HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Վրացական ընկերությունը շարունակում է եկամուտներ բերել դատավորին

Վերաքննիչ քաղաքացիական դատարանի դատավոր Տարոն Նազարյանը շարունակում է եկամուտներ ստանալ վրացական ընկերությանը տրամադրած փոխառության գումարից: Ուսումնասիրելով դատավորի 2011թ. գույքի ու եկամուտների հայտարարագիրը՝ պարզվեց, որ նշված տարում, բացի 5 մլն 899 հազար 362 դրամ աշխատավարձի եկամուտից, նա 62 հազար 462 վրացական լարի եկամուտ էլ ստացել է փոխառությունից ստացված տոկոսներից:

Դեռևս 2010թ. Տարոն Նազարյանն ինքն էր «Հետքին» տեղեկացրել, որ եկամուտներ է ստանում վրացական «Յունիմետ» ՍՊԸ-ին փոխառությամբ տրված 78.500 ԱՄՆ դոլարի դիմաց հաշվարկված տոկոսներից: Միայն 2008 թ. նշված ՍՊԸ-ից ստացված տոկոսները կազմել էին 9.294 դոլար: Դատավորը փոխառությունից եկամուտներ է ստանում մինչ օրս:

«Փոխառությունը ձեռնարկատիրական գործունեություն չէ, ո՞վ է ասում, որ դա ձեռնարկատիրություն է: Աշխատավարձից էլ եմ եկամուտ ստանում, ուրեմն դա ձեռնարկատիրությո՞ւն է: ՍՊԸ-ում ունեցած բաժնեմասը սեփականություն է, ոչ թե ձեռնարկատիրություն»,- բիզնեսով զբաղվելու վերաբերյալ մեր դիտարկմանը 2010-ին այսպես էր արձագանքել Տարոն Նազարյանը:

Ինչ վերաբերում է դրամական միջոցներին, ապա Տարոն Նազարյանը 2011թ. ունեցել է 36 մլն դրամ՝ նշված տարվա սկզբի 56 մլն դրամի փոխարեն, ինչպես նաև 50 հազար դոլար, որը հանձնված կամ վերադարձված փոխառություն է: Դատավորի կինը՝ Աստղիկ Նազարյանը, ունեցել է 782 հազար 852 դրամի աշխատավարձային եկամուտ: Նրա հաշվին եղել է 2 մլն 500 հազար դրամ:

Համեմատության համար նշենք, որ Տարոն Նազարյանը 2008թ. ունեցել է 219 հազար 465 դոլար և 3 մլն 747 հազար դրամ:

Մեկնաբանություններ (1)

Ruben
ev iharke

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter