Բազմաթիվ ուսանողներ, ովքեր գոհ չեն 2013 թվականի ՀՀ նախագահի ընտրությունների արդյունքներից, հայտարարել են անժամկետ դասադուլ:

Նրանք այսօր առավոտից շրջում էին պետական բուհերի մոտով և բարձրաձայնում իրենց պահանջների մասին: Սակայն նախքան հերթական բուհին մոտենալը փակվում էին այդ բուհի դարպասները, ոստիկանությունը հսկում էր, որպեսզի դասադուլ անող ուսանողները և նրանց միացած քաղաքացիները չկարողանան մուտք գործել բուհի բակ:

Բուհերի ղեկավարությունը նույնպես ամեն կերպ խոչընդոտում էր դասադուլի իրականացմանը: Բուհերի դռները փակվում էին անգամ այդտեղ սովորող ուսանողների համար, ովքեր պատահաբար հայտնվել էին դարպասներից այն կողմ:

Որոշ դասախոսներ բուհերի ներսում գտնվող ուսանողներին կարգադրում էին դուրս չգալ մասնաշենքից և չմիանալ դասադուլ անող իրենց դասընկերներին:

Ուսանողները պատուհաններից բացականչում էին՝ մենք ձեզ հետ ենք, բայց մեզ չեն թողնում դուրս գալ: