Կիմա Խաչատրյան

Երևանի Հովհաննես Թումանյանի անվան տիկնիկային թատրոնի ղեկավար Ռուբեն Բաբայանը, երգիչ Արտավազդ Բայաթյանը և հրապարակախոս Մերուժան Տեր-Գուլանյանը, այնուամենայնիվ, անհրաժեշտ են համարում ընտրություններին մասնակցելը:

Ռուբեն Բաբայանը մեծ նշանակություն է տալիս այն ամենին, ինչ կատարվում է հասարակության մեջ: Նա վտահ է, որ խնդիրները միայն «վերևներից» լուծվել չեն կարող. հասարակությունը պետք է փոխի իր մտածելակերպը:

«Մենք իմացանք, որ «վերևն Աստված կա»: Ինձ համար այս ընտրությունների ծավալը լի էր հիմարություններով. իմ ամենասիրած օրը լռության վերջին ժամն է, երբ ավարտվում են ընտրությունները: Եթե հասարակությունը ծաղրածուի պահանջ ունի, ունենում է, այս դեպքում արդեն ձևավորվում է տգիտությունը, փլուզվում է մշակույթը: Չէ՞ որ սրանք վախեցնող երևույթներ են»,- այսօրվա ասուլիսի ընթացքում ասաց Ռ. Բաբայանը:

Վերջինս կարծում է, որ թեկնածուն պետք է մտահոգ լինի այն ամենով, ինչը տիրում է հասարակության մեջ: Նրա կարծիքով, ամեն մի մարդ ազգի ներկայացուցիչն է, և թեկնածուները պետք է մտահոգ լինեն ժողովրդի որակով:

Երեք բանախոսներն էլ կարծիք հայտնեցին այն մասին, որ այս տարվա ընտրությունները տարբերվում են. դրանք իսկապես ժողովրդավար են:

«Նկատելի է նաև մամուլի ազատությունը: Նույնիսկ կարոտում ես անցած տարիների գրաքննության առկայությունը»,- ասաց Ռ. Բաբայանը:

Հրապարակախոս Մերուժան Տեր-Գուլանյանը նշեց, որ բացի մի քանի թեկնածուներից, մնացածը խելացի և հավասարակշռված քաղաքական գործիչներ են և գիտեն իրենց անելիքը. «Ինձ համար լուրջ թեկնածուներ են՝ Րաֆֆի Հովհաննիսյանը, Պարույր Հայրիկյանը, Հրանտ Բագրատյանը, որը, ինչպես նկատում եք, ոչ թե խոսում է իբրև նախագահ, այլ իբրև վարչապետ: Սերժ Սարգսյանը, ով ապացուցեց, որ կարող է փոխել ինչ-որ բան և մեզ հասցնել այն կետին, որը մենք ցանկանում ենք»:

Արդյոք բանախոսները ճի՞շտ են համարում այն, որ երկրի նախագահը կարող է «վրիպակներ» թույլ տալ: Երեք բանախոսներն էլ պատասխանեցին, որ դա նորմալ է, դրանք պարզապես լեզվի սայթաքումներ են եղել, երկրի նախագահն էլ կարող է սխալվել: Նրանց համար շատ ավելի կարևոր են գործողությունները:

Մերուժան Տեր-Գուլանյանն արդեն կայացրել է իր որոշումը և ընտրելու է Սերժ Սարգսյանին:

«Ինձ համար Սերժ Սարգսյանը լուրջ քաղաքական գործիչ է, ով հարուստ ճանապարհ է անցել, ունի մեծ փորձ և իր գործով ապացուցել է, որ շատ բան կարող է փոխել: Հուսով եմ, որ այս տարվա ընտրություններից հետո ընտրված նախագահն ավելի շատ ուշադրություն կդարձնի կադրերում աշխատող մարդկանց գործերին, որպեսզի չփոշիացնեն նախագահի որոշումները»: