ՀՀԿ խմբակցության պատգամավոր Ալեքսանդր Պետրոսյանը (ՄԱՊ-ի Ալիկ), ով մեծամասնական ընտրակարգով ընտրվել է Արմավիրի մարզից, Ազգային ժողովի հայտարարությունների ժամին ելույթ ունեցավ և նշեց, որ մարզում մայիսի 12-ին տեղացած կարկուտն աղետի գոտու է վերածել մարզը: Պատգամավորն ասաց, որ մի քանի անգամ հանդիպել է տուժած գյուղացիներին:

Գյուղացիները պահանջել են, որ սառեցնեն իրենց հողի ու ջրի վարձերը, բանկերում ունեցած վարկերի տոկոսները, ինչպես նաև տրամադրեն անտոկոս վարկեր:

«Որպես գյուղատնտեսությանը մոտ կանգնած մարդ՝ ասեմ, որ այդ վնասը չի վերականգնվի եկող 2-3 տարիների ընթացքում: Պարզ լինելու համար ասեմ, որ այդ տարածքներում կորել է մոտ 20 հազար տոննա խաղող: 2-3 տարվա մեծ ծախսերի արդյունքում նոր կանցնեն լիարժեք բերքի»,- նշեց Ալեքսանդր Պետրոսյանը:

Պատգամավորը նամակով պատրաստվում է դիմել կրթության և գիտության, ինչպես նաև առողջապահության նախարարներին, որպեսզի կարկտահարությունից տուժած տարածքների ուսանողների ուսման վարձերը զեղջվեն, իսկ հիվանդները ստանան անվճար բուժօգնություն:

«Դա աղետի գոտի է, իսկ աղետի գոտին միայն իշխանության և հանրապետության նախագահի խնդիրը չէ, մեր բոլորի խնդիրն է: Ես առաջարկում եմ բացել հաշվեհամար: Մենք կդիմենք բոլոր ֆինանսական կառույցներին, ձեռներեցներին, քաղաքացիներին: Վերջիվերջո տուժել է մեր ժողովուրդը, մարդիկ կորցրել են ամեն ինչ: Գյուղ կա, որտեղ 1 կգ բերք չի մնացել»,- ավելացրեց պատգամավորը:

Նա առաջարկեց ԱԺ-ում ստեղծել հանձնաժողով և հավաքված գումարը բաժանել տուժած բնակիչներին:

«Այն հողը, որ երկար ժամանակ կերակրել է ոչ միայն գյուղացուն, այլև մեր բոլոր ազգաբնակչությանը, կարծում եմ, բարոյական է, որ այսօր բոլորս օգնենք այդ մարդկանց»,- ավելացրեց Ալեքսանդր Պետրոսյանը:

ԱԺ նախագահ Հովիկ Աբրահամյանը հայտարարեց, որ միանում է պատգամավորի նախաձեռնությանը և հաշվեհամարը բացվելու դեպքում իր մեկ ամսվա աշխատավարձը կփոխանցի այդ հաշվեհամարին: ԱԺ նախագահը կոչ արեց պատգամավորներին «գոնե այս վիճակում սատար կանգնել գյուղացիներին»: