Րաֆֆի Հովհաննիսյանը Գորիսում է. «Իմ կոչը այն է, որ ամեն մեկը դուրս գա նեղմիտ վախի հորձանուտից»
Րաֆֆի Հովհաննիսյանն այս պահին Գորիսում է: Նա քայլում է փողոցներով և այդ ընթացքում բարևում մարդկանց: Գորիսեցի մի ընտանիք Րաֆֆի Հովհաննիսյանին հրավիրեց իր տուն:
«Մենք գտնվում ենք կարևոր փուլում: Սա իրավունքի փուլն է»,- այդ ընտանիքի տան բակում լրագրողներին ասաց Րաֆֆի Հովհաննիսյանը:
Նա նշեց, որ եթե Գորիսում անցյալ հանրահավաքների ժամանակ «2-3 հոգի» էր դուրս գալիս, ապա այժմ քաղաքում մեծ փոփոխություն կա, և ավելի շատ մարդիկ են արձագանքում:
«Իմ կոչը այն է, որ ամեն մեկը դուրս գա նեղմիտ վախի հորձանուտից»,- ասաց «Ժառանգության» առաջնորդը՝ կոչ անելով նաև տեր կանգնել այն հաղթականին, որը ժողովուրդը գրանցեց փետրվարի 18-ին:
Րաֆֆի Հովհաննիսյանն ասաց, որ չունի ոչ մի բանի պակաս՝ ոչ ժողովրդի աջակցության, ոչ ֆինանսների: Նա նշեց, որ փոքրամասնությունը, այդ թվում լցոնումով, կեղծիքով, ինչպես նաև սրտանց քվեով, քվեարկել է Սերժ Սարգսյանի օգտին: «Սա արդեն ժողովրդին պայքարն է, Հայաստանի քաղաքացու պայքարն է»,- ասաց Րաֆֆի Հովհաննիսյանը:
Նա հավելեց, որ կլինի ուղեկից, բայց պայքարի շարունակությունը և ավարտը քաղաքացիների տիրույթում են:
Պատասխանելով լրագրողի այն հարցին, որ և 1996-ին, և 2003-ին, և 2008-ին ընդդիմությանը չհաջողվեց իշխանափոխություն անել, իսկ ինքն ի՞նչ է առաջարկում՝ Րաֆֆի Հովհաննիսյանն ասաց, որ տարբերությունն այն է, որ այս պայքարն իսկապես այլևս անվանական պայքար չէ, և ինչ էլ լինի այս ամենի հանգրվանը, դա ժողովրդի պատասխանատվությունն է՝ նյութական, բարոյական, և փետրվարի 18-ի վճռորոշ քվեն ի կատար ածելու համար:
Րաֆֆի Հովհաննիսյանը շնորհակալություն հայտնեց գորիսեցի ընտանիքին «իրենց բակը մամուլի ակումբ դարձնելու համար»: Այժմ «Ժառանգության» առաջնորդն իր համակիրների հետ գնում է Սիսիան:
Մեկնաբանություններ (1)
Մեկնաբանել