Փետրվարի 13-ին լրանում է նախագահի թեկնածու Անդրիաս Ղուկասյանի հացադուլի 24-րդ օրը: Այսօր՝ լրագրողների հետ հանդիպման ժանանակ, թեկնածուի շտաբի համակարգող Արմեն Գրիգորյանն ասաց, որ Անդրիաս Ղուկասյանն այսուհետև սահմանափակում է իր շփումը լրագրողների հետ, որպեսզի խնայի ուժերը: Ստորև ներկայացվում է Արմեն Գրիգորյանի և լրագրողների հարցազրույցը:

-Պարոն Գրիգորյան, այս առավոտ այցելել եք Անդրիաս Ղուկասյանին: Ինչպիսի՞ն է վիճակը այս պահին:

-Անդրիաս Ղուկասյանի որոշումը մնում է նույնը. նա չի տեղափոխվելու հիվանդանոց, շարունակելու է հացադուլը հացադուլի վայրում: Երևի կշարունակի մինչև փետրվարի 18 կամ 19 ներառյալ: Եթե անելանելի վիճակ չստեղծվի, առողջության հետ ինչ-որ բարդություն չստեղծվի, (որ արդեն նա հնարավորություն չունենա շարունակելու), նա շարունակելու է:

-Դուք ուզում եք ասել՝ մինչև գիտակցության կորուստը շարունակելո՞ւ է հացադուլը: Եթե թեկնածուն հրաժարվում է հիվանդանոցային հետազոտություններից, գուցե առողջական լուրջ խնդիրներ արդեն առաջացել են, բայց դուք տեղյակ չեք:

-Բացի պետության տրամադրած բժիշկներից՝ նա մեր բժիշկների վերահսկողության տակ է, ու նա հետևում է իր բժիշկների տված խորհուրդներին: Իր իրավիճակը՝ որպես հացադուլավորի, բժիշկները նորմալ են գնահատում: Շեղումներ կան, բայց պետք է հաշվի առնենք, որ այդ շեղումները հացադուլի հետ կապված են և իր կյանքին վտանգ այս պահին չեն սպառնում: Այդ իսկ պատճառով նա շարունակում է:

-Ընտրության օրը Անդրիաս Ղուկասյանը մնալո՞ւ է հացադուլի վայրում, գնալո՞ւ է քվեարկության:

-Դեռ որոշում չի կայացրել, բայց ամենայն հավանականությամբ, կմնա տեղում, չի գնա:

-Հացադուլի թափանցիկությունը պահպանելու առումով ճի՞շտ եք համարում, որ նախընտրել եք ձեր մասնավոր բժիշկների արած վերջին անալիզների արդյունքները հրապարակել:

-Վերջինը եղել է 2 տարբերակով: Մի տարբերակը տրամադրվել է մեր բժիշկներին, իսկ մյուսը առողջապահության նախարարությանը կից հիվանդանոցում իրենք են այդ ամենը անցկացրել: Առողջապահության նախարարությունը հայտարարել է, որ անալիզի արդյունքում կան շեղումներ: Մենք կատարում ենք մերը, բայց նաև թափանցիկության համար տրամադրում ենք, որ պետությունը նույնը կատարի:

-Առողջապահության փոխնախարարն ասել է, որ իրենց տրամադրվել է ընդամենը անալիզի պատասխանը՝ արդեն վերլուծված տարբերակով: Այսինքն՝ իրենք որևէ անալիզ չեն արել: Իրականում ի՞նչ է եղել:

-Անալիզի 2 օրինակ է եղել: Մեկը մենք ենք պահել, մյուսը տրամադրել ենք իրենց: Իրենք իրենց կից ինչ-որ բժշկական կենտրոնում անցկացրել են անալիզը, ու իրենք դրա պատասխաններն են ստացել: Մենք մեր պատասխանները իրենց չենք տրամադրել: Մենք ունենք մեր պատասխանները:

-Տեսակետ հնչեց, որ Անդրիաս Ղուկասյանը հրաժարվել է առողջապահության նախարարության տրամադրած բուժօգնությունից, որովհետև չի վստահում նրանց: Ինչո՞ւ չի վստահում:

-Վստահել-չվստահելու համար մի շատ պարզ օրինակ ասեմ: Պետական բժիշկները՝ շտապ բժշկական օգնությունը, որ այնտեղ է գտնվում, այցելում են, չափում են նրա ճնշումը, ցույց տալիս, ասենք օրինակ, 80/60 կամ 80/50: Մենք չափում ենք, ցույց է տալիս՝ 110/70 կամ 110/80: Այդպիսի տատանումներ են լինում, ու մեզ մոտ հարցեր են առաջանում:

-Այսինքն՝ առողջապահության նախարարությունն ավելի՞ է բարդացնում իրավիճակը, քան է: Միտո՞ւմ եք նկատում:

-Ես ընդամենը ինֆորմացիան եմ ասում՝ ինչ իրավիճակ է: Ես չեմ կարող ասել՝ նրանք ինչ նպատակ ունեն, ինչի համար են դա անում: Միտում չենք նկատում, այլ սկսում ենք չվստահել: Այդ իսկ պատճառով մենք ունենք մեր բժիշկները, մենք կոնսուլտացիաները հիմնականում անցկացնում ենք նրանց հետ, քննարկում ենք մեր գործողությունները: Այս պահին մեր բժիշկների գնահատականով՝ առողջությանը ինչ-որ անդառնալի վնաս դեռևս չի հասցվել:

-Դուք ասացիք, որ ձեր բժիշկները և առողջապահությա նախարարության բժիշկները ճնշումը չափելուց հետո տարբեր արդյունքներ են արձանագրում: Իսկ անալիզների պարագայում ձեր բժիշկների և նախարարության բժիշկների ներկայացրած արդյունքներում տարբերություն եղե՞լ է:

-Մենք իրենց անալիզի տվյալները մանրամասն չունենք, մեզ չեն տրամադրել: Իրենք ընդհանուր ասում են՝ «շեղումներ կան»: Մեզ մոտ էլ շեղումներ ցույց է տալիս:

-Մտավախություն չկա՞, որ Անդրիաս Ղուկասյանի վիճակն այնքան կվատանա, որ կստեղծի անհաղթահարելի խոչընդոտ, և ընտրությունները 2 շաբաթով կհետաձգվեն:

-Իմ կարծիքով, նման իրավիճակ չի ստեղծվի: Պետք է նաև հաշվի առնել, որ Սահմանադրությամբ մինչև ամսի տասն է այդ անհաղթահարելի խոչընդոտը ստեղծվում, որ ընտրությունները հետաձգվեն:

-Պարույր Հայրիկյանը հայտարարեց, որ ընտրությունները հետաձգելու պահանջով իր դիմումը Սահմանադրական դատարանից հետ վերցնելը կապված էր նրան, որ Անդրիաս Ղուկասյանը, իր խոսքերով ասած, չմահանա: Դուք ինչպե՞ս եք վերաբերվում դրան:

-Անդրիաս Ղուկասյանը պատրաստ էր շարունակելու իր պայքարը, նույնիսկ եթե ընտրությունները հետաձգվեն: Մինչ հայտարարությունը Պարույր Հայրիկյանը եկել էր Անդրիաս Ղուկասյանի մոտ, միասնական թեկնածուի մասին նամակը հանձնել, իսկ առողջության մասին որևիցե բան ինքը չի ասել: Եթե դա էր իր նպատակը, կարող էր դա քննարկել Անդրիաս Ղուկասյանի հետ, բայց ինքը դա չի քննարկել, ինքը քննարկել է միասնական թեկնածուի հարցը:

-Պարոն Գրիգորյան, արդեն քարոզարշավն ավարտվում է: Ճի՞շտ է, որ բոլոր թեկնածուներն այցելեցին Անդրիաս Ղուկասյանին՝ բացի Հանրապետականի թեկնածուից:

-Եթե ես չեմ սխալվում, նախագահի թեկնածուներից Բագրատյանն էլ չի այցելել:

-Քանի՞ դիտորդ է այցելել, ո՞ր կազմակերպությունից:

-«Ընտրությունների վերահսկողության միջազգային կենտրոն» է կոչվում: Միջազգային կազմակերպության դիտորդական առաքելություն է իրականացնում:

-Իսկ դիտորդական առաքելություն իրականացնող տեղական կազմակերպություններից դիտորդներ ձեզ այցելե՞լ են, որ իրենց զեկույցներում դա ներառեն:

-Չէ:

-Վերջին անգամ քննադատություն հնչեց ԵԱՀԿ ԺՀՄԻԳ-ի զեկույցի վերաբերյալ: Փորձե՞լ եք հանդիպում կազմակերպել դիտորդների հետ, ձեր մտահոգությունները իրենց հայտնել:

-Մինչ ընտրությունները սկսելը մենք հանդիպել ենք, Անդրիասը մանրամասն բացատրել է՝ ինչ գործողություններ է ցանկանում կատարել, և իր պահանջներն է ներկայացրել: Կոնկրետ ԺՀՄԻԳ-ի կողմից այց չի եղել, բայց միջազգային դիտորդները նրան այցելել են և քննարկել են հարցեր:

-Քաղաքացիական շարժում ստեղծելու քայլեր էիք անում: Ի՞նչ արձագանքներ եք ստացել շարքային քաղաքացիներից: Միջազգային ի՞նչ կազմակերպություններից ի՞նչ արձագանքներ ունեք:

-Այցելում են մարդիկ, առաջարկում են, որ միանան իր գործողություններին, որոնք Անդերասը նպատակ ունի շարունակելու փետրվարի 18-ից հետո: Այդ պահին տարբեր քաղաքացիներ են այցելում: Նույնիսկ նրան այցելում են կուսակցության ներկայացուցիչներ, իրենց զորակցությունն են հայտնում, ողջունում են պայքարը:

Իսկ միջազգային կազմակերպություններից որևիցե այց չի եղել, ու նրանց հետ որևիցե բան չի քննարկվել: Ամերիկայի դեսպանատնից ավելի շուտ այցելել էին, Անդրիաս Ղուկասյանը իր մոտեցումներն է ներկայացրել, որ որևիցե միջազգային կազմակերպություն կամ դեսպանատուն չպետք է այս գործողություններին միջամտի, սա ներքին պայքար է, ու մենք մեր ռեսուրսների ու ներուժի շրջանակներում ենք պայքարը շարունակելու:

-Դուք ասացիք, որ ձերը ներքին պայքար է, և չեք ակնկալում միջազգային կառույցների կոչը: Այդ դեպքում ինչո՞ւ երբ Անդրիաս Ղուկասյանը սկսում էր իր հացադուլը, պահանջներից մեկն էլ այն էր, որ միջազգային դիտորդները հեռանան Հայաստանից ու չդիտարկեն ընտրությունները:

-Քանի որ միջազգային դիտորդները հենց ներքին գործերի մեջ դեր ունեն, ինչպես նաև երբ իրենք ընտրությունները ճանաչում են միջազգային ստանդարտներին համապատասխանող կամ գրեթե համապատասխանող, իրենք լիազորում են իշխանություններին բռնություն կիրառելու, ինչպես 2008-ին եղավ: Իրենք մասնակցում են շինծու ընտրություններին, ու իրենք մի գործոն են, որը կարողանում է շինծու ընտրություններին աջակից դառնալ: Այդ իսկ պատճառով միջազգային դիտորդներին դուրս հրավիրելը ևս ներքին խնդրի լուծում է, ոչ թե արտաքին ինչ-որ աջակցություն ստանալ է:

-Փետրվարի 18-ից հետո ի՞նչ եք անելու:

-Հիմա ռազմավարությունն ենք քննարկում: Պետք է ամբողջացնենք կոնտակտային ցուցակը, ստացած արձագանքները: Մենք արձագանքներ ենք ստացել մարդկանցից, որոնք այցելել են Անդրիասին, և ֆեյսբուքի միջոցով: Փետրվարի 18-ից հետո կամբողջացնենք ռեսուրսները, նաև այդ կոնտակտները մի տեղ կհավաքենք ու կաշխատենք այդ մարդկանց հետ:

-Այսօր նախագահի թեկնածու Արման Մելիքյանը, անդրադառնալով Սերժ Սարգսյանի՝ Շիրակի մարզում արած հայտարարությանը, ասել էր, որ այդ հայտարարությունից հետո արդեն մյուս թեկնածուները պետք է ձեռքերը լվային և դուրս գային, որովհետև նախագահը արդեն «տոկոսները խփել է»: Ինչպե՞ս եք վերաբերվում այդ հայտարարությանը: Ձեր կարծիքով՝ ձեր թեկնածուն ընտրություններում քանի՞ տոկոս կհավաքի:

-Բազմաթիվ փաստեր և տվյալներ կան, որոնք ցույց են տալիս, որ Հանրապետական կուսակցությունը ընտրակաշառք է բաժանում ու հակասահմանադրական գործողություններ է իրականացնում: Մենք, չնայած ընտրությունների մեխանիզմը օգտագործում ենք, բայց համարում ենք շինծու ընտրություններ ու քվեի համար չենք պայքարում: Մենք պայքարում ենք ազատ, մրցակցային ընտրությունների համար և ուզում ենք վերջ տալ շինծու ընտրություններին:

-Ընդհանարապես ցանկացած քաղաքական պայքարում ինչ-որ նպատակ դնելիս կատարում են որոշակի քաղաքական հաշվարկներ: Արդյունքները, որոնց հասել եք, ինչքանո՞վ են մոտ ձեր նախնական սպասելիքներին:

