Մեր նախորդ զեկույցում տեղի գտած հետազոտությունների հիման վրա եզրակացրել էինք որ ՀՀ-ում ընտրակեղծիքները դարձել են պակաս ակնհայտ և դիտարկելի, մնալով նույնքան արդյունավետ ընտրությունների կանխորոշված արդյունք ապահովելու տեսանկյունից:

Այսօր հարկ ենք համարում նշել, որ իշխանությունները ոչ միայն չեն վերացրել ընտրակեղծիքների սկզբնաղբյուրներն ու կեղծարարության հանցագործ մեխանիզմները, ավելին՝ ուղղակի և անուղղակի կերպով մինչ օրս օգտագործում են դրա համար անհրաժեշտ միջոցներն ու լծակները։ Ստեղծված պայմաններում արդար և ազատ ընտրությունների անցկացումը ՀՀ-ում համարում ենք անհնար:

Այնուամենայնիվ ընտրություններին մասնակցել ցանկացող քաղաքացիներին կոչ ենք անում չվաճառել իրենց ձայնը, չգնալ գործարքների և ցուցաբերել քաղաքացիական բարձր գիտակցություն:

Ընտրություններին մասնակցող ընդիմադիր թեկնածուներին կոչ ենք անում միավորվել։ Այս պայմաններում միայն միավորման միջոցով է հնարավոր ժողովրդի ձայնը լսելի դարձնել։

Ընդիմադիր կուսակցություններին, քաղաքացիական հասարակությանը և միջազգային դիտորդ կազմակերպություններին որպես ուղեցույց ստորև ներկայացնում ենք մեր հետազոտությունների հիման վրա ընտրված 20 ընտրատարածքներ, որտեղ տեղի են ունեցել ընտրակեղծիքների առավել մեծ ծավալներ։ Հորդորում ենք բոլոր շահագրգիռ կողմերին ուշի-ուշով հետևել փետրվարի 18-ին այս ընտրատեղամասերում կայանալիք գործընթացին։

Մենք համոզված ենք, որ երկրի առաջ ծառացած հիմնախնդիրները կարող են լուծվել միայն ու միայն իշխանափոխության միջոցով, որն իր հերթին տեղի կունենա ժողովրդի միասնական կամքի առկայության դեպքում:

# # #

PFA-ը անկախ, շահույթ չհետապնդող միավորում է, որի նպատակն է  ամրապնդել Հայաստանի տնտեսական զարգացման և ազգային անվտանգության շուրջդիսկուրսը՝ այդպիսով նպաստելով Հայաստանում հանրային քաղաքականության կերտմանը։ PFA-ի այս և այլ զեկույցները, որոնք գնահատականներ են տալիս Հայաստանում և Սփյուռքում տեղի ունեցող առանցքային զարգացումներին, հասանելի են www.pf-armenia.org/reports  հղումով։