Հոգեբան. «Դասադուլը որպես ուսանողական քաղաքական շարժում բնորոշել չի կարելի»
Հոգեբան Սամվել Խուդոյանը լրագրողների հետ հանդիպման ժամանակ հայտնեց, որ հետընտրական իրավիճակը հարաբերականորեն ավելի մեղմ է, քան 2008-ին. «Դա պայմանավորված է լիդերների դիրքորոշմամբ և տրամադրվածությամբ, այսինքն՝ նրանք չեն փորձում կտրուկ քայլերի դիմել և սրել իրավիճակը»: Նրա կարծիքով՝ դա ամենևին էլ չի նշանակում, որ ժողովրդի դժգոհությունը քիչ է. «Եթե Րաֆֆի Հովհաննիսյանը ցանկություն ունենա թեժացնել իրավիճակը, ապա դա նրան անպայման կհաջողվի: Ժողովրդի մոտ կա լարվածություն և սպասողական վիճակ: Այս դժգոհության ալիքը նոր չի ձևավորվել: Տարիներ շարունակ տեղի ունեցող անարդարություները և սխալ ներքին քաղաքականությունը ծնեցին այս բողոքի ալիքը»:
Ըստ հոգեբանի՝ ժողովրդին իր մեջքին ունենալով՝ Րաֆֆի Հովհաննիսյանն այսօր հսկայական ուժ ունի. «Նրա վարած քաղաքականությունը շատ ճիշտ է: Շատերի նման չնստեց Ազատության հրապարակում և արդարություն գոռաց, այլ գնաց մարզեր՝ ցույց տալով, որ նաև նրանց նախագահն է: Նա պետք է փորձի փոփոխությունների հասնել սահմանադրական ճանապարհով: Լինելով իրավաբան՝ երբեք օրենքի սահմաններից դուրս ոչինչ չի անի: Եթե առաջ քաշված հարցերը լուծում չստանան, ապա կրքերը կբորբոքվեն, և վիճակը չի հանդարտվի մինչև մյուս ընտրություններ»:
Անդրադառնալով դասադուլներին՝ Խուդոյանը նշեց, որ դրանք կազմակերպված ուսանողական բողոքի տպավորություն չեն թողնում. «Մեր ուսանողությունը մի հետաքրքիր դիրքորոշում ունի. սիրում է դասից փախչել: Այս դեպքում դա ավելի մեծ մոտիվ էր, քան քաղաքացիական բողոքը: Նման բողոք նրանք շատ հանգիստ կարող էին անել նաև դասերից հետո: Դասադուլը, եթե ոչ բոլորի, ապա մի մասի համար պարզապես խաղ է և հետաքրքրություն: Դա որպես ուսանողական քաղաքական շարժում բնորոշել չի կարելի»:
Արև Ավագյան
Մեկնաբանել