Թուրքիայի սահմանից 500 մետր հեռավորության վրա գտնվող Մարգարա գյուղի տղամարդիկ սպասում են արեւի դուրս գալուն, որպեսզի տներից դուրս գան փողոց: Նման օրերին համայնքապետարանի շենքից մի քանի տղամարդիկ սեղան են տանում դուրս, դնում հենց փողոցի մեջտեղում ու սկսում թղթախաղով հագեցնել իրենց առօրյան: Գյուղը գործող մշակույթի տուն չունի, թեեւ հսկայական շենքը հուշում է, որ նախկինում Մարգարայում մշակութային կյանք եղել է: Շենքը խիստ վերանորոգման կարիք ունի, պատուհաններին ապակի չկա, իսկ տանիքը գրեթե ամբողջությամբ քայքայված է:

Երբ այցելեցինք Մարգարա, մոտ մեկ տասնյակ տղամարդիկ թղթախաղի սեղանի շուրրջ էին, իսկ մի քանիսն էլ հավաքվել էին փողոցի հակառակ մայթին ու պատմում էին «սովետական տարիների» իրենց ջահելությունից:

Ավետիք պապը պատմում էր, թե տարիներ առաջ հայ-վրացական սահմանը խախտելու համար ինչպես է ոստիկանների կողմից ծեծ կերել ու հայտնվել կապիկի վանդակում, իսկ մյուսներն էլ հոգոց հանելով ասում էին՝ «երանի այդ տարիներին»:

Գյուղացիների հետ փորձեցինք խոսել ներկայիս Հայաստանի ու նախագահական ընտրությունների մասին, սակայն նրանք այդքան էլ հետաքրքրված չէին ընտրություններով: Շատերն ասում էին, որ որեւէ թեկնածուի հետ հույս չեն կապում, այդ թվում՝ գործող նախագահի, սակայն եղածների մեջ նախագահի պաշտոնում տեսնում են հենց Սերժ Սարգսյանին: Նրանց զգալի մասը չգիտեին նաեւ, թե ովքեր են նախագահի թեկնածուները:

Գյուղացիները գլոբալ առումով որեւէ հուս չունեին, թե առաջիկա տարիներին որեւէ առաջընթաց կլինի: Նրանց ասելով՝ ընդհակառակը՝ տարեց տարի իրենց վիճակն ավելի է վատանում. գյուղացին չի կարողանում հող մշակել եւ Մարգարայի հողերի մեծ մասը չմշակելու պատճառով վերածվել է «ջունգլիի»: Հավաքվածներից ամենաակտիվը Ավետիք պապն էր: Մյուսները կաշկանդված էին, քանի որ նրանց շարքերում կանգնած էր նաեւ համայնքապետարանի աշխատակիցներից մեկը:

Ավետիք պապն ասաց, որ Մարգարան ունի մոտ 300 հա վարելահող, սակայն մշակվում է դրանցից միայն 30-40 հա-ն, մնացածը ամայի է:

Գյուղացիները հորդորում էին իշխանություններին վերանայել գյուղացու նկատմամբ վարվող քաղաքականությունը, նվազեցնել ոռոգման ջրի սակագին, քանի որ իրենց ջուրը գալիս է Արաքսից եւ ինքնահոս եղանակով, ինչպես նաեւ վերանորոգել Էջմիածին-Մարգարա ավտոճանապարհը, քանի որ գյուղի ավտոմեքենաներն ամբողջությամբ շարքից դուրս են եկել, իսկ հիվանդներին չեն կարողանում ժամանակին հասցնել հիվանդանոց:

Մանրամասները՝ տեսանյութում: