Ռուբեն Հայրապետյան. «Բարոյական չեմ համարում Գագիկ Ծառուկյանի հայտարարությունը»
ԱԺ պատգամավոր, Հայաստանի Օլիմպիական կոմիտեի նախագահ Գագիկ Ծառուկյանը հայտարարել էր, որ հոկտեմբերի 14-ին չի մեկնելու Թուրքիա, Հայաստանի և մեր հարևան երկրի ֆուտբոլի ազգային հավաքականների մրցապայքարը դիտելու, քանի որ նախապես գիտի, որ մեր հավաքականը պարտվելու է:
Այս առնչությամբ այսօր հրավիրված ասուլիսի ժամանակ Հայաստանի Ֆուտբոլի ֆեդերացիայի (ՀՖՖ) նախագահ Ռուբեն Հայրապետյանն ասաց. «Օլիմպիական կոմիտեի նախագահը, երբ նման հայտարարություն է անում, իհարկե, դա շատ վատ է, դաժե բարոյական չէ, այն դեպքում, երբօլիմպիական ցիկլում է հանդես գալիս Հայաստանի երիտասարդական հավաքականը և Թուրքիա-Հայաստան խաղից մեկ օր առաջ խաղում էին 21 տարեկանների երիտասարդների հավաքականը, որն իր իսկ մրցաշարն էր, Գագիկ Ծառուկյանի մրցաշարում էր հանդես գալիս»:
Ռ. Հայրապետյանը հիշեց, որ Թուրքիայի Բուրսա քաղաքում բազմաթիվ հայ լրագրողներ հարևան 2 երկրների ազգային հավաքականների ֆուտբոլային խաղի ժամանակ, եռագույն դրոշները պարզած, երկրպագել ու աջակցել են մեր հավաքականին: Մինչդեռ, ըստ ՀՖՖ նախագահի, նույն այդ լրագրողներից ոչ ոք չէր մտածում, թե մերոնք Թուրքիայի հավաքականից ուժեղ են, բայց միևնույն ժամանակ «նրանք բոլորը հույս ունեին, որ մենք կհաղթենք»:
«Իսկ Գագիկ Ծառուկյանի նման արտահայտությունն ինձ շատ է զարմացնում: Ես հեչ բարոյական չեմ համարում նման բաները: Բուլղարացի Վանգա՞ն ա, ի՞նչ ա, որ կանխագուշակում ա` մենք հաղթելո՞ւ ենք, թե՞ պարտվելու: Ցանկալի կլիներ, այ, օրինակ, իրա հսկա մարմնով` մուսկուլներով բանով, գար ու ներկա լիներ էդ խաղին: Միգուցե ոգևորվեր մեր ազգային հավաքականը Վանուշ Խանամիրյանի նման: Էդ դեպքում մենք կունենայինք հաջողություն»,- եզրափակեց Ռուբեն Հայրապետյանը:
Մեկնաբանել