-Այն, որ մենք կարողացել ենք քաղաքական օրակարգում պահել շինծու ընտրությունների գաղափարը ու նաև դրա համար պայքարը, ամենակարևոր հաջողությունն ենք համարում, որովհետև երկար տարիներ նույնիսկ ընդդիմադիրները փորձում էին հասարակությանը տանել ընտրատեղամաս, հետո ասել՝ «շինծու ընտրություններ են», բայց դրանից ոչ մի բան չի կատարվել: Այս պատճառով մենք հենց սկզբից ենք խնդիրը դրել ու այդ խնդրի համար սկսել ենք պայքարել: Ու հաջողությունները համարում ենք մեր սպասածից նույնիսկ ավելի շատ, որովհետև արձագանքներ եղել են:

-Ի՞նչ շարունակություն է լինելու:

-Շարունակությունը մենք ավելի շատ տեսնում ենք շարժման տարբերակով: Դեռևս մանրամասն մարտավարություն չկա, բայց ռազմավարությունը այս պահին քննարկվում է: Դա ընտրություններից անմիջապես հետո արդեն կներկայացնենք հասարակությանը ու կփորձենք ամբողջացնել այս շրջանում կատարված ու հետագայում կատարվելիք քայլերը:

-Հնարավո՞ր է՝ շարժումը վերածեք կուսակցության:

-Դժվար թե կուսակցություն ստեղծենք, որովհետև կուսակցությունը սահմանափակելու է գործողությունները: Կուսակցության դեպքում դու սահմանափակում ես նաև քո օրակարգը: Իսկ շարժման դեպքում դու հնարավորություն ունես հասարակության հնարավորինս լայն շերտեր ընդգրկել գործողություններում ու հնարավորինս ավելի շատ հասարակական աջակցություն ունենալ: Գումարած դրան՝ Հայաստանում կուսակցությունները մի տեսակ ճգնաժամ են ապրում, ու այդ պայմաններում ևս մի անգամ փորձել կուսակցական տարբերակով ինչ-որ բան անել, կարծում եմ, որ հնարավոր է՝ անհաջողություն լինի:

-Բայց Անդրիաս Ղուկասյանը կմնա՞ քաղաքականության մեջ:

-Միանշանակ: Կշարունակի:

-Ի՞նչ միջոցներով պիտի պայքարեք, ունե՞ք արդյոք համապատասխան ռեսուրսներ: Դրսի վրա հույս չեք դնում, ներսից էլ Անդրիաս Ղուկասյանը շատ հարուստ չի երևում:

-Բայց ինչո՞ւ է պետք հարուստ լինես, որ պայքարես:

-Համաժողովրդական շարժում ծավալելու, կազմակերպելու համար որոշակի միջոցներ են պետք:

-Համաձայն չեմ դրան: Հասարակությունը մասնակցելով իր ներդրումն է ունենալու այդ պայքարում: Մենք քաղաքական խնդիր ենք դրել ու համարում ենք, որ հասարակության մեծ մասին պետք է հուզի այս քաղաքական խնդիրը: Այդ իսկ պատճառով որևէ ռեսուրս քեզ անհրաժեշտ չի: Ճիշտ է՝ կարող է ընթացիկ որոշակի ռեսուրսներ քեզ անձամբ պետք լինեն, բայց դա մեծ ռեսուրսների հետ կապված խնդիր չի, նամանավանդ 21-րդ դարում, ինտերնետի և ֆեյսբուքի դարում: Միևնույն ժամանակ մենք ակնկալում ենք հասարակության ներդրումը պայքարում, ոչ թե մենք գնանք հասարակությանը ինչ-որ գումար տրամադրենք, որ պայքարի:

-Անդրիաս Ղուկասյանն ասում էր, որ «այսպիսով ուզում ենք քաղաքացիական անհնազանդություն առաջացնել»: Ձեր կարծիքով՝ այս փուլում կարելի՞ է արձանագրել, որ նման բան եղավ:

-Քաղաքացիական անհնազանդություն խաղաղ տարբերակով նա տեսնում է: Երկու ակցիա է եղել: Առաջինը եղավ գրեթե «վերջ շինծու ընտրություններին» լոզունգի շրջանակներում: Երկրորդը եղավ «Վերջ ռեժիմին» պաստառներով, երբ ոստիկանությունը Բաղրամյան փողոցը փակեց, ու չէին թողնում՝ մարդիկ բարձրանան: Այսօր նաև ուսանողները գնում են համալսարաններ՝ պաստառներով պահանջելով իրենցից խլված երիտասարդությունը վերադարձնել: Այս պատճառով մենք համարում ենք, որ արդեն որոշակի հաջողություն կա, ու այդ հաջողությունը գնալով կշատանա: