Չորեքշաբթի, 26 սեպտեմբերի

Կառավարությունն ահազանգում է, իսկ Սամվել Ալեքսանյանն ընդլայնում է իր ձկնաբուծական տնտեսությունը



Քրիստինե Աղալարյան
Գրիշա Բալասանյան 

Հոդված 1

Անապատացող Արարատյան դաշտն ու ձկնաբիզնեսը (հոդված 2)

2010թ.-ի հոկտեմբերին, երբ այցելել էինք ՀՀ Ազգային ժողովի պատգամավոր Սամվել Ալեքսանյանի ձկնաբուծարան, որը գտնվում է Արարատի մարզի Սիփանիկ գյուղում, կառավարիչ Մովսես Առաքելյանն ասել էր, որ 6-7 հորատանցքից են ջուր ստանում: Դրանից հետո ՀՀ բնապահպանության նախարարությունն իր կայքում տեղադրեց ձկնաբուծական տնտեսությունների ցանկը, որտեղ Մովսես Առաքելյանը ընդամենը 1 հորի ջրթույլտվություն ուներ` 34.0 լ/վրկ թողունակությամբ:

ՀՀ բնապահպանության նախարարությունը, մեր գրավոր հարցմանն ի պատասխան, տեղեկացրել է, որ «2012թ. սկսած Արարատյան հարթավայրում նոր հորատանցք հորատելու համար ջրօգտագործման թույլտվություն չի տրամադրվել»: Ձկնաբուծական տնտեսություններ մեր այցելությունները, սակայն, բոլորովին այլ բան ցույց տվեցին, տնտեսություններն ընդլայնվել են, ջրաչափեր ոչ բոլորն են տեղադրել, տեղադրողները` սողանցքներ են գտել քիչ ծավալ ցույց տալու համար:

Պատգամավոր Ալեքսանյանին պատկանող ընկերությունները Հայաստանի տնտեսությունում մի քանի ապրանքների ներկրման ուղղությամբ ունեն մենաշնորհ դիրք: Ձկնաբուծության ոլորտում ևս նա խոշոր ձկնաբուծարանի տեր է, և այդ գործունեությունն էլ նա իրականացնում է իր «Ալեքս Գրիգ» ընկերությունով:

Վերջին երեք տարում պատգամավորի ձկնաբուծական տնտեսությունն ընդլայնվել է: Ըստ Մովսես Առաքելյանի` 7.5 հա տարածքում 2 հա-ն լճերն են զբաղեցնում: Ինքնաշատրվանող խորքային հորերերի թիվը հասել է 10-ի` ընդհանուրը վարկյանում 960 լիտր հզորության: Կառավարիչը խոստովանում է, որ ջրերի մակարդակը իջնում է, ինչն անխնա օգտագործելու հետևանք է:

Արարատյան դաշտի ստորերկրյա` արտեզյան ջրավազանի սպառման խնդիրը պարբերաբար բարձրացվում է, սակայն այդպես էլ լուծում չի ստանում: Ամեն տարի վարչապետ Տիգրան Սարգսյանն այս խնդրին անդրադառնում է, ահազանգեր հնչեցնում, բայց գործնական ոչինչ  կարծես թե չի կատարվում, վարչապետն էլ հետևողական չի իր հրահանգների կատարմանը: Բոլորովին վերջերս` հուլիսի 10-ին կառավարության նիստում Տիգրան Սարգսյանը մեկ անգամ ևս անդրադարձավ դրան. «Այսօր մենք ունենք ջրի մեծ գերածախս, և դա կարող է Արարատյան դաշտավայրում ուղղակի աղետալի իրավիճակ ստեղծել, որովհետև մի քանի հարյուր ձկնաբուծական տնտեսություններ ունենք, որոնք վաղը նույնպես կանգնելու են պրոբլեմի առջև, ջրային ռեսուրսներ չեն լինելու, որպեսզի նրանք իրենց տնտեսությունները կարողանան զարգացնել»: 

Հորատանցքով դուրս եկող ջրի խողովակը Ձկնաբուծարան հոսող ջրի խողովակներից մեկը

Այս մտահոգությունը ձկնաբուծությամբ զբաղվող օլիգարխներին կարծես թե չի վերաբերում: Նրանք շարունակում են ընդերքից առատորեն ջուր վերցնել և դրա դիմաց վճարել ավելի քիչ: Սամվել Ալեքսանյանի տնտեսությունը ջրաչափ չի տեղադրել: Ջրի վարձավճարը տալիս է մոնիտորինգային խմբի մասնագետների հաշվարկած ծավալներով: Եռամսյակը մեկ օգտագործած ջրի դիմաց վճարում են 500.000 դրամ` ներառյալ մոնիտորինգային խմբի վճարը: 

Կառավարչի խոսքերով` տնտեսությունը մեծացնելու հնարավորություն ունեն, սակայն ջրային պաշար չունեն այլևս. եթե նոր խորքային հորեր բացեն, ապա կիջնի մյուս հորերի ջրի մակարդակը: Ընդլայնվելու համար նա տեսնում է մեկ ճանապարհ. պետք է անցում կատարել եվրոպական մոդելին, ինչը, սակայն, ծախսատար է: Եվրոպական մոդելը թույլ է տալիս ջրերը շրջանառել տնտեսությունում`օգտագործելով մի քանի անգամ: Եթե անցում կատարեն եվրոպական մոդելին, ապա հորերի թիվը կկրճատվի 60 տոկոսով և ջուրը կխնայվի: Սա գիտակցում է Մովսես Առաքելյանը, սակայն նշում է, որ դրա արդյունքում կավելանա ձկան գինը, քանի որ ամբողջ համակարգն աշխատելու է էլեկտրաէներգիայով:

Պատգամավորը Երևանում խանութների մեծ ցանց ունի` «Yerevan City», և իր աճեցրած ձուկը իրացնում է այնտեղ: Անցյալ տարի Ս.Ալեքսանյանի ձկնաբուծական տնտեսությունից 247 տոննա ձուկ է վաճառվել:

Մովսես Առաքելյանն ասում է, որ այս տարի ձկան «առևտուրը սարսափելի ընկել է», որովհետև Հայաստանում մարդ չի մնացել` արտագաղթել են: Թեև «Yerevan City» խանութների ցանցն ընդլայնվում է հետզհետե, բայց ձկների վաճառքը, ըստ կառավարչի, 30-40 տոկոսով նվազել է:

Նվազել է նաև ձկան գինը: Օրինակ` 3 տարի առաջ ձկան կիլոգրամը իրենց խանութում վաճառվել է 1700-2000 դրամով, այժմ` 1500 դրամի սահմաններում է: «Եթե նայենք` Հայաստանի շուկան միայն ձուկն է էժանացել, ուրիշ ապրանք չկա, որ էժան լինի»,-ասում է Մ. Առաքելյանը:

Մ. Առաքելյանն ասում է, որ ձկնարտադրությունը վերջին երկու տարիների ընթացքում իրոք եկամտաբեր բիզնես է եղել, սակայն այս տարի ռիսկը մեծացել է:


Գլխավոր էջ

Տպել    |  In English



Այս թեմայով

... կարդացեք ավելին «Արտեզյան ջրերը և ձկնաբուծությունը» թեմայով
Մեկնաբանություններ (2)
1. Gegham17:11 - 5 օգոստոսի, 2013
Առաջ Սամվել Ալեքսանյանի անօրինականությունների մասին մասին կարդալուց զարմանում էի որ նա ՀՀ օրենքներից վեր է իրեն դասում,հիմա հիանում եմ որ նա ավելի շուտ է հասկացել որ Հայաստանում պետք է թքած ունենաս օրենքների վրա և անես այն ինչ մտքովդ անցնում է,իսկ խնդիր առաջանալու դեպքում բիրիքով առնում է բոլորին որ էժան նստի,,
2. GB19:36 - 5 օգոստոսի, 2013
This oligarch MP must understand that Armenia's fresh water has more value, than fish farms, where the money will end up in the pocket of few more "barons" of the country!!
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