Այսօր Մեդիա կենտրոնում «Ռեգիոն» հետազոտական կենտրոնի տնօրեն Լաուրա Բաղդասարյանը ներկայացրեց նախագահական ընտրությունների պաշտոնական քարոզչության փուլում (հունվարի 21-փետրվարի 16), լռության (փետրվարի 17) և քվեարկության (փետրվարի 18) օրերի ընթացքում ֆեյսբուք սոցիալական ցանցի ուսումնասիրության արդյունքները: Մասնավորապես՝ ներկայացվեց նախագահի թեկնածուների վարքը Ֆեյսբուք սոցիալական ցանցում, անդրադարձ եղավ նաեւ թեկնածուների էջերում կատարված մեկնաբանություններին, ինչպես նաև Ֆեյսբուքի օգտատերերի մեկնաբանություններին:

Ութ թեկնածուներից յոթը ոչ միայն ունեին պաշտոնական էջեր, այլև քաղաքացիների հետ շփվում էին հատուկ բացված խմբերով կամ իրենց իսկ ֆեյսբուքյան էջում:

Վարդան Սեդրակյանի էջի հավանողների թիվը 21.01.13-ի դրությամբ հասել է   4702-ի, իսկ 16.02.13-ի դրությամբ՝ 5324-ի:

Վարդան Սեդրակյանն իր էջում կատարել է քարոզչություն, «սև փիառ» գրեթե բոլոր թեկնածուների դեմ, բայց գրեթե չի անդրադարձել Ադրիաս Ղուկասյանին:

Ադրիաս Ղուկասյանի էջի հավանողների թիվը 21.01.13-ի դրությամբ հասել է 2055-ի, իսկ 16.02.12-ի դրությամբ հավանողների թիվը հասել է 2101-ի:

Ադրիաս Ղուկասյանը ստատուսներ գրելու կամ մեկնաբանություններ անելու առումով պասիվ է եղել, սակայն վերջինիս համակիրները բավականին ակտիվ են եղել: Դա բացատրվում է նրանով, որ Ղուկասյանը եղել է հացադուլի մեջ:

Պարույր Հայրիկյանի էջի հավանողների թիվը 21.01.13-ի դրությամբ հասել է 1903-ի, իսկ 16.02.12-ի դրությամբ հավանողների թիվը եղել 4035: Ի տարբերություն մյուս թեկնածուների, Հայրիկյանն ինքն է կառավարել իր էջը: Գրել է ստատուսներ, այդ թվում և մահափորձից հետո իր առողջական վիճակի մասին: Պարույր Հայրիկյանը նույնիսկ հաշվեհամար էր բացել, դրել իր քարոզչության համար նախատեսված էջում, որպեսզի դրամական աջակցություն ստանա: Նա նաև Ֆեյսբուքի միջոցով  քաղաքացիներին տեղեկացրել է իր հանդիպումների մասին:

Սերժ Սարգսյանը Ֆեսյբուք սոցիալական ցանցում պաշտոնական էջ չի ունեցել:  

Արման Մելիքյանը Ֆեյսբուքում ունեցել է իր` որպես թեկնածուի, իր խմբի էջերը: Նա արտասահմանում բնակվող ՀՀ քաղաքացիների համար բացել էր նաև հատուկ էջ, և այդ կերպ փորձում էր ողջ քարոզարշավի ընթացքում պարզել, թե նրանցից քանիսն են, որ չեն պատրաստվում մասնակցել Հայաստանի նախագահի ընտրությանը:: 

Հրանտ Բագրատյանի քարոզչության համար նախատեսված ֆեյսբուքյան էջի հավանողների թիվը 21.01.13-ի դրությամբ եղել է 1613, իսկ 16.02.13-ի դրությամբ՝  3228: Հրանտ Բարգրատյանը քաղաքացիների հետ շփվել է նաև google plus-ով:

Րաֆֆի Հովհաննիսյանի քարոզչական էջի հավանողների թիվը քվեարկության օրվա շեմին հասել է շուրջ 15 հազարի: Րաֆֆի Հովհաննիսյանն օգտագործեց նաև QR կոդը, որի շնորհիվ քաղաքացիները բջջային հեռախոսներով կարող էին մուտք գործել իր կայք և ծանոթանալ նորություններին: Նա ընտրության օրը ևս ակտիվ է եղել, մյուս թեկնածուների համեմատ քվեարկության հետ կապված ամենաշատ նյութերը հենց նրա էջում են տեղադրվել:

Արամ Հարությունյանը ակտիվ է եղել Ֆեյսբուքում: Նա հակաքարոզչություն է ծավալել գրեթե բոլոր թեկնածուների վերաբերյալ: Արամ Հարությունյանն էլ օգտագործել է ինքնագովազդի մեթոդը:

Ըստ «Ռեգիոն» հետազոտական կենտրոնի կատարած հետազոտությունների՝ թեկնածուներից ոմանք զբաղվել են ինքնագովազդով և «սև փիարով»: Նախագահի թեկնածուները ստատուսների միջոցով միմյանց «մեսիջներ» են ուղարկել, բայց չեն նախընտրել հանդիպել և բանավիճել: Թեկնածուներից ոմանք Ֆեյսբուքում խախտել են «լռության» օրը, սակայն դա պաշտոնական ընտրախախտում չի համարվում:

Լաուրա Բաղդասարյանը հավելեց, որ թեկնածուներն անդրադարձել են նաև ներքաղաքական, արտաքին քաղաքականության հարաբերություններին, իրենց իսկ ընտրական գործընթացին, խոսել են նաև թոշակների մասին: Ավելի քիչ են խոսել բնապահպանության, մշակույթի, կրթության մասին:

Կիմա Խաչատրյան