«Դուք շամպայնը ժամանակից շուտ եք խմել». Րաֆֆի Հովհաննիսյանը` Սերժ Սարգսյանին և մյուսներին
ՀՀ կենտրոնական ընտրական հանձնաժողովի հրապարակած վերջնական արդյունքներից հետո «Ժառանգության» առաջնորդ Րաֆֆի Հովհաննիսյանը ասուլիս տվեց: Րաֆֆի Հովհաննիսյանն ասաց, որ շուրջ երկու ամիս առաջ հավատացել է Հայաստանի քաղաքացուն, և Հայաստանի քաղաքացին էլ հավատացել է իրեն, և երկու ամիս միմյանց նկատմամբ տածած հավատի արդյունքում համազգային շարժում է առաջացել:
Րաֆֆի Հովհաննիսյանը երախտագիտություն հայտնեց բոլորին, որոնք հավատացել են, որ սա իրենց երկիրն է: Նա նշեց, որ հայ ժողովրդին երկրորդ սորտի, կանխորոշված, վախի մեջ ապրող, սեփական շահը չգիտակցող ժողովրդի տեղ չպետք է դնել: «Հայ ժողովուրդը խոսել է,- ասաց Րաֆֆի Հովհաննիսյանը և հավելեց, - Հայաստանի քաղաքացին է ասել, որ սա մեր հայրենիքն է, և ինքը հաղթեց փետրվարի 18-ին»:
Րաֆֆի Հովհանիսյանը ողջունեց կուսակցություններին, քաղաքացիական շարժումներին, ուսանողներին, անհատներին և բոլոր նրանց, ովքեր միացել են այս պայքարին և պահանջեց, որ հայտարարություններում իր անունը չհնչեցնեն, քանի որ սա միայն իր պայքարը չէ:
Րաֆֆի Հովհաննիսյանն անդրադարձավ Շարմազանովի` Ս. Սարգսյան-Ր. Հովհաննիսյան հանդիպման մասին արված ակնարկին, որ իրենք կարող են հրապարակել մանրամասներ այդ հանդիպումից: «Ամոթ նրանց, ովքեր փորձում են ինձ սպառնալ ինչ-որ մի ձայնագրության հրապարակման ակնարկով: Ես պահանջում եմ հիմա ` թող ամբողջությունը հրապարակեն. Նժդեհակա՞ն են, ազգայնակա՞ն են, նախկին նախագահի ներկայացուցի՞չն են, իրենք թող հիմա հրապարակեն ամբողջությունը»,- ասաց Ր. Հովհաննիսյանը:
Նա որոշ մանրամասներ պատմեց այդ հանդիպումից. Ս. Սարգսյանն ասել է, որ երկուսով են և կարող են ազատ խոսել, իսկ հիմա ինչ-որ մարդիկ հեռակա սպառնում ձայնագրություն հեռարձակել. «Եթե պրն Սարգսյանը սուտ խոսեց, որ երկուսով ենք, ուրիշ մարդ չկա այնտեղ, ուրեմն դրեք»:
Ըստ Հովհաննիսյանի` շատ սիրալիր և հարգալից հանդիպում է տեղի ունեցել, երկուսն էլ հարգել են միմյանց հետագծերը: Րաֆֆի Հովհաննիսյանն ասել է, որ Ս. Սարգսյանը չի հաղթել, բայց ունի հզոր ավանդ, և շահեկանորեն տարբերվում է շատ ու շատ քաղաքական գործիչներից. «Դուք շամպայնը ժամանակից շուտ եք խմել»,- ասել է Ր. Հովհաննիսյանը Ս. Սարգսյանին:
Ոչ իր կողմից, ոչ էլ Ս. Սարգսյանի կողմից չի եղել պաշտոն ստանձնելու կամ կոալիցիա կազմելու առաջարկ: Ս. Սարգսյանի կողմից եղել է առաջարկ թիվ երկրորդ քաղաքական գործիչը լինել և շարունակել պայքարը ընդդիմության ղեկավարի դերում մինչև 2017-18թթ.:
«Ես բացառում եմ, որ առաջադրվեմ նախագահական ընտրություններին,- ես արդեն ընտրվել եմ ՀՀ ժողովրդի կողմից, հինգ տարի պիտի ծառայեմ, ես հինգ տարի հետո ուրիշին եմ փոխանցելու, ես չեմ լինելու,- նշեց Ր. Հովհաննիսյանը,- լիքը փող է բաժանվել, բոլորս գիտենք, դա գաղտնիք չէ, մեկս մյուսին հիմարի տեղ չդնենք: Դա տեղի է ունեցել, բայց, ի հեճուկս դրան, ժողովուրդը հաղթել է: Փողը բաժանվել է, բայց ժողովուրդը հաղթել է»:
Իսկ իր կողմից Րաֆֆի Հովհաննիսյանն առաջարկել է համազգային ճգնաժամը հաղթահարելու բաց առաջարկներ անել, որը լսելու կողմնակից է ինքը:
Րաֆֆի Հովհաննիսյանն անդրադարձավ նաև իր հասցեին հնչեցված շահարկումներին. «Նեզավիսիմայա գազետա»-ն և ռուսական այլ լրատվամիջոցներ եթեր են տվել որոշ կադրեր, որտեղ Ր. Հովհաննիսյանը վարժ չի խոսել ռուսերեն, կամ շատ վարժ է խոսում անգլերեն, բայց, ըստ Հովհաննիսյանի, դրանից ոչ մի քաղաքացի իր հայրենասիրությունը կասկածի տակ թող չդնի, քանի որ ազգային ողբերգության բերմամբ ծնվել է ԱՄՆ-ում, բայց ստացել է հայեցի կրթություն, և իր համար գերակա է ազգային պետական շահը. «Վարժ անգլերենի և ոչ վարժ ռուսերենի պահով ոչ ոք չի կարող կասկածի տակ դնել իմ հայրենասիրությունը,- ասաց Ր. Հովհաննիսյանը,- ես իրեն պատասխան կտամ»:
Հովհաննիսյանի խոսքով` Վլադիմիր Վլադիմիրովիչը, մսյո Ռոլանդը կամ այլ ԱՄՆ ներկայացուցիչ կարող են թուղթ ուղարկած լինել երրորդ նախագահին, դա իրենց իրավունքն է: Սակայն ով ժողովրդի կամքը, Սահմանադրական իրավունքը ծաղրելով, հեգնելով շամպայն է խմել, խարզապես սխալ է արել, քանզի չի հարգում Հայաստանի շահն ու որոշումները և զղջալու է, որովհետև բոլոր դիտորդներից, բոլոր օտար քաղաքացիներից առաջնայինը Հայաստանի քաղաքացին, ՀՀ Սահմանադրությունն է:
Ավելին, Ր. Հովհաննիսյանը նշեց, որ եթե նույնիսկ Վաշինգտոնն էլ հեգնի ՀՀ քաղաքացու և Հայաստանի շահը, չնայած որ ինքը ծնվել, այնտեղ կրթություն է ստացել, պատասխան կտա նաև նրանց: Իսկ Մինսկի խմբի համանախագահները պետք է ինքնաբացարկ հայտնեն, և նույնն էլ խորհուրդ տվեց անել Ս. Սարգսյանին:
Անդրադառնալով ԿԸՀ-ի հրապարակած վերջնական տվյալներին` Ր. Հովհաննիսյան ասաց, որ ԿԸՀ-ն իր անդամներով պետք է ենթարկվի ամենխիստ պատասխանատվության` իր ակնհայտ հակաիրավական, հակաժողովրդական պահվածքի համար:
Րաֆֆի Հովհաննիսյանը, որպես համազգային և համաժողովրդական շարժման մի մասնիկ, անելու է ամեն ինչ, որպեսզի ժողովուրդը հետ չկանգնի:
Լրագրողներից մեկի հարցին, թե հստակ քայլեր չլինելու դեպքում արդյոք ժողովրդի հիասթափություն չի լինի, և մարդիկ այլևս չեն գնա Ազատության հրապարակ, Ր. Հովհաննիսյանը պատասխանեց. «Սա այլևս իմ պայքարը չէ, սա այլևս իմ թիմի պայքարը չէ, սա Հայաստանի քաղաքացու պայքարն է մեր ապագայի, մեր իրավունքի համար, և ժողովուրդը պետք է պայքարի և չհոգնի, այդ պայքարը տանելու ենք միասին, ստեղծագործաբար»: Իսկ հիմնական պահանջն արդեն իրացրել են, և «ժամանակն է, որ Բաղրամյան 26-ը հասկանա դա»:
Մինչ ՍԴ դիմելուն մնացել է հինգ օր: Րաֆֆի Հովհաննիսյանը չբացառեց, որ կդիմեն ՍԴ և հնարավորություն կտան դատական համակարգի ներկայացուցիչներին վերջին անգամ Սահմանադրական իրավունքն իրացնել և պաշտպանել ՀՀ քաղաքացիներին, ՀՀ սահմանադրական իրավունքը;
Լրագրողներից մեկի այն հարցին, թե ինչու ընտրատեղամասերում վերահաշվարկ չի պահանջում, նա պատասխանեց, որ Ընտրական օրենսգիրքը վերահաշվարկի պահանջը բավարարում է թեկնածուի բնագիր ստորագրության առկայության դեպքում, և քանի որ հնարավոր չէր բոլոր ՀՀ բոլոր ընտրատեղամասերով շրջել, մի քանի տեղերում միայն հասցրել են վերահաշվարկ պահանջեցել: Այդ խնդիրը չէր առաջանա, եթե օրենսգիրքը թույլ տար էլեկտրոնային փոստով ուղարկել ստորագրությունը:
Անդրադառնալով ուսանողների այսօրվա դասադուլի ակցիային` նա պատասխանեց, որ ուսանողները այդ նախաձեռնությունն սկսել են առանց իր հետ համաձայնեցնելու, բայց ինքը «զորավիգ նրանց ազատ որոշմանը»:
ԲՀԿ-ի այսօրվա հայտարարությունը Րաֆֆի Հովհաննիսյանը ասուլիսի ավարտին ողջունեց և ասաց, որ կարող էր ավելի կոնկրետ լինել:
Մարտի 1-ին, ժամը` 12:00-ին տեղի կունենա Ր. Հովհաննիսյանի մամուլի հերթական ասուլիսը, որից հետո կայցելեն Մյասնիկյանի արձան` 2008-ի մարտի 1-ի զոհերի հիշատակը հարգելու համար: Իսկ մինչ այդ կայցելեն մարզեր:
Մեկնաբանություններ (1)
Մեկնաբանել