Սերժ Սարգսյանը երդում կտա միայն իմ դիակի վրա. Րաֆֆի Հովհաննիսյանը նորից հացադուլ հայտարարեց
«Եթե ապրիլի 9-ին Սերժ Սարգսյանը կեղծ երդում տա մեր Սահմանադրության և Աստվածաշնչի վրա, եթե Վեհափառ Հայրապետը պղծի Աստվածաշունչը՝ օրհնելով ժողովրդին հակասող, խեղող, ծախող թեկնածուին, դա իրենք կանեն իմ դիակի վրա»,- հայտարարեց Րաֆֆի Հովհաննիսյանը՝ րոպեներ առաջ Ազատության հրապարակում ընթացող հանրահավաքում: Իսկ քանի դեռ Ս. Սարգսյանը ինքնաբացարկ չի հայտնել, ինքը մնալու է Ազատության հրապարակում և հաց չի ուտելու:
Հավաքվածներից մեկի կոչին, թե միայն ուժով պետք է դա անել, Րաֆֆին նշեց, որ ուժը արյուն չէ, այլ իրենց միասնությունն է: «Այլևս ոչ մի ոստիկան, ոչ մի քաղաքացի չի գնալու արյունահեղության, այլ գնալու է հաղթանակի»,- հավելեց Ր. Հովհաննիսյանը:
Ր. Հովհաննիսյանը հայտարարեց, որ «նոր Հայաստանը երկունքի մեջ է» , և այդ երկունքը լինելու է ցավ, հակազդեցություն, կրիմինալ, բայց իրենք չենք ենթարկվելու որևէ սադրանքի, այլ գնալու են խաղաղ ճանապարհով, բայց ով ձեռք բարձրացրեց ժողովրդի վրա, պատասխան է տալու ժողովրդի առջև:
Րաֆֆի Հովհաննիսյանն իր ելույթում նաև նշեց, որ այս պայքարը կուսակցությունների պայքար չէ, այլ ժողովրդի պայքարն է, կուսակցախաղ չէ, այլ հայրենիքը միասին փրկելու պայքար:
Այսօր Կապանում, Արտաշատում, Ծավում և Ջրաշենում «Ժառանգության» ներկայացուցիչները ժողովրդի հետ հանդիպումների են գնացել, որը ողջունեց Րաֆֆի Հովհաննիսյանը և մեկ անգամ ևս նշեց, որ «իրենց դեմ խաղ չկա»:
«Ժառանգության» առաջնորդը նշեց, որ ինքն այլևս չի գնա Բաղրամյան 26, քանի որ նախորդ անգամ իր բոլոր պահանջներին բացասական պատասխանն է ստացել Ս.Սարգսյանից, կգնա միայն որպես ժողովրդի ներկայացուցիչ, իսկ եթե Սերժ Սարգսյանն ինքը ասելիք ունի, նրան կլսի միայն Ազատության հրապարակում:
Րաֆֆի Հովհհաննիսյանն ասաց, որ մինչև մարտի 31-ը՝ սուրբ Զատկի օրը, պիտի աղոթե Սերժ Սարգսյանի համար: Իսկ ՍԴ-ի որոշումից հետո կանցնեն գործողությունների, որոշումների և հաղթանակն ամրապնդելու գործին:
Մեկնաբանություններ (3)
Մեկնաբանել