանն ասաց, որ գործը դատարանում էր, սնանկության վարույթում էր, հետևաբար մամլո ասուլիսով հանդես գալը նպատակահարմար չէր:

Գործարարը հայտարարեց, որ սփյուռքահայ գործարարի այն հայտարարությունները, թե իրեն քցել են,  սուտ է: «Նման սուտ տարածողները  նպատակներ են հետապնդում,  որոնց վրա մենք սկզբից ուշադրություն  չէինք  դարձնում: Իսկ հիմա քանի որ չկան բնակարաններ, չկա բաժանելու բան, չկա բնակիչների ճակատագրի հետ կապված  որևէ խնդիր, փորձենք հրապարակել բոլոր նյութերը»,-մանրամասնեց պրն  Մանգասարյանը:

Պրն Մանգասարյանի տեղեկացմամբ`  2005 թ. Մաշտոցի 33 ա  հասցեում ինքը որոշում է բազմաֆունկցիոնալ շենք կառուցել: «Այդ ընթացքում անզգուշություն ունեցա հրավիրելու սփյուռքահայ գործարար Էդմոն Խուդյանին: Որոշ ժամանակ անց գործերը նորմալ գնալուց հետո մեր միջև տարաձայնություններ սկսվեցին»,- մանրամասնեց  գործարարը, ապա  սկսեց ներկայացնել իր կենսագրությունը, քանի որ իր մասին  մամուլում կցկտուր տեղեկություններ կան:

Բնականաբար, լրագրողները թույլ չտվեցին գործարարին մինչև վերջ ներկայացնել իր կենսագրականը, քանի որ դա գործի հետ ոչ մի առնչություն չունի:

Շարունակելով ներկայացնել  այս խճճված գործի մանրամասները՝ գործարարը հայտնեց, որ իրականում Խուդյանը ոչ թե ներդրում է արել, այլ տոկոսով փող է տվել: «Խուդյանը ցանկանում էր մասնակցել ոչ թե շենքի կառուցմանը, այլ  ուղղակի գումար աշխատել, իր փողը՝ մոտ 1 մլն 600.000 դոլարը, ամսական  9%-ով տրամադրելով, ընդ որում՝ բացի Խուդյանից ևս մի սիրիահայ գործարար Փառեն անունով էլ է տոկոսով փող տվել »,- ասաց պրն  Մանգասարյանը:

Որպեսզի սփյուռքահայ գործարարները վստահ լինեն, որ իրենց գումարները չեն կորչելու, Մանգասարյանի տեղեկացմամբ` նրանք  ցանկություն են հայտնում հողն իրենց անունով անել, այսինքն՝ դառնալ սեփականատեր: 2005-ին, սակայն, Փառեն անունով սիրիահայ գործարարը հրաժարվում է գործին մասնակցել, բայց պահանջում է իր ներդրած գումարի հասույթն  այն դեպքում, երբ պայմանագրով նախատեսված էր այն ստանալ մեկ տարի անց: «Էդպես ո՞նց կլինի»,-  վերհիշում է գործարարը՝ հավելելով, որ հետագայում  պարզվում է, թե այդ ամենը  Խուդյանի կազմակերպածն է:

Ինչևէ, Փառեն անունով սիրիահայ գործարարի  հրաժարվելուց հետո  գործի մեջ է մնում Խուդյանը, ով երկու հողակտորի համար վճարում է 1 մլն 600.000 դոլար:

Հարցին՝ բացի Մանգասարյանից, ով իրեն համարում է տուժող, ովքեր են  տուժել այս ամենից, գործարարի տեղեկացմամբ` բազմաֆունկցիոնալ շենքը կառուցվում է  « առանց դրսի փողերի, իմ  և իմ ընկերների միջոցով»:

2006-ին սփյուռքահայ գործածարը, օգտվելով առիթից, որ հողն իր անունով  է, դատի է տալիս Մանգասարյանին նրան իրավունքներից զրկելու համար (այդ ընթացքում Խուդյանն իր հասույթի մի մասն արդեն ստացել էր, իսկ շենքի 7 հարկն արդեն կառուցված էր): «Նա որոշեց հայտարարել, թե ինքը կառուցապատող է, քանի որ հողն իր անունով է: Այն ժամանակ ինձ ասում էին, որ կարող ենք նրան պատժել որպես  վաշխառու, բայց ես ասում եմ՝ նա սփյուռքահայ է, երկրորդ՝ փող է բերել դրսից: Ինչ իմանաս՝ դրսում ինչ է պայմանավորվել : Եթե ինձ նեղացնում են, պայքարում գնում եմ մինչև վերջ, համ էլ ես տղամարդ եմ, չէ> ,- հայտարարեց  գործարարը՝ հավելելով, որ ինքը չէր կարող իր ձեռնարկությունից  փող գողանալ, ինչպես հայտարարում է սփյուռքահայ գործարարը։

Գործարարի տեղեկացմամբ` այս պահի դրությամբ 76 քաղաքացի ստացել է   Մաշտոցի 33 ա  հասցեում կառուցված շենքի   բնակարանների վկայականները: « Ես 2007  թ. ապրիլին բաժանվում եմ իրենից (Խուդյանից-խմբ.) ասելով` դե հերիք ա: Դու ղեկավարի գործը: Էս դեպքում ոչ թե ես քեզ համար կաշխատեմ, այլ դու ինձ համար աշխատիր: Այդպես էլ եղել է մինչև 2007 հոկտեմբերի մեկը, երբ ինքն  ամբողջը պրավալ տվեց: Դրանից հետո որոշում ենք շենքը ներդնել Խուդյանի «

Գործարարի փաստաբան Հակոբ Ճառոյանն էլ հայտարարեց, որ ինքը պատրաստ է բանավիճել Էդմոն Խուդյանի  կամ նրա փաստաբանների հետ՝ հիմնավորելու, որ Էդմոն Խուդյանը կառուցապատող չէ, ինչպես ինքն  է հայտարարում,  և  նա ոչ մի ներդրում չի արել:  «Այս պահին 12 քաղաքացու հետ նա ունի ֆինանսական խնդիր: Այդ 12 հոգին ոչ բնակարան է ստացել, ոչ էլ հետ ստացել իրենց գումարները»,- եզրափակեց փաստաբանը:

mardik.am