HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Նարեկ Ալեքսանյան

«Կուզենայի հավատալ Իվանիշվիլիի անկեղծությանը». Վահե Սարգսյան

«Միտք» վերլուծական կենտրոնի փորձագետ, պատմաբան Վահե Սարգսյանի դիտարկմամբ, Վրաստանի վարչապետ Բիձինա Իվանիշվիլիի այցը Հայաստան նոր տիպի հարաբերությունների մեկնարկ է խորհրդանշում երկու երկրների համար:

«Կուզենայի հավատալ Իվանիշվիլիի անկեղծությանը և նրա կողմից արված հայտարություններին: Բայց ամեն դեպքում պետք է հաշվի առնել մի շարք դրական և բացասական գործոններ, որոնք գոյություն ունեն անկախ վարչապետի կամքից»,- նշեց Վ.Սարգսյանը:

Բացասականների թվում առաջնայինը, ըստ փորձագետի, վրաց ուղղափառ եկեղեցու չափազանց մեծ ազդեցությունն է վրացական մշակույթի, տնտեսության ու հատկապես քաղաքականության վրա: Այդ ազդեցության բացասական հետևանքները զգում են առաջին հերթին Վրաստանում բնակվող այլ ազգերը, մասնավորապես ոչ ուղղափառ քրիստոնյաները՝ հայերը: Սակայն, ի տարբերություն Սահակաշվիլի ժամանակների, այժմ Ջավախքի, Թբիլիսիի և Վրաստանի այլ տարածքներում ապրող հայերի վրա այս առումով ազատություն է իջել, մշակութային հալածանքները բացակայում են:

Մյուս բացասական գործոնը վրաց՝ քարթվելական ժողովրդի մոնոէթնիկ բնույթն է, ինչը, ըստ պատմաբան Վահե Սարգսյանի, բնական է ցանկացած փոքր երկրի համար, սակայն կարող է վնասել դրա ներսում բնակվող այլ ազգերի ներկայացուցիչներին, որոնց փորձում են վրացականացնել՝ ձուլելով և սեփականացնելով վերջիններիս մշակույթը:

Դրական գործոնների թվում Վահե Սարգսյանը նշեց Վրաստանի նոր կառավարության միտումը՝ ուղղված Ռուսատանի հետ հարաբերությունների կարգավորմանը: Դա բխում է նաև մեր շահերից, քանի որ այդպիսով հակակշիռ է ստեղծվում թուրք-ադրբեջանական էքսպանսիային, որի ազդեցությունը վերջին տարիներին խորանում էր Վրաստանում: Չափազանց կարևոր կլինի այս դեպքում նաև Աբխազիայի տարածքով անցնող երկաթգծի վերաբացումը, որը լուրջ այլընտրանք է, և տնտեսական տեսանկնյունից բխում է մեր և Վրաստանի շահերից:

Գնահատելով իրավիճակը՝ փորձագետն առանձնացրեց մի կարևոր գործոն ևս. Վրաստանում դեռևս նախագահ է Միխայիլ Սահակաշվիլին, և պատկերն ավելի լավ կուրվագծվի, երբ ավարտվի նրա նախագահության ժամկետը:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter