Իշխանությունների մտածելակերպն Արզումանյանին հասու չէ, քանի որ «ինքը ավազակ չէ»
Նախկին արտգործնախարար, հայտնի «Յոթի գործով» դատապարտված Ալեքսանդր Արզումանյանը, անդրադառնալով Նիկոլ Փաշինյանին 7 տարով ազատազրկելու դատավճռին, ասում է, թե այս ամենը 2008 թ. նախագահական ընտրություններից հետո սկիզբ առած «վհուկների որսի, աննախադեպ բեսպրիդելի, քաղաքական հետապնդումների» շարունակությունն է, որն ամենևին էլ կապված չէ Մարտի 1-ի իրադարձությունների հետ:
Այսօր «Իրավունք դե ֆակտո» ակումբի հյուրը լինելով` Արզումանյանը հիշեցրեց, որ քրեական գործը, որով ինքը և իմ ընկերները դատապարտվել են, Ազգային անվտանգության ծառայությունում հարուցվել է 2008 թ. փետրվարի 24-ին` Մնացական Մարությանի ստորագրությամբ:
«Սա գալիս է ապացուցելու, որ, քաղաքական նկատառումներով, իշխանությունները հանձնարարել են ընտրությունները կեղծելուց հետո բողոքի դեպքում ձերբակալել և քրեական հենտապնդման ենթարկել բոլոր այս կամ այն չափով աչքի ընկնող քաղաքական գործիչներին: Այնպես որ, Մարտի 1-ը դրա հետ որևէ կապ չունի»,- ասում է Արզումանյանը և հավելում, որ «Մարտի 1-ի սպանդից հետո իշխանությունն այն կոծկելու, իրական մեղավորներին չբացահայտելու համար ուղղակի այդ ամբողջը դարձրեց շիլափլավ և կապեց մեկը մյուսի հետ»:
«Բացարձակապես բացակայում է արդարադատությունն այս երկրում, չկա անկախ դատարան, և խոսել, թե ինչ փչեց տվյալ դեպքում դատավոր Մնացական Մարտիրոսյանի խելքին, որ 1 տարի ավելացրեց (մեղադրողը միջնորդել է Փաշինյանին դատապարտել 6, սակայն դատարանը նրա համար պատիժ նշանակեց 7 տարվա ազատազրկում – հեղ. ), ես չգիտեմ: Պետք է հարցնել իրեն հանձնարարություն տվողներին: Իսկ հանձնարարությունը, որ տրվում է ամենաբարձր մակարդակից, դա ակնհայտ է»,- ասում է նախկին արտգործնախարարը:
Նրա խոսքերով` Փաշինյանի դատավճռի պարագայում իր դերն է խաղացել նաև այն հանգամանքը, որ «Նիկոլի հանդեպ կա հատուկ ընդգծված չարակամ, բացասական մոտեցում»:
«Ինձ համար դժվար է անբարոյական մարդկանց մտքի ծալքերին հետևել և նրանց հոգեբանության մեջ մտնել: Ես այդպես չեմ դաստիարակվել, այդպիսին չեմ էությամբ, և ինձ համար անհասկանալի է այդ օտար մտածելակերպը, այդ թշնամանքի ակունքները: Նման հարցեր մի տվեք, թե ի՞նչ է մտածում այս կամ այն ավազակապետը. ես ավազակապետության մաս չեմ կազմել, ավազակ չեմ, չեմ կարող հասկանալ»,- եզրափակեց Ալեքսանդր Արզումանյանը:
Մեկնաբանել