Սիրիահայ Ավետիս Կալայջյանին արդարացրել են
Նա մեղադրվում էր նախագահ Սերժ Սարգսյանի սպանության նախապատրաստության մեջ
Ավան և Նոր-Նորք համայնքների ընդհանուր իրավասության դատարանը, Արարատ Պետրոսյանի նախագահությամբ, նախօրեին հենց դատարանի դահլիճից ազատ է արձակել արդեն 8 ամիս կալանքի տակ գտնվող Ավետիս Կալայջյանին:
«Ինձ բաց թողեցին ապացույցների անբավարարության, իմ արարքներում հանցակազմի բացակայության հիմնավորմամբ: Հետևաբար, ապացուցվեց, որ ես քրեական հանցագործ չեմ. այսքան ժամանակ եղել եմ քաղբանտարկյալ»,- ասում է սիրիահայ Կալայջյանը:
2002 թ. նա հայրենադարձվել է Հայաստան, իսկ 2004-ին` անդամագրվել Հայաստանի Հանրապետական կուսակցությանը: Սակայն այս տարվա մարտին կուսակցությունից հրաժարվելու դիմում է գրել, որը, իբրև իրեղեն ապացույց, օրեր անց հայտնվել է նրա նկատմամբ հարուցված քրեական գործի նյութերում:
«Հրաժարվում եմ սույն ապազգային և հակացեղակրոն կուսակցությունից, որը շարունակում է բանտախցերում պահել հայ ազգի պարծանք ֆիդայի-ազատամարտիկներին, քաղաքական գործիչներին, սփյուռքահայերին և հայաստանցիներին` շարունակելով մնալ աշխարհի ամենաբռնակալ երկրների սանդղակում, խայտառակելով Հայաստանն ու հայ ազգը»,- դիմումում նշել է Կալայջյանը:
Ըստ ապրիլի 6-ին նրա դեմ հարուցված քրեական գործի նյութերի, վերջինս ծրագրել էր « …ապրիլի 12-ին` «Սուրբ Զատիկ» եկեղեցական տոնի ժամանակ, իրականացնել մայր Աթոռ Սուրբ Էջմիածին մայր տաճար այցելած նախագահ Ս. Սարգսյանի և ՀՀ պետական ու քաղաքական այլ բարձրաստիճան գործիչների սպանությունը»:
Գործի հիմքում դրված էր Մասիս Բաղդասարյանի և Ժիրայր Մկրտումյանի մեղադրական ցուցմունքները:
«Այս երկու գլխավոր վկաներն առեղծվածային պայմաններում անհետացան, թեև հանրապետությունից չբացակայելու համար քննիչին ստորագրություն էին տվել,- մանրամասնում է Կալայջյանը: – Դատարանն այդպես էլ չկարողացավ նրանց լսել: Նույնիսկ բերման ենթարկելու որոշում կայացրեց, բայց չներկայացան: Դատարանում հայտարարվեց, թե իբր Մասիս Բաղդասարյանը Ռուսաստանում է, իսկ Ժիրայր Մկրտումյանը` Արցախում»:
Ավետիս Կալայջյանի խոսքերով` երկրի ղեկավարության պատվերով հարուցված «այս շինծու և սարքովի քրեական գործի համար» ինքն Ազգային անվտանգության ծառայության 3 աշխատակիցների (բաժնի պետի` կոչումով գնդապետ, վերջինիս տեղակալ փոխգնդապետի և ավագ քննիչ մայորի) դեմ հաղորդում է տվել Գլխավոր դատախազություն:
«Անունները դեռևս չեմ հրապարակում: Բայց շուտով բոլորի համար էլ ամեն ինչ պարզ կլինի»,- ասում է Ավետիս Կալայջյանը:
Մեկնաբանել