HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Լարված մթնոլորտ թիվ 27 դպրոցում. ուսուցիչները բողոքարկում են տնօրենի ազատման հրամանները

Երևանի թիվ 27 դպրոցում կրքերը չեն հանդարտվում: Դպրոցի մի քանի արդեն նախկին մանկավարժներ դատական գործընթաց են սկսել տնօրեն Սուսաննա Սարգսյանի կայացրած հրամաններն անվավեր ճանաչելու, աշխատանքում վերականգնելու, հարկադիր պարապուրդի գումարը վճարելու պահանջներով: Բացի այդ, դպրոցում կատարված չարաշահումների փաստով փետրվարի 20-ին Շենգավիթի քննչական բաժնում քրեական գործ է հարուցվել` ՀՀ քրեական օրենսգրքի 308 հոդվածի 1-ին (Պաշտոնեական լիազորությունները չարաշահելը) եւ 314 հոդվածի (Պաշտոնեական կեղծիքը) հիմքերով: Քրեական գործը հարուցվել է դպրոցի նախկին տնօրեն Անահիտ Բախշյանի հանցագործության մասին հաղորդման հիման վրա:

Այս քրեական գործի մանրամասներին դեռ կանդրադառնանք:

Ինչ վերաբերում է մանկավարժների դատական գործերին, ապա տնօրենի կայացրած հրամանների դեմ առաջինն ընդվզել է հայոց լեզվի եւ գրականության ուսուցչուհի Գոհար Ստեփանյանը:

Երեւանի թիվ 27 միջնակարգ դպրոցի եւ Գոհար Ստեփանյանի միջև 01.09.1997թ. կնքվել է աշխատանքային պայմանագիր, որով վերջինս ընդունվել է աշխատանքի որպես հայոց լեզվի եւ գրականության ուսուցչուհի: 2012թ. սեպտեմբերի 3-ին դպրոցի տնօրեն Սուսաննա Սարգսյանը համար 189-Ա հրամանով ուսուցչուհուն ազատել է աշխատանքից` աշխատողների թվաքանակի կրճատման անհրաժեշտության պատճառաբանությամբ, ինչը որեւէ կերպ չի հիմնավորել:

Տնօրենը որեւէ բացատրություն չի տվել, թե ինչու հատկապես Գոհար Ստեփանյանը պետք է կրի դրա անբարենպաստ հետեւանքները եւ դառնա գործազուրկ:

Իրականում, դպրոցի տնօրենը համար 189-Ա հրամանով լուծել է մի պայմանագիր, որը իրավաբանական իմաստով գոյություն չի էլ ունեցել: Այսպես, լուծվել է 01.09.1997թ. կողմերի միջեւ կնքված համար 16 պայմանագրի փոփոխմանն ուղղված 01.09.2011թ. պայմանագիրը, որը Գոհար Ստեփանյանը չէր էլ ստորագրել, թեեւ շարունակել է աշխատել նույն դպրոցում նույն հաստիքում: Չստորագրված պայմանագիրն իրավական հետեւանքներ չէր կարող առաջացնել, հետեւաբար տնօրենի ազատման հրամանը ուսուցչուհու համար որեւէ իրավական հետեւանք չէր կարող առաջացնել:

Շենգավիթ վարչական շրջանի դատարանը 2012թ. դեկտեմբերի 25-ին ուսուցչուհու հայցը բավարարել է: Վճռով անվավեր է ճանաչվել տնօրենի համար 189-Ա հրամանը, իսկ դպրոցից հօգուտ Գոհար Ստեփանյանի բռնագանձվել է 89.626 դրամ` որպես մեկ ամսվա հարկադիր պարապուրդի գումար:

Մինչեւ վճռի հրապարակումը` Սուսաննա Ստեփանյանը իր մեկ այլ հրամանով ( համար 228) փոփոխություններ է կատարել իր իսկ կայացրած 189 հրամանում` Գ. Ստեփանյանի կողմից չստորագրված պայմանագրին հղում անելը փոխարինելով ավելի վաղ` 2006թ. կնքված աշխատանքային պայմանագրին, որը ստորագրել է այդ ժամանակվա դպրոցի տնօրեն Անահիտ Բախշյանը:  

Հենց վճռի հրապարակման օրը տնօրենը նոր հրամանով անվավեր է համարել իր կայացրած համար 189 եւ 228 հրամանները: Իսկ հաջորդ օրը նոր հրամանով լուծել է ուսուցչուհու եւ դպրոցի միջեւ 2006թ. կնքված աշխատանքային պայմանագիրը: Այս տարվա մարտի 20-ին տնօրեն Սուսաննա Սարգսյանը դարձյալ միտքը փոխել է եւ անվավեր է ճանաչել այս հրամանը նույնպես` աշխատանքային պայմանագիրը լուծելու ծանուցման կարգը չպահպանելու պատճառաբանությամբ:

Նույն օրը Սուսաննա Սարգսյանը ծանուցել է Գոհար Ստեփանյանին, որ 2 ամիս հետո լուծվելու է նրա հետ կնքած 2006թ. աշխատանքային պայմանագիրը եւ առաջարկել նրան ցերեկային պահակի կամ շենքի հավաքարարի աշխատանք:

Թիվ 27 դպրոցի տնօրենը, չհամբերելով երկամսյա ժամկետի լրացմանը, որը ավարտվելու էր մայիսի 20-ին, 8 օր անց նոր հրամանով (270-Ա) աշխատանքից ազատել է Գոհար Ստեփանյանին` դարձյալ ժամաքանակի կրճատման պատճառաբանությամբ: Այս հրամանով Սուսաննա Սարգսյանը կատարել է գրեթե նույն սխալը, ինչ հիմքով 8 օր առաջ անվավեր էր համարել իր հրամանը:

Սուսաննա Սարգսյանը նույն օրը մեկ այլ հրամանով (271-Ա) հօգուտ Գոհար Ստեփանյանի փոխանցել է 220.962 դրամ՝ որպես 2012թ. դեկտեմբերի 26-ից մինչեւ այս տարվա մարտի 28-ը հարկադիր պարապուրդի գումար եւ, մարտի 20-ի ծանուցման ժամկետները խախտելով պայմանավորված, այդ օրվանից մինչեւ մայիսի 20-ն ընկած ժամանակահատվածի համար 177.865 դրամ արձակման նպաստ եւ 8.431 դրամ տուժանք:

Գոհար Ստեփանյանը դարձյալ դիմել է դատարան` այս անգամ տնօրենի 270-Ա հրամանն անվավեր ճանաչելու, աշխատանքում վերականգնելու, տուժանքը եւ հարկադիր պարապուրդի գումարը բռնագանձելու պահանջներով:

Նույն դպրոցի սոցիալական մանկավարժ Էմմա Կատինյանը մայիսի 29-ին Շենգավիթ վարչական շրջանի ընդհանուր իրավասության դատարանում շահել է տնօրեն Սուսաննա Սարգսյանի կողմից կայացված իրեն աշխատանքից ազատելու հրամանն անվավեր ճանաչելու, աշխատանքում վերականգնելու եւ հարկադիր պարապուրդի գումարը վճարելու հայցով դատը:

Էմմա Կատինյանը «Հետքի» հետ զրույցում ասաց, որ 2012թ. դեկտեմբերի վերջին տնօրեն Սուսաննա Սարգսյանն իրեն ստիպել է, որ աշխատանքից ազատվելու դիմում ներկայացնի`ասելով, թե վստահելի չէ իր համար եւ դպրոցից տեղեկություններ է դուրս հանում: Էմմա Կատինյանի խոսքերով`ինքը պահանջել է տնօրենից ապացուցել իր հասցեին հնչած մեղադրանքները: Ի պատասխան՝ տնօրենն ասել է, թե անվստահության հիմքեր չկան, սակայն ինքն անձամբ կհեռացնի մանկավարժին աշխատանքից:

Հունվարի արձակուրդներից հետո տնօրենը զանգահարել եւ տեղեկացրել է Է. Կատինյանին, որ մեթոդ միավորման խմբավորման աշխատակիցները պետք է ներկայանան աշխատանքի: Էմմա Կատինյանն ասել է, որ ինքը որպես երրորդ մասնագիտություն ուսանում է մանկավարժական համալսարանում, դասերը սկսվել են եւ պետք է ժամը 10-ից համալսարանում լինի: Տնօրենն ասել է, որ Է. Կատինյանը կարող է այլեւս դպրոց չգալ, քանի որ աշխատանքից ազատված է: Հեռախոսազրույցի հաջորդ օրը Էմմա Կատինյանը տնօրենից ստացել է ծրար, որի մեջ եղել է 3-4 օրերի ընթացքում կայացված միանգամից 3 նկատողություն:

Էմմա Կատինյանն ասաց, որ ինքը դիմել է աշխատանքի պետական տեսչություն, որտեղից հաստատել են տնօրենի կողմից կատարված անօրինական քայլերը, այնուհետեւ մանկավարժը դիմել է երկրի նախագահին, մարդու իրավունքների պաշտպանին, Երեւանի քաղաքապետարանի կրթության վարչության պետ Գայանե Սողոմոնյանին, սակայն հարցը վերջնականապես լուծվել է դատական կարգով:

Ըստ վճռի` Էմմա Կատինյանը վերականգնվել է աշխատանքում եւ ստանալու է հարկադիր պարապուրդի` մոտ 5 ամսվա ամբողջ գումարը:

Էմմա Կատինյանը մտավախություն ունի, որ տնօրենը դատարանի վճռի հիմքով իրեն կվերականգնի աշխատանքի, բայց հաջորդ օրը նորից կազատի աշխատանքից, քանի որ Գոհար Ստեփանյանի դեպքը դրա վառ ապացույցն է:

«Աշխատանքում վերականգնվելու համար, իրոք, շատ ուրախացա, որ արդարությունը վերականգնվեց, բայց եթե Սուսաննա Սարգսյանը մնա որպես տնօրեն, իրոք վստահ չեմ, որ կարող եմ աշխատանքի անցնել: Նա ամեն ինչի ընդունակ է, կարող եմ այսօր վերականգնվել եւ վաղը նորից ազատվել աշխատանքից: Ինքն այնպիսի հնարքներ ու ձեւակերպումներ է օգտագործում, ինչը, բնականաբար, դատարանում չապացուցվեց, որ ամեն ինչ հնարավոր է: Իր մոտ այնքան խորն է հիշաչարությունը, անիմաստ հետապնդումները, որ վստահություն չի ներշնչում»,- ավելացրեց Էմմա Կատինյանը:

Պարզաբանումներ ստանալու նպատակով զանգահարեցինք Սուսաննա Սարգսյանին: Նա պատասխանեց, թե խիստ զբաղված է: Ապա տեղեկանալով զրույցի թեմային՝ խոստացավ օրվա ընթացքում կապ հաստատել մեզ հետ եւ այդ հարցում աջակցել մեզ: Նրան տրամադրեցինք նաեւ մեր բջջային հեռախոսահամարը, որպեսզի ավելի հեշտ կապ հաստատի, սակայն աշխատանքային օրն ավարտվեց, իսկ տնօրենն այդպես էլ չարձագանքեց:

 

Լուսանկարը՝ Սուսաննա Սարգսյանի ֆեյսբուքյան էջից 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter