2004թ. ապրիլյան հանրահավաքներին մասնակցելու եւ նախագահական ընտրությունների իրադարձություններին ցուցաբերած ակտիվության համար Արարատի մարզի ոստիկանության կողմից ծեծի ենթարկված Գրիշա Վիրաբյանի փաստաբանները մոտ օրերս կդիմեն դատարան` ընդդեմ իրավապահ եւ դատական համակարգի մի շարք ներկայացուցիչների:

Հիշեցնենք, որ Մարդու իրավունքների եվրոպական դատարանի 2012թ. հոկտեմբերին կայացրած որոշմամբ ՀՀ-ն 31 հազար եվրո պետք է վճարեր ՀԺԿ նախկին համակիր Գրիշա Վիրաբյանին՝ նրան պատճառված բարոյական եւ նյութական վնասի փոխհատուցման համար:

Գրիշա Վիրաբյանը «Հետքի» հետ զրույցում ասաց, որ իր պահանջը մեկն է. բոլոր մեղավորները պետք է պատժվեն: Իսկ բողոքի հիմքում դրված է ՄԻԵԴ-ի որոշումը, որով ապացուցվում է իր դեմ կիրառված բռնությունների ու կատարված ապօրինությունների մասին:

«Ինձ ծեծի ենթարկած ոստիկանները պետք է պատասխան տան խոշտանգումների համար, ոստիկանությունը` իմ դեմ կեղծ քրեական գործ սարքելու, իսկ դատավորներն էլ` սխալ եւ անարդարացի դատեր ու վճիռներ կայացնելու համար»,-ասաց Գրիշա Վիրաբյանը:

Նա առայժմ անուններ չի հրապարակում, սակայն նշում է, որ պատասխանատվության ենթարկելու պահանջը վերաբերելու է մի քանի ոստիկանի, տարբեր ատյանների մոտ 10 դատավորի, ինչպես նաեւ` քննիչների եւ դատախազի:

«Այս պահին անուններ չեմ տալիս, քանի որ անձինք շատ են եւ եթե մեկին մոռանամ նշել` սխալ կլինի»,-ավելացրեց Գրիշա Վիրաբյանը:

Նշենք, որ ՄԻԵԴ որոշումով Գրիշա Վիրաբյանի նկատմամբ բռնություն կիրառողներից մեկն էլ եղել է Երեւանի ներկայիս ոստիկանապետ Աշոտ Կարապետյանը:

«Ոչ մի բանի առջեւ չեմ կանգնելու, եւ, ինչպես խոստացել էի, բոլորը պետք է պատժվեն նաեւ ուրիշների նկատմամբ կայացրած անարդարացի վճիռների  ու կալանքների համար: Մի մոռացեք, որ 2004թ. ապօրինի կալանավորվեցին մոտ 2500 ակտիվիստներ»,-ավելացրեց Գ. Վիրաբյանը:

Առաջիկա օրերին Գ. Վիրաբյանի փաստաբանները մամուլի ասուլիս կհրավիրեն եւ կներկայացնեն խնդիրը:

Լուսանկարը` Գ. ՎԻրաբյանի ֆեյսբուքյան էջից