«Ժառանգության» առաջնորդ Րաֆֆի Հովհաննիսյանն իր այսօրվա ելույթում շնորհակալություն հայտնեց ՀՀ ոստիկանությանը, որ թույլ տվեց միացնել բարձրախոսները և խոսել ժողովրդի հետ: Քանի որ հավաքն արտոնված չէր, Րաֆֆի Հովհաննիսյանը քաղաքացիներին ներկայացրեց իր անելիքները: Վաղը ՀՀ կենտրոնական ընտրական հանձնաժողովը կհարապարակի ընտրությունների վերջնական արդյուքները, դրանից մեկ ժամ հետո Րաֆֆի Հովհաննիսյանը ասուլիս կտա:

«Ազատության հրապարակ է մուտք գործել մի մեծ հոսանք: Այսօր արդեն Նոյան աշխարհում մի մեծ ջրհեղեղ է, որն եկել է մաքրելու մեր երկիրը կեղտերից, չարիքից, ստորությունից և ստերից»,- իր ելույթում նշեց Ր. Հովհաննիսյանը:

Րաֆֆի Հովհաննիսյանը ժողովրդին կոչ արեց պինդ լինել, ուժեղ լինել: «Միայն արդարն ու քաջը կարող են պայքարել այս ջրհեղեղի դեմ, որն եկել է իր հետ տանելու գողերին և կողծարարներին»: 

«Ժառանգության» առաջնորդը նաև ասաց, որ ոչ մեկ չի կարող խլել իրենց ազատությունը. «Սա Սովետական Հայաստանը չէ: Կեղծարարները գահընկեց են լինելու իրենց աթոռներից, և գահ է բարձրանալու հայ քաղաքացին»:

Րաֆֆի Հովհաննիսյանը հավելեց, որ ինքը հարգում է օրենքը և նույնը նաև ակնկալում է մյուսներից: Ըստ` Հովհաննիսյանի,  ժողովուրդը պայքարում է և չի նահանջելու:

Փետրվարի 26-ին «Բարևի հեղափոխությունը» տանելու են մարզեր. ժամը 11:45` Մեծամոր, 12:30` էջմածին, 13:30` Մասիս, 14:30` պատժի կենտրոն Արտաշատ, 15:30` Արարատ, 16:30` Սուրենավան, 17:30 Արենի, 18:15` Եղեգնաձոր, 19:00` Վայք: 

Փետրվարի 27-ին` ժամը 11:00-ին կայցելեն Ագարակ, 12:00-ին` Մեղրի, 14:00-ին`  Քաջարան, 15:00-ին` Կապան, 17:00-ին`  Գորիս, 18:30-ին` Սիսիան: 

Փետրվարի 28-ին ` ժամը 11:00-ին կլինեն Չարենցավանում, 12:00-ին` Բյուրեղավանում, 13:00`  Նոր Հաճնում, 14:00` Աբովյանում, որից հետո կուղևորվեն Երևան, և 17:00-ին կկայանա արտոնված հանրահավաքը:   

Այսօրվա շտապ հավաքն այսպես ավարտվեց, որից հետո Րաֆֆի Հովհաննիսյանն ուղևորվեց  Եռաբլուր ` հարգանքի տուրք մատուցելու զոհվածների հիշատակին, նույնը նաև կոչ արեց ժողովրդին:

Կիմա Խաչատրյան

Լուսանկարները` Սոնա Սիմոնյանի