«Սյունիքը ձեզ համար արոտավայր չէ», «Նժդեհի պահպանած հողերը պաշտպանենք «նժդեհականներից»,  «Ոչ մի պարսակական ոչխար Սյունիքի ձորում». այսպիսի պաստառներով «Հայազն» կուսակցությունն այսօր կառավարության դիմաց բողոքի ակցիա էր կազմակերպել ի պաշտպանություն Սյունիքի մարզի որոշ հողատարածքների, որոնք որպես արոտավայր պատրաստվում են երկարաժամկետ վարձակալության հանձնել Իրանի հյուսիսում բնակվող թուրքախոս անասնապահներին:

Ակցիայի մասնակիցները համոզված են, որ նման բովանդակության և ծավալի գործարքը համապարփակ սպառնալիք է ստեղծում ազգային անվտանգությանը` ժողովրդագրական, բնապահպանական, հակահետախուզական և այլ բնագավառներում, ինչպես նաև հարվածում է հայրենի տնտեսվարողների շահերին: Նրանց կարծիքով, այսպիսի գործարքի հեղինակները հետամուտ են բացառապես իրենց նեղ անձնական շահին, որն, ինչպես միշտ, գերակայել է ազգային-պետական հրամայականների և հանրային շահի նկատմամբ:

«Հայազնի» վարչության անդամ Արմեն Մկրտչյանի դիտարկմամբ, որոշ չափով կմեղմանար այս խնդիրը, եթե նշված 50.000 հեկտարը լիներ մի տարածքում, բայց Հայաստանում, ըստ նրա, չկա նման արոտավայր մի վայրում: «Ստացվում է, որ մաս-մաս տարբեր հողեր փչացվելու են ու դառնան անպիտան, քանի որ, ինչպես բազմիցս նշվել է, ոչխարները խոտն արմատով են պոկում, և նրանցից հետո այդ տարածքները անապատացվում են»,- ասաց Արմեն Մկրտչյանը:

«Մեզ համար այս խնդրի  բնապահպանական կողմը ևս առաջնային է, քանի որ մենք դիտարկում ենք մեր հայրենի բնությունը որպես բնական միջավայր, որտեղ մենք պիտի ապրենք, ստեղծենք մշակույթ, պետականություն և այլն, և ցանկացած այսպիսի քայլ, որն այսպես ուժգին կերպով հարվածի տակ է դնում մեր բնապահպանական անվտանգությունը, մեզ համար կտրականապես անընդունելի է»,- հավելեց Արմեն Հովհաննիսյանը` «Հայազնից»:

Ակցիայի ժամանակ մասնակիցներն իրենց պահանջը նամակում շարադրված հանձնեցին կառավարությանը և խոստացան, որ հետ չեն կանգնելու այս խնդրից, և այսուհետ նման խնդիրները կանխվելու են հենց սկզբից:

Լուս.՝ Սոնա Սիմոնյանի