ՀՀԿ խմբակցության պատգամավոր Հայկ Բաբուխանյանն այսօր նախագահի նախկին թեկնածու Րաֆֆի Հովհաննիսյանի ընտրողներին անգիտակից, աղանդավորներ է անվանել եւ ասել, որ ընդդիմադիր թեկնածուին ձայն են տվել նրանք, ովքեր ուզում են, որ «Հայաստանում գեյ կլուբներ բացվեն, շքերթներ անցկացվեն»:

ՀՀԿ կուսակցության փոխնախագահ, ԱԺ պատգամավոր Գալուստ Սահակյանից հետաքրքրվեցինք, թե ինչով է պայմանավորված ՀՀԿ-ի ներկայացուցիչների նման պահվածքը:

«Ձեր հարցին կպատասխանեի, եթե ինչ-որ մի ժամանակահատվածում նույնը հարցնեիք, որ մեր ընդդիմախոսները, նախագահի այլ թեկնածուներն ինչպիսի որակումներ էին տալիս մեզ: Փաստորեն, մենք ամբողջ ընթացքում սեւ PR-ի չգնացինք, եւ բնական պետք է համարել, որ մարդիկ վրդովված են: Մենք ամեն ինչ արեցինք, որ նորմալ ընտրություններ կայանան, իսկ դրանից հետո կրքեր են հասունանում, առավել եւս զանգվածներ կան, որոնք բողոքում են, եւ կարծում եմ՝ դա բորբոքում է նաեւ ընտրողների մեծամասնությանը, եւ սա դրա հետեւանքն է»,- «Հետքի» հետ զրույցում ասաց Գալուստ Սահակյանը:

Պատգամավորն ասաց, որ ինքը ՀՀԿ-ականների կողմից Րաֆֆի Հովհաննիսյանի ընտրազանգվածին վիրավորելու փաստերին չի տիրապետում:  Ըստ Գ. Սահակյանի` շատ հաճախ լրատվամիջոցները խոսքից ինչ-որ հատվածներ են դուրս հանում եւ դրանով վարկաբեկում  են հանրապետական այս կամ այն քաղաքական գործչին:

Հարցին, թե օրինաչա՞փ է, երբ իշխող կուսակցության ներկայացուցիչներն անգիտակից են անվանում ընդդիմադիր թեկնածուի ընտրողներին, Գալուստ Սահակյանը պատասխանեց. «Դրա համար պիտի նայեք բողոքողներին, թե ինչպիսի որակումներ են տալիս մեզ, իշխանություններին, մեծամասնության ընտրողներին եւ Ձեր համար կռահելի կլինի: Երբ ալիքվում են հակադարձ մեկնաբանությունները, դրանք պատահական երեւույթներ չեն: Ընդհանուր առմամբ, մեզ համար դա ընդունելի տարբերակ չէ, որովհետեւ մենք հորդորում ենք, որ պրոցեսները կայունանան եւ հակադարձումների ճանապարհով չգնանք»: