Գյումրիի Սլաբոդկա թաղամասում տեղակայված թիվ 34/27 ընտրատեղամասում առաջին իսկ լուսանկար անելու փորձից հետո վեճ սկսվեց մի անծանոթ տղամարդու հետ, ով պահանջում էր իրեն չլուսանկարել: «Ընձի չնկարես, էղավ,-պահանջեց անծանոթը,-ուրիշ մարդու նկարի»: Մինչ այդ նույն անձնավորությունը բոլոր մոտեցողներին հուշում էր` քթի տակ փնթփնթալով «6» թիվը (Սերժ Սարգսյանն է այդ համարի ներքո) եւ բավական ակտիվորեն հետեւում ընտրողների գործողություններին թե սրահում, թե քվեախցիկի մոտ:

Հանձնաժողովի նախագահից ճշտեցի, որ լուսանկարվել չցանկացողը նախագահի թեկնածու Սերժ Սարգսյանի վստահված անձն է: Տղամարդու անունը Վահան էր, ազգանունը այդպես էլ ճշտել չհաջողվեց: Վստահված անձը չցանկացավ ներկայանալ, հանձնաժողովի նախագահն ու քարտուղարն էլ մոտ 10 րոպե մատյանը շուռումուռ տալուց, մի ոտքից մյուսը հենվելուց հետո այդպես էլ ոչ մի բառ չարտասանեցին:

Վստահված անձ ներկայացող Վահանի այսպես ասած իրավունքների պաշտպանությամբ այդ պահին հանդես եկավ քվեարկությանը մասնակցող 70-անց մի կին: Լուսիկ տատը նախ նախատեց ինձ` երկիրը քանդելու մեջ, հետո հայտարարեց, որ լավ կլինի «հավաքվեմ, թողնեմ գնամ չխանգարեմ իրենց», այնուհետեւ նշեց, որ ընտրության է եկել «Ղուկասյան Վարդանի խաթր»: Ստիպված էի մեծահասակ կնոջը զգուշացնել, որ եթե շարունակի վիրավորել ու խոչընդոտել իմ աշխատանքին, ապա ոստիկանություն կհրավիրեմ:

«Միլիցա կկանչես,-հարցրեց ծեր կինը,-կանչե, կանչե, իրա վզին էլ կդնեմ: Հըլը ըսա ընձի տեսնիմ, Ռիտայի հետ կաշխատիս: Չէ, ըբը դու ուրդեղաց լրագրող ես, ինչի ես եկել ըստեղ, թող գնա»: Ի դեպ, նշված ընտրատեղամասում ոստիկանության ոչ մի ներկայացուցիչ չկար: Վեճը հարթելու նպատակով հանձնաժողովի անդամները կնոջը համոզելով դուրս տարան: Այս ընտրատեղամասում նախագահի մյուս թեկնածուների վստահված անձանց եւս չհանդիպեցինք:

Ժամը 11-ի դրությամբ թիվ 34/27 ընտրատեղամասում է 1931 ընտրողից 200-ն արդեն քվեարկել էին: