Մեդիա փորձագետ Սամվել Մարիտիրոսյանը, ով նաև iditord.org ինտերնետային ռեսուրսի տնօրենն է, համեմատելով 2012 թ. խորհրդարանական ընտրությունները այժմ տեղի ունեցող նախագահի ընտրությունների հետ, նշում է, որ այս անգամ ընտրախախտումների և ընտրակեղծիքների մասին ահազանգերը քիչ են, սակայն ավելի վստահելի են (այս պահի դրությամբ կայքը ստացել է 92 ահազանգ՝ խորհրդարանականի մոտ 500 ահազանգի դիմաց):

Նվազել են նաև անանուն ահազանգերը: Դա, ըստ նրա, պայմանավորված է այն բանով, որ մարդիկ ավելի քիչ են վախենում իրենց իրական անուն-ազգանունով ներկայանալուց: Ըստ Մարտիրոսյանի՝ չկա նաեւ քողարկված սև քարոզչություն, որը նկատելի էր խորհրդարանական ընտրությունների ժամանակ, երբ մի կուսակցությունը մյուսին վարկաբեկելու համար կեղծ ահազանգեր էր տալիս:

Սամվել Մարտիրոսյանի խոսքերով, այս ընրությունների ժամանակ ահազանգեր են ստացվում նաեւ ՀՀ նախագահի թեկնածու Րաֆֆի Հովհհաննիսյանի շտաբից: Այդ և մնացած բոլոր ահազանգներն iditord-ն այժմ նաև ստուգում է՝ հետադարձ կապ հաստատելով ահազանգողների հետ: Իսկ ահազանգել կարելի է ոչ միայն  ինտերնետում, այլ նաև թեժ գծի օգնությամբ՝  077 93 83 66, և նույնիսկ, ծայրահեղ դեպքերում, SMS-ի միջոցով՝ 055 34 86 73:

Գրանցված 92 ահազանգերից 16-ը, ըստ Սամվել Մարտիրոսյանի տվյալների,  արձագանք և հետևանք են ունեցել: Դրանցով հետաքրքրվել են իրավապահ մարմինները:

«Հետքը» հարցրեց, թե անցած՝ խորհրդարանական ընտրությունների ժամանակ ահազանգերի արդյունքում որևէ մեկը իրավապահների կողմից մեղադրվե՞լ է ընտրախախտման համար: Iditord-ի տնօրենը պատասխանեց, որ ոչ մեկին չեն դատել, եղել են միայն վարչական տույժեր, իսկ այս ընտրությունների ժամանակ միայն Գոռ Թամազյանին են կանչել ԱԱԾ, և վերջ:

Սամվել Մարտիրոսյանը կոչ արեց նաև լրատվամիջոցներին հետևել iditord.org կայքին հենց քվեարկության օրը, երբ առավել շատ ահազանգեր են ստացվում, և դրանք մշակելով օգտագործել որպես լրագրողական նյութ:

Սամվել Մարտիրոսյանը հիշեցրեց նաև, որ իրենց կայքէջի հասցեն՝ iditord.org, ոչ թե iditord.am: Իսկ «org» դոմեյնը, ըստ Մարտիրոսյանի, ընտրվել է, հաշվի առնելով 2008 թվականի մարտյան իրադարձությունները, երբ «am» դոմեյնայնին տիրույթն ուղղակի չէր գործում: