Գյումրիի բնակչուհի Հ. Մուրադյանին Թուրքայի Տրապիզոն քաղաքում սեռական թրաֆիքինգի ենթարկելու մեղադրանքով Շիրակի մարզի առաջին ատյանի դատարանում ընթացող դատական մի քանի նիստեր՝ նշանակված 2012 թ. նոյեմբեր-դեկտեմբեր ամիսներին, հետաձգվել էին ամբաստանյալներից Սուսաննա Մ.-ի փաստաբան Մելանյա Սարգսյանի հիվանդության պատճառով: 2013 թ. հունվարի 15-ի նիստը եւս չկայացավ, քանի որ ամբաստանյալ Սուսաննա Մ.-ն հայտարարեց, որ ցանկանում է փոխել փաստաբանին:

Դատավարական գործընթացի ավարտական փուլում դատապաշտպան փոխելու ամբաստանյալի ցանկությունն առնվազն տարօրինակ էր: Դատավոր Էդ. Մանուկյանը Սուսաննա Մ.-ին առաջարկեց հիմնավորել միջնորդությունը: Ամբաստանյալն էլ ասաց, որ վերջին շրջանում որոշակի տարաձայնություններ են ունեցել փաստաբան Մելանյա Սարգսյանի հետ, բացի այդ՝ նրա երկարատեւ բացակայությունն ու նիստերին չներկայանալը կարող է, ի վերջո, ձախողել իր պաշտպանությունը:

«Աղջիկս ուրիշ փաստաբան է գտել, ուզում եմ, որ նա պաշտպանի իմ շահերը»,- հայտարարեց ամբաստանյալը:

Երեւանից Գյումրի հասած փաստաբան Կարապետ Աղաջանյանը հաստատեց Սուսաննայի ասածները՝ նշելով, որ ընդամենը մեկ ժամ առաջ է տեղ հասել, ամբաստանյալի հետ առայժմ չունի պայմանագիր եւ գործին ծանոթանալու համար իրեն առնվազն 4 օր ժամանակ է պետք: Դատավոր Էդ. Մանուկյան դատական նիստը հետաձգեց հունվարի 16-ին՝ պահանջելով, որպեսզի ներկա լինի նաեւ Սուսաննա Մ.-ի նախկին փաստաբանը:

Հունվարի 16-ի դատական նիստի մասնակիցների կազմը մնաց անփոփող: Ամբաստանյալներից Սուսաննա Մ.-ն, ի վերջո, որոշում էր ընդունել դատական գործընթացն ավարտել հին փաստաբանի պաշտպանության ներքո: Քանի որ գործն արդեն ավարտական փուլում էր, դատարանը պատրաստվում էր այս նիստին լսել կողմերի մեղադրական եւ պաշտպանական ճառերը, սակայն փաստաբան Մելանյա Սարգսյանը հանդես եկավ նախ միջնորդությամբ:

Նա դատարանին միջնորդեց կարճել իր պաշտպանյալի նկատմամբ հարուցված քրեական գործը եւ դադարեցնել քրեական հետապնդումը: Միջնորդությունը բավական երկարաշունչ էր եւ ինչպես նկատեց նախագահող դատավորը, այն ավելի շատ հիշեցնում էր պաշտպանական ճառ:

Մինչ քննարկվում էր հարցը, թե փաստաբանի ներկայացրածը միջնորդություն է, թե պաշտպանական ճառ, կտրուկ վատացավ ամբաստանյալներից Սուսաննա Մ.-ի ինքնազգացողությունը: Հարկ եղավ կես ժամ ընդմիջում հայտարարել եւ շտապբուժօգնություն հրավիրել դատարան:

Պարզվեց՝ բարձրացել էր Սուսաննայի արյան ճնշումը: Թեպետ բուժքույրը ներարկում կատարեց, սակայն տեսնելով, որ հիվանդի վիճակը չի կարգավորվում՝ առաջարկեց նրան հիվանդանոց տեղափոխել:

Դատական նիստը հետաձգվեց հունվարի 30-ին:

Առաջին լուսանկարում՝ ամբաստանյալն ու նրա պաշտպան Մ. Սարգսյանը