Միջադեպ Ներքին Դվինում. պոկել են Հրանտ Բագրատյանի շտաբի պաստառներն ու նկարները
Այսօր պոկել են նախագահի թեկնածու Հրանտ Բագրատյանի՝ Արարատի մարզի Ներքին Դվին գյուղում գտնվող շտաբի վրա փակցված պաստառներն ու նկարները: Այս մասին «Հետքին» հայտնեց Բագրատյանի նախընտրական շտաբի հանրային կապերի պատասխանատու Կարինե Հարությունյանը՝ դժվարանալով կոնկրետ նշել, թե որ ժամին է եղել դեպքը:
Կարինե Հարությունյանը նաև տեղեկություններ չուներ այն մասին, թե արդյոք մարդկանց նկատմամբ ևս ոտնձգություններ եղե՞լ են:
«Այս պահի տեղեկություններով՝ պաստառներն ու նկարները պոկել է գյուղապետի տեղակալը»,- ասաց Կարինե Հարությունյանը:
Նրա խոսքով՝ շտաբի անդամները դիմել են ոստիկանություն, և Արարատի ոստիկանապետը հանձնարարել է պոկված պաստառներն ու նկարները վերականգնել:
Այս պահին Հրանտ Բագրատյանը Ներքին Դվինի շտաբում է: Նա և իր թիմը ընտրողների հետ Եղեգնաձորում, Սիսիանում տեղի ունեցած հանդիպումներից հետո Երևան վերադառնալու ճանապարհին էին, երբ ստացել են դեպքի մասին ահազանգը և փոխել երթուղին՝ գնացել Ներքին Դվին:
«Հուսով եմ՝ 1 ժամից այստեղ կլինեն, և մենք ավելի շատ մանրամասներ կունենանք դեպքի վերաբերյալ»,- ասաց Կարինե Հարությունյանը:
Մեկնաբանություններ (1)
Մեկնաբանել