Այսօր Վերաքննիչ քաղաքացիական դատարանում նշանակված էր «Չորրորդ իշխանություն» թերթի հրատարակիչ «Օգոստոս» գործակալության և «Կողմանակի անձանց Մ» ՍՊԸ-ի բողոքի քննության առաջին դատական նիստն ընդդեմ «Գինդ» տպարանի: Թեև նիստի մասին պատշաճ ծանուցվել էին բոլոր կողմերը, դատավարությանը չէին ներկայացել «Գինդ» տպարանի և «Կողմնակի անձանց Մ» ՍՊԸ-ի ներկայացուցիչները:

«Օգոստոս» գործակալության ներկայացուցիչ Էդգար Հովհաննիսյանն ասաց, որ կողմերի հետ կապված որևէ հարց չունի և չառարկեց բողոքի քննությունն անցկացնել նրանց բացակայությամբ: Սակայն դատարանը նշեց, որ կողմերին հարցեր ունի տալու, հետևաբար  որոշեց վերաքննիչ բողոքի քննությունը հետաձգել:

Հիշեցնենք, որ Կենտրոն և Նորք-Մարաշ վարչական շրջանների ընդհանուր իրավասության դատարանը, Գագիկ Խանդանյանի նախագահությամբ, «Գինդ» տպարանի հայցն ընդդեմ «ՉԻ» օրաթերթի բավարարել էր մասնակի: Համաձայն վճռի` «Օգոստոս» գործակալությունը 2.6 մլն դրամ գումարի չափով պարտքը` տույժերի հետ միասին, պետք է վճարեր տպարանին:

Մինչև վճռի կատարումը, այսինքն` գումարի վճարումը, դատավոր Գագիկ Խանդանյանն անփոփոխ է թողել նույն դատարանի կողմիցն մինչ այդ ընդունված` թերթի տպագրությունն արգելելու մասին որոշումը: «Չորրորդ իշխանություն» օրաթերթի տպագրությունն արգելելուց հետո այդ պարտավորությունը ստանձնել էր «Կողմնակի անձանց Մ» ՍՊԸ-ն` վերանվանելով օրաթերթը` «Չորրորդ ինքնիշխանություն»: