Շենգավիթի դատախազը` ընտրությունների ընթացքի մասին
Շենգավիթ վարչական շրջանի դատախազ Արթուր Դավթյանը Մեդիա կենտրոնում կայացած մամուլի ասուլիսին խոսեց ՀՀ նախագահի ընտրության ընթացքի և գրանցված խախտումների մասին:
Արթուր Դավթյանը նշեց, որ, ըստ կայքերում արված մոնիթորինգի, այս պահի դրությամբ 88 խախտում է գրանցվել: Իրականացվել են համապատասխան միջոցառումներ: Հանցագործության դեպքեր դեռևս չեն գրանցվել. «Այս պահին օպերատիվ կերպով ներկայացվում են խախտումները: Կա թեժ գիծ: Տասնհինգ հաղորդում արդեն մենք ստացել ենք, որոնք ուղարկվել են փորձաքննության: Խախտումների դեպքերը հիմնականում կապված են դիտորդների, վստահված անձանց աշխատանքը խոչընդոտելու հետ: Կան նաև ահազանգեր ընտրակաշառք բաժանելու, կրկնակի լցոնումների հետ կապված, ինչպես նաև այլ անձանց կողմից քվերակություն իրականացնելու մասին»:
Ա.Դավթյանն ասաց,որ շատ են նաև այն դեպքերը, որոնք հստակություն չեն հաղորդում, բայց նրանք այդ նյութերը ևս ուղարկել են համապատասխան ստուգումների: Ա. Դավթյանը անդրադարձավ նաև «մեղմ խախտումներին», երբ ինչ-որ մարդիկ քարոզչություն են իրականացնում:
«Դա զանցանք է, այդ մարդիկ ևս կենթարկվեն վարչական պատասխանատվության»,-նշեց Ա.Դավթյանը:
Վերջինս նշեց նաև, որ դատախազության պաշտոնական կայքէջում պարբերաբար թարմացվում են ընտրախախտումների և ընտրությունների ընթացքի մասին նորությունները: Եթե գրանցվեն ինչ-որ դեպքեր, դրանք անարձագանք չեն մնա և կներկայացվեն:
Կիմա Խաչատրյան
Մեկնաբանել