«Ջրին տոկ տալուց» մինչև թունավոր պոչանքներ. Դեբեդում ձկները նվազում են
Դավիթ Անթառանյանը, ով ձկնորսությամբ է զբաղվում դեռ մանկությունից, ասում է, որ Դեբեդում ձուկը միտումնավոր են վերացնում:
«Ես չեմ ճանաչում՝ ովքեր են ձուկը վերացնում, բայց միայն ես չեմ դժգոհում. գետի վերևից ներքև ձկնորսները բոլորը բողոքում են: Ասում են՝ Վրաստանից ձկնորսներ են գալիս, գետում տոկ են տալիս, դրա համար էլ ձուկը պակասում է»,- ասում է փորձառու ձկնորսը:
Ըստ նրա՝ վրացի ձկնորսները ձմռանն են «տոկ տալիս» գետի ջրերին, երբ ալավերդցի ձկնորսները չեն գնում ձկնորսության: Դավիթ Անթառանյանը համոզված է, որ Դեբեդի ձկներին մեծ վնաս են պատճառում նաև ամեն օր գետ թափվող Ախթալայի լեռնահարստացման կոմբինատի արտադրական թունավոր պոչանքները:
«Գիտեք ոնց, ամեն տարի, երբ գետը վարարում և բարձրանում է, ձուկն այդ ժամանակ գետի հոսանքին հակառակ է գալիս: Հիմա արտադրական թունավոր պոչանքները Ախթալայից ներքև վերացնում են ձկներին, այլևս հոսանքին հակառակ ձկների հոսք չի լինում»,- բացատրում է Դավիթը և ավելացնում, որ ամռան այս ամիսներին մարդիկ ընտանիքների հետ ուզում են հավաքվելի գետի ափին, հանգստանալ, հաճելի ժամանակ անցկացնել եւ ձուկ համտեսել: Բայց ձկան «քանակն էլ էն չի»:
«Եթե ուզում եք իմանալ, ամենահամեղ և պահանջարկ ունեցող ձուկը Դեբեդի ձուկն է: Ինչքան ուզում է Դեբեդը կեղտ թափվի, հոսող գետի ձուկը ամենահամեղն է»,- ասում է ձկնորսը եւ նշում, որ գետում դեռ կան բեղլու, կապոտ և կարմրախայտ ձկնատեսակներ:
Դավիթ Անթառանյանը | Սերժիկ Կարգանյանը |
«Իմ բռնած ձկներից և վաճառում եմ, և տանը ուտում ենք: Վաճառում եմ նաև Երևանում, որ մի ուրիշ բան էլ առնենք, ապրենք»,- նշում է Դավիթ Անթառանյանը եւ մանրամասնում, որ անծանոթ գնորդին 1 կգ ձուկը վաճառում է 3000, իսկ ալավերդցիներին՝ 1500-ից 2000 դրամով:
Հորդառատ անձևրներից վարարած Դեբեդում ձկնորսներին երեկ չէր հաջողվում ձուկ որսալ: «Պղտոր ջրում ձուկը դժվար է բռնվում: Պետք է սպասենք՝ գետը զուլալվի, որ ձուկը երևա: Կարող է մի 5 օր հետո նոր ձուկը երևա: Ձուկ բռնելու սեզոնը նոր է սկսվում,- շարունակում է Դավիթ Անթառանյանը,- առաջ օրը մինչև 3-4 կգ ձուկ էինք բռնում, իսկ հիմա մի կգ զոռով է բռնվում»:
Ալավերդցի ձկնորս Սերժիկ Կարգանյանը նույնպես դժգոհում է ձկան սակավությունից ու իբրեւ դրա գլխավոր պատճառ մատնանշում Դեբեդ թափվող Ախթալայի լեռնահարստացման կոմբինատի արտադրական թունավոր պոչանքները, ինչպես նաեւ «տոկով ձուկ բռնելը»:
«Ես չգիտեմ՝ ովքեր են տոկ տալիս, բայց գիտեմ, որ տալիս են: Ես մի քանի անգամ տեսել եմ տոկ տալիս: Երբ գետին տոկ են տալիս, ձկների մեծ քանակ ջրի երես է թռչում, ապօրինի ձկնորսներն էլ ձեռքներին մեծ սավոկ ունեն, սավոկով հավաքում են ջրի երես ելած ձկներին»,- ասում է Սերժիկ Կարգանյանը:
Ձկնորսները գտնում են, որ «ջրին տոկ տվողների» նկատմամբ Ալավերդու ոստիկաններն անտարբերություն են դրսևորում: Իսկ Ախթալայի լեռնահարստացման կոմբինատի արտադրական թափոնները Դեբեդ լցնելու համար նրանք չգիտեին, թե ում մեղադրեն:
Մեկնաբանություններ (2)
Մեկնաբանել