Սոցիալական ծառայության տեսուչները քաղաքացիներին հորդորում են քվեարկել Սերժ Սարգսյանի օգտին
Սոցիալական ծառայության Աջափնյակի տարածքային գործակալության տեսուչները իրենց սպասարկող տարածքների բնակիչների շրջանում աշխատանքային ժամերին քարոզչություն են իրականացնում: Տեսուչները քաղաքացիներին հորդորում են փետրվարի 18-ի նախագահական ընտրությունների ժամանակ իրենց ձայնը տալ նախագահի ՀՀԿ-ական թեկնածու, գործող նախագահ Սերժ Սարգսյանին: Քաղաքացիներից մեկը, որի անունը չենք հրապարակում հետագա խնդիրներից խուսափելու համար, տեղեկացրեց, որ Աջափնյակի տեսուչներից մեկը իրեն եւս ուղղորդել է, որ ընտրությունների ժամանակ իր ձայնը տա Սերժ Սարգսյանին:
Երբ քաղաքացիները ըմբոստանում են, տեսուչները խեղճացած ասում են, որ Սերժ Սարգսյանին ընտրելու հրահանգն իրենց տրվել է «վերեւներից»:
Արգելվում է նախընտրական քարոզչություն կատարել եւ ցանկացած բնույթի քարոզչական նյութ տարածել պետական եւ տեղական ինքնակառավարման մարմիններին, ինչպես նաեւ պետական եւ համայնքային ծառայողներին, ուսումնական հաստատությունների մանկավարժական կազմի աշխատողներին` իրենց լիազորություններն իրականացնելիս: ՀՀ Ընտրական օրենսգիրք, հոդված 18, 6-րդ կետ |
Սոցիալական ծառայության Աջափնյակի տարածքային գործակալության տնօրեն Հռիփսիկ Սարգսյանը «Հետքի» հետ զրույցում ասաց, որ քաղաքացիները ճիշտ չեն ասում: Ըստ Հ. Սարգսյանի` քաղաքացիներից մեկը այդ նույն դժգոհությամբ իրեն բանավոր դիմել է, եւ պարզվել է, որ տեսուչը քարոզչություն չի իրականացրել:
«Ես չգիտեմ, թե ինչ շանտաժ է գնում, բայց ես խիստ հրահանգել եմ տեսուչներին, որ քարոզչություն չիրականացնեն: Բացի այդ՝ մենք լավ գիտենք, որ իրավունք չունենք մասնակցել քարոզարշավին: Նման բան չկա, հանգիստ եղեք»,- ասաց Հռիփսիկ Սարգսյանը:
Տարածքային գործակալության տնօրենը նշեց, որ նախընտրական շրջանում իրենք միշտ բախվել են նմանատիպ խնդիրների հետ, օրինակ` խորհրդարանական ընտրությունների ժամանակ էլ իրենց մեղադրել են ԲՀԿ-ի օգտին աշխատելու մեջ:
Մեկնաբանել