HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սոնա Ավագյան

Ոչ ՄՆ-ին, ոչ Մայր Աթոռին հայտնի չէ, թե որքանով են վտանգավոր 13-րդ դարի Սբ. Մարիանեի պատերի ճաքերը (լուսանկար)

«Հետքը» հարցում էր ուղարկել մշակույթի նախարարությանը (ՄՆ)` խնդրելով տեղեկացնել, թե նախարարությունն ուսումնասիրե՞լ է Արագածոտնի մարզի Աշտարակ քաղաքի` 1281 թ. կառուցված Սբ. Մարիանե (Սբ. Մարինե) եկեղեցու պատերին առկա ճաքերը, այդ ճաքերը պարունակո՞ւմ են փլուզման վտանգ, և ՄՆ-ն առաջիկայում նախատեսո՞ւմ է եկեղեցում կատարել վերանորոգման կամ այլ աշխատանքներ:

ՄՆ Պատմության և մշակույթի հուշարձանների պահպանության գործակալությունից տեղեկացրին, որ Սբ. Մարիանե գործող եկեղեցին ՀՀ կառավարության 2001 թ. հուլիսի 9-ի N 616 որոշմամբ սեփականության իրավունքով հանձնված է Մայր Աթոռ Սբ. Էջմիածնին, և հավելեցին. «Համաձայն սահմանված կարգի` հուշարձանի սեփականատերն է պարտավոր ապահովել հուշարձանի պահպանությունը և կատարել նրա ամրակայման, նորոգման ու վերականգնման անհրաժեշտ աշխատանքները»:

Ուստի, ՄՆ-ին ուղղած միևնույն հարցերը տվեցինք Սբ. Մարիանե եկեղեցու սեփականատիրոջ` Մայր Աթոռ Սբ. Էջմիածնի տեղեկատվական համակարգի տնօրեն տեր Վահրամ քահանա Մելիքյանին: Վերջինս, մասնավորապես, պատասխանեց. «Ցավալի է, որ Մշակույթի նախարարության կողմից շարունակաբար հնչեցվում է հետևյալ արտահայտությունը, թե «հուշարձանի սեփականատերն է պարտավոր ապահովել հուշարձանի պահպանությունը և կատարել նրա ամրակայման, նորոգման ու վերականգնման անհրաժեշտ աշխատանքները»»:

Տեր Վահրամ քահանա Մելիքյանի խոսքով` Մայր Աթոռն իր ունեցած բոլոր հնարավորություններով հանդերձ ի վիճակի չէ միայնակ իրականացնել պատմական եկեղեցիների և վանքերի պատշաճ պահպանությունը, և մշակութային ժառանգության պահպանության համար պատասխանատու են ինչպես Մայր Աթոռը, այնպես և իշխանությունները:

«Այս գիտակցությունը պետք է ունենան առավել չափով Մշակույթի նախարարության պաշտոնյաները և ինքնարդարացում չփնտրեն ՀՀ օրենքի մեջ, որովհետև նույն այդ օրենքը պարտավորեցնում է նրանց` իբրև պաշտոնյաների, պատասխանատվություն և հոգատարություն ցուցաբերել պատմական այդ սրբավայրերի նկատմամբ»,- հավելեց Մայր Աթոռի տեղեկատվական համակարգի տնօրենը:

Սբ. Մարիանեն գտնվում է Արագածոտնի թեմում, և տեր Վահրամ քահանա Մելիքյանի հավաստիացմամբ` թեմակալ առաջնորդը դիմել է ՄՆ-ին` եկեղեցու «պահպանության ուղղությամբ անհրաժեշտը ձեռնարկելու»:

13-րդ դարի այս հուշարձանը կառուցված է դարչնագույն սրբատաշ տուֆից, արտաքուստ ուղղանկյուն, գմբեթավոր կառույց է, վերձիգ համաչափություններով:

Եկեղեցու լուսամուտներից և դռներից:

Հին քարեր ու տապանաքարեր եկեղեցու բակում:

Խաչքարեր` եկեղեցու բակում:

Սբ. Մարիանեի միջնադարյան արձանագրությունների կողքին երևում են նաև հնավայրի այցելուների թողած ժամանակակից «արձանագրությունները»:

Ըստ հանրագիտարանի` Սբ. Մարիանեն մի ժամանակ եղել է մենաստան:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter