Այսօր, երբ Երևանի «Արմենիա Մարիոթ» հյուրանոցում ավարտվեց Եվրոպայի խորհրդի խորհրդարանական վեհաժողովի (ԵԽԽՎ) մշտական հանձնաժողովի նիստը, հյուրանոցի առջև սկսեցին բողոքի ակցիա անցկացնել ՀԱԿ համակիրներն ու բանակում զոհված զինծառայողների մայրերը:

Նրանք վանկարկում էին «Ազատություն», «Ազատ, անկախ Հայաստան», «Սերժիկ, հեռացիր», «Պայքար, պայքար մինչև վերջ» և այլն:

Ակցիայի մասնակիցները պահել էին հայալեզու և անգլալեզու պաստառներ՝ «Ազատություն Հայաստանի քաղբանտարկյալներին», «Մենք Հայաստանում ուզում ենք ազատ հեռուստատեսություն», «Մարտի 1-ի մարդասպանները դեռ անպատիժ են», «ԵԽԽՎ, բավական է գովես կեղծված ընտրությունները», «Դուք ժողովրդավարությա՞ն, թե՞ ուզուրպատորի հետ եք», «ԵԽԽՎ-ն՝ Սարգսյանի ռեժիմի պահապա՞ն» և այլ գրություններով:

Ոստիկանությունը նկարահանում էի ակցիայի մասնակիցներին, իսկ մի ոստիկան հեռախոսով ասում էր, թե ակցիայի մասնակիցները քանի պաստառ են պարզել, ինչ է գրված դրանց վրա, ինչ մեծության են պաստառները:

«Արմենիա Մարիոթի» անվտանգության աշխատակիցները փակել էին հյուրանոցի մուտքը և լրագրողներին թույլ չէին տալիս ակցիան լուսանկարել ոչ մուտքի մոտից, ոչ էլ մուտքի կողքին գտնվող թեքահարթակի վրայից:

Բողոքի ակցիայի ժամանակ ընթերցվեցին ՀԱԿ երիտասարդական միության հայտարարությունը և պահանջները՝ ուղղված ԵԽԽՎ մշտական հանձնաժողովին: Ըստ այդմ, երիտասարդական միությունը պահանջում է. 1. պահանջել ՀՀ-ում գործող իշխանություններից ձեռնարկել կոնկրետ քայլեր 2008թ. մարտի 1-ի սպանդը բացահայտելու և մեղավորներին քրեական պատասխանատվության ենթարկելու նպատակով, 2. անհապաղ արձագանքել 2013թ. Երևանի ավագանու ընտրություններում տեղ գտած ապօրինություններին, 3. դատապարտել իշխող ՀՀԿ-ի կողմից բոլոր տեսակի ընտրությունների հետևողական կեղծումը, քաղաքացիների ահաբեկումը, ընտրակաշառքի բաժանումը, 4. պահանջել դադարեցնել քաղաքական հետապնդումը ՀԱԿ-ի ակտիվիստների նկատմամբ, անհապաղ ազատ արձակել Տիգրան Առաքելյանին:

«Տվյալ արատավոր երևույթների հանդուրժումը թույլ է տալիս ՀՀ քաղաքացիներին ենթադրելու, որ ԵԽԽՎ մշտական հանձնաժողովը Սերժ Սարգսյանի ոչ օրինական իշխանության հետ ձեռք է բերել հանցավոր համաձայնություն՝ Հայաստանը թալանելու գործում»,- հայտարարությունն ընթերցեց ՀԱԿ ակտիվիստ Արեգ Գևորգյանը:

ԵԽԽՎ մշտական հանձնաժողովի նիստին մասնակցած խորհրդարանականներից ոմանք, առանց որևէ բան ասելու, անցան ակցիայի մասնակիցների կողքով:

ՀԱԿ անդամ, ակցիայի մասնակից Վլադիմիր Կարապետյանի խոսքով՝ իրենք նախատեսել են, որ ԵԽԽՎ խորհրդարանականները կարող են դուրս գալ հյուրանոցի ետնամուտքից: «Իրենք եթե համարում են, որ սա որևէ առնչություն ունի, կգան, կտեսնեն: ԵԽ-ն մեր կազմակերպությունն է, մենք անդամ ենք: Մենք անում ենք մեր բնակչության, մեր ժողովրդի համար, որ տեսնեն, որ խնդիրները, որ կան, լուծում չեն ստանում: Այսինքն՝ այնպես չի, որ մենք պետք է եվրոպացիների հետևից ընկնենք»,- «Հետքին» ասաց Վլադիմիր Կարապետյանը:

«Ըստ էության, ԵԽ-ն աչք է փակում Հայաստանում ժողովրդավարության և մարդու իրավունքների խախտումների վրա... ԵԽ արձագանքը ժողովրդավարության և մարդու իրավունքների խախտումներին համաչափ չէ իրողությանը»,- իր հերթին ասաց Ազգային ժողովի ՀԱԿ խմբակցության ղեկավար, ԵԽԽՎ-ում հայաստանյան պատվիրակության անդամ Լևոն Զուրաբյանը:

Նրա խոսքով՝ Հայաստանի համազեկուցողներ Ֆիշերը և Պրեսկոտը, մոտ մեկ տարի է, չեն կատարում իրենց աշխատանքը և ընդհանրապես չեն զբաղվում Հայաստանով:

Լևոն Զուրաբյանը լրագրողներին հայտնեց, որ նիստի ավարտից հետո ԵԽԽՎ նախագահ Ժան-Կլոդ Մինյոնին տեղեկացրել է ՀԱԿ-ի երիտասարդական միության ծրագրած բողոքի ակցիայի մասին, և բացատրել, թե ինչու է ծրագրված ակցիան: «Ինքը, բնականաբար, այդ մեղադրանքները չի ընդունում»,- Ժան-Կլոդ Մինյոնի հետ զրույցի մասին ասաց Լևոն Զուրաբյանը:

Մշտական հանձնաժողովի նիստի ավարտից անմիջապես հետո ԵԽԽՎ նախագահ Ժան-Կլոդ Մինյոնին լրագրողները ևս ասացին, որ այժմ ընդդիմությունը բողոքի ակցիա է անցկացնում հյուրանոցի առջև: ԵԽԽՎ նախագան արձագանքեց, որ միանգամայն նորմալ է, երբ ընդդիմությունը բողոքի ակցիա է անցկացնում: Շատ երկրներում ևս ընդդիմությունը բողոքի ակցիաներ է անցկացնում:

Երբ լրագրողները նշեցին, որ ընդդիմության պնդմամբ՝ Հայաստանում քաղբանտարկյալ կա, և ԵԽԽՎ-ն անտեսում է Հայաստանում մարդու իրավունքների ոտնահարումները, Ժան-Կլոդ Մինյոնը պատասխանեց, որ որևէ երկրում իրավիճակի մասին ԵԽ-ում դատում են՝ ըստ զեկուցողների զեկույցների, ԵԽ-ի մարդու իրավունքների հանձնակատարի պարբերական զեկույցների, Ընդդեմ խոշտանգումների կոմիտեի և Մարդու իրավունքների եվրոպական դատարանի:

«Մենք այստեղ ենք՝ հարգելու օրենքները, և որևէ անձնական դատողություն որևէ մեկի վերաբերյալ Խորհրդարանական վեհաժողովում կլինի ամբողջովին կարգից դուրս»,- ասաց Ժան-Կլոդ Մինյոնը:

Անդրադառնալով հայաստանյան ընդդիմության այն պնդումներին, որ վերջին 3 ընտրությունը ամբողջովին կեղծվել է՝ ԵԽԽՎ նախագահն ասաց, որ միջազգային դիտորդները, ովքեր դիտորդական առաքելություն են իրականացրել ընտրություններում, համամիտ չեն այդ տեսակետին:

Երբ լրագրողներն ասացին, որ ըստ հայաստանյան ընդդիմության՝ Հայաստանի ներքին խնդիրների հարցում ԵԽ-ի լռությունը ՀՀ իշխանությունների հետ գործարք է, որի նպատակն է լուծել Ղարաբաղի համակարտությունը՝ ԵԽԽՎ նախագահն ասաց, որ ամենևին էլ գործարք չկա, և ԵԽԽՎ-ն լռություն չի պահպանում որևէ հարցում:

«Ես կարծում եմ, որ հավանաբար ձեր ընդդիմությունը լավ չի հասկանում՝ ինչ է ասվում: Կամ գուցե մեր ձայնը չի լսվում: Կարծում եմ՝ մենք պետք է կարդանք ԵԽԽՎ-ի պատրաստած զեկույցները. մենք ասում ենք այն, ինչ պետք է ասել: Երբ մտահոգություն է առաջանում մեր հիմնարար արժեքների վերաբերյալ՝ մարդու իրավունքներ, ժողովրդավարություն, ապա մենք պետք է որոշակի խոսք ասենք: Անշուշտ, որևէ երկրի ներքաղաքական խնդիրները այն բանը չեն, որն ուղղակիորեն առնչվում է ԵԽ-ին»,- ասաց Ժան-Կլոդ Մինյոնը: