Ոստիկանությունը չի կարողանում բացահայտել Ալավերդիի գողության դեպքերը
Այսօր` ժամը 9:30-ին Ալավերդիում գրանցվել է հերթական գողության փորձը: Ալավերդու Սարահարթ թաղամասի 1/15 շենքի 2-րդ հարկում տեղավորված «Իրիս-ստոմ» ՍՊԸ–ի բուժքույր Սիլվա Պապոյանը, երբ բացել է ատամնաբուժարանի դուռը, նկատել է, որ ամեն ինչ խառնված է. «Միջանցքում գտնվող պահարաններից թափված էին հիվանդների ամբողջ անկետաները, խառնած էին պահարանների բոլոր դարակները: Էլ առաջ չգնացի, հասկացա, որ մարդ է մտել ատամնաբուժարան»:
Վերջինս անմիջապես զանգահարում է ՍՊԸ-ի սեփականատեր, ատամնաբույժ Աստղիկ Խաչատրյանին, ով էլ կատարվածի մասին տեղեկացրել է ոստիկանության Թումանյանի բաժնին: Սիլվա Պապոյանը ասաց, որ ատամնաբուժարանի դեղորայքի պահոցը և բժշկական գործիքները գողերին չի հետաքրքրել, դրանք մնացել են անշարժ և անվնաս:Ոստիկանության Թումանյանի բաժնի քրեական հետախուզության բաժանմունքի պետ Սարգիս Երիցյանը «Հետքին» հայտնեց, որ դեպքի մասին դեռևս չի կարող որևէ տեղեկատվություն հայտնել. «Դեռ չենք կարողանում կողմնորոշվել, որովհետև ուրիշ մուտք չկա, դուռը և լուսամուտները փակ են: Հնարավոր է` գողերը ունեցել են դռան բանալի»,-ասաց Սարգիս Երիցյանը:
Ըստ քրեական հետախուզության բաժանմունքի պետի` չի բացառվում, որ գողերը ատամնաբուժարանում փնտրել են թմրադեղ և փող: Սարգիս Երիցյանը նաև ասաց, որ գողության հետքերը բացահայտելու համար, պետք է փորձագետներ հրավիրվեն Վանաձորից:
«Եկա տեսա ամբողջ դարակները քանդված են, բազկաթոռը վնասված, բայց կարևոր է, որ ոչինչ չեն տարել: Բայց այս վախի մթնոլորտը որքա՞ն պետք է տևի: Մենք օգտագործում ենք միայն լիդոկային և անալգին տեղային ցավազրկող դեղամիջոցները: Թմրամոլները լավ գիտեն իրենց ինչ է հարկավոր, հազիվ թե նրանք մեզ մոտ թմրադեղեր որոնեին»,- ասաց Աստղիկ Խաչատրյանը:
«Իրիս-ստոմ» ՍՊԸ-ի հարևանությամբ բնակվող բնակիչները հայտնեցին, որ հանգստյան երկու օրերին որևէ աղմուկ չեն լսել: Նրանց կարծիքով, ատամնաբուժարանի դուռը բացվել է անաղմուկ, հավանաբար բանալիով: Ալավերդիում վերջին ամիսներին պարբերաբար կրկնվող գողությունները ունեն նույն ձեռագիրը: Այստեղ գողերը լուսամուտներ ու դռներ չեն ջարդում, բնակարաններ և հիմնարկություններ մտնում են աննկատ և անաղմուկ: Այս ամենը վերջին ամիսներին բնակչության մոտ խուճապ է առաջացրել:
Մեկնաբանել